ଟୋକିଓ,୮।୪(ଏପି): କୋଭିଡ୍-୧୯ ମହାମାରୀ ପ୍ରକୋପକୁ ଦୃଷ୍ଟିରେ ରଖି ଟୋକିଓ ଅଲିମ୍ପିକ୍ସର ମଶାଲ ରାଲି ପ୍ରଭାବିତ ହୋଇଛି। ଓସାକା ସହରର ସଡକରେ ଆୟୋଜନ ହେବାକୁ ଥିବା ଅଲିମ୍ପିକ ମଶାଲ ରାଲିକୁ ବାତିଲ କରାଯାଇଛି। ଫଳରେ ଅଲିମ୍ପିକ୍ସ ଆୟୋଜକଙ୍କୁ ଶକ୍ତ ଝଟକା ଲାଗିଛି।
ଫୁକୁଶିମାର ଉତ୍ତରପୂର୍ବାଞ୍ଚଳରେ ଦୁଇ ସପ୍ତାହ ତଳେ ମଶାଲ ରାଲି ଆରମ୍ଭ ହୋଇଥିଲା। ଆଗାମୀ ୪ ମାସ ମଧ୍ୟରେ ୧୦ ହଜାର ରନରଙ୍କୁ ନେଇ ରାଲି ଆୟୋଜନ କରିବାର କାର୍ଯ୍ୟକ୍ରମ ଥିଲା। ଜୁଲାଇ ୨୩ରେ ଅଲିମ୍ପିକ୍ସ ଆରମ୍ଭ ହେବାର କାର୍ଯ୍ୟକ୍ରମ ରହିଛି ଓ ଏହି ମେଗା ଇଭେଣ୍ଟ ପାଇଁ ଆଉ ମାତ୍ର ୧୦୦ଦିନ ବାକି ରହିଛି।
ଓସାକାର ସଡକରେ ରାଲି ଆୟୋଜିତ ହେବାର କାର୍ଯ୍ୟକ୍ରମ ରହିଥିଲା। ତେବେ ଶେଷ ମୁହୂର୍ତ୍ତରେ କାର୍ଯ୍ୟକ୍ରମରେ ପରିବର୍ତ୍ତନ କରାଯାଇଛି। କରୋନା ସ୍ଥିତିକୁ ଦୃଷ୍ଟିରେ ରଖି ଏହି ରାଲିକୁ ସର୍ବସାଧାରଣ ସଡକରେ ଆୟୋଜନ ନ କରି ଏକ୍ସପୋ ୭୦ କମେମୋରେଟିଭ୍ ପାର୍କରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଛି। ଏଥିରେ ସମସ୍ତ ମଶାଲଧାରୀ ସାମିଲ ହୋଇପାରିବେ ବୋଲି କୁହାଯାଇଛି। ତେବେ ପାର୍କ ଭିତରକୁ କୌଣସି ଦର୍ଶକଙ୍କୁ ଛଡାଯିବ ନାହିଁ।
ଅଲିମ୍ପିକ୍ସ ଓ ପାରା ଅଲିମ୍ପିକ୍ସରେ ସାରା ବିଶ୍ୱର ୨୦୦ଟି ଦେଶରୁ ୧୫,୪୦୦ ଆଥ୍ଲେଟ ଅଂଶଗ୍ରହଣ କରିବେ। ଏମାନଙ୍କ ସହ ୧୦ ହଜାର ଅଫିସିଆଲ, ଜଜ୍, ଗଣମାଧ୍ୟମ ଓ ବ୍ରଡ୍କାଷ୍ଟର ପ୍ରତିନିଧି ମଧ୍ୟ ଜାପାନ ଆସିବେ। ବିଦେଶରୁ କୌଣସି ପ୍ରଶଂସକଙ୍କୁ ଜାପାନ ଭିତରକୁ ଯିବା ପାଇଁ ବାରଣ କରାଯାଇଛି। ତେବେ କେତେ ସଂଖ୍ୟାରେ ସ୍ଥାନୀୟ ଦର୍ଶନ ଏହି ଇଭେଣ୍ଟରେ ଉପସ୍ଥିତ ରହିବେ ସେ ନେଇ କିଛି କୁହାଯାଇନାହିଁ। ମହାମାରୀକୁ ଦୃଷ୍ଟିରେ ରଖି ସବୁପ୍ରକାର ବିହିତ ବ୍ୟବସ୍ଥା ଗ୍ରହଣ କରାଯାଇଛି।