ପଟିଆଲା,୨୦ା୩ (ପି.ଟି.)-ଜାତୀୟ ସିନିୟର ଆଥଲେଟିକ୍ସ ଚାମ୍ପିୟନଶିପ୍ ଡିସ୍କସ୍ ଥ୍ରୋରେ କମଲପ୍ରୀତ୍ କୌର (୬୫.୦୬ ମିଟର) ଜାତୀୟ ରେକର୍ଡ ପ୍ରତିଷ୍ଠା ସହ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିଛନ୍ତି। ପୂର୍ବ ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନଠାରୁ ୪ ମିଟର ଆଗେଇ ପାରିଛନ୍ତି। ଚାମ୍ପିୟନଶିପର ୨୦୧୯ ସଂସ୍କରଣରେ ସ୍ବର୍ଣ୍ଣ ଜିତିଥିବା ୨୫ ବର୍ଷୀୟ କୌର ପ୍ରଥମ ପ୍ରଚେଷ୍ଟାରେ ଡିସ୍କସ୍କୁ ୬୫.୦୬ ମିଟର ଥ୍ରୋ କରି ସ୍ଥାନୀୟ ନ୍ୟାଶନାଲ ଇନଷ୍ଟିଚ୍ୟୁଟ୍ ଅଫ୍ ସ୍ପୋଟର୍ସ (ଏନ୍ଆଇଏସ୍)ରେ ଉପସ୍ଥିତ ଦର୍ଶକଙ୍କୁ ଚମତ୍କୃତ କରିଦେଇଥିଲେ। ପରେ ପଞ୍ଜାବର ଏହି ଆଥଲେଟ୍ ତାଙ୍କର ଅବଶିଷ୍ଟ ୫ଟି ପ୍ରଚେଷ୍ଟାରେ ଏହି ଅଙ୍କକୁ ଅତିକ୍ରମ କରିବାରେ ଅସଫଳ ରହିଥିଲେ। ଟୋକିଓ ଅଲିମ୍ପିକ୍ସ ମହିଳା ଡିସ୍କସ୍ ଥ୍ରୋ ପାଇଁ ଯୋଗ୍ୟତା ଅଙ୍କ ୬୩. ୫୦ମିଟର ରହିଛି। କୌରଙ୍କ ପୂର୍ବ ବ୍ୟକ୍ତିଗତ ଶ୍ରେଷ୍ଠ ୬୧.୦୪ ମିଟର ରହିଥିଲା, ଯାହାକୁ ୨୦୧୮ରେ ରେକର୍ଡ କରାଯାଇଥିଲା। ସେ ୯ବର୍ଷ ତଳର ଜାତୀୟ ରେକର୍ଡ (୬୪.୭୬ମିଟର)କୁ ଅତିକ୍ରମ କରିଯାଇଛନ୍ତି। ଏହା ଅଲିମ୍ପିଆନ ତଥା ୨୦୧୦ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ବିଜୟିନୀ କ୍ରିଷ୍ଣା ପୁନିଆଙ୍କ ନାମରେ ରହିଥିଲା। ୨୦୧୮ ଏସିଆନ ଗେମ୍ସରେ ବ୍ରୋଞ୍ଜ ବିଜୟିନୀ ଭେଟେରାନ ସୀମା ପୁନିଆ ତାଙ୍କ ବ୍ୟକ୍ତିଗତ ଶ୍ରେଷ୍ଠ ପ୍ରଚେଷ୍ଟା ୬୨. ୬୪ ମିଟର ସହ ଦ୍ୱିତୀୟ ସ୍ଥାନରେ ରହିଥିଲେ। ୩୭ ବର୍ଷୀୟା ପୁନିଆ ୨୦୧୪ ଏସିଆନ ଗେମ୍ସରେ ସ୍ବର୍ଣ୍ଣ ଜିତିଥିଲେ। ରାଜ୍ୟଗୋଷ୍ଠୀ କ୍ରୀଡ଼ାର ୨୦୦୬, ୨୦୧୦, ୨୦୧୪ ଓ ୨୦୧୮ ସଂସ୍କରଣରେ ଗୋଟିଏ ଲେଖାଏ ପଦକ ଜିତିବାରେ ସଫଳ ରହିଥିଲେ। ଏକ ମିଟରରୁ କମ୍ ବ୍ୟବଧାନରେ ସେ ଯୋଗ୍ୟତା ଅଙ୍କ ହାସଲ କରିବାରେ ବିଫଳ ରହିଥିଲେ। ଦିଲ୍ଲୀର ସୋନାଲ ଗୋୟଲ ତାଙ୍କ ଶ୍ରେଷ୍ଠ ଥ୍ରୋ ୫୨. ୧୧ ମିଟର ସହ ବ୍ରୋଞ୍ଜ ପଦକ ହାସଲ କରିଥିଲେ।
