ଷ୍ଟାମଫୋର୍ଡ,୨୧।୭: ଅଲିମ୍ପିକ୍ସ ଇତିହାସର ସଫଳତମ ଆଥ୍ଲେଟ ତଥା ଆମେରିକୀୟ ସନ୍ତରଣକାରୀ ମାଇକେଲ ଫେଲପ୍ସ ଏବେ ଏକ ନୂଆ ଭୂମିକାରେ ଅବତୀର୍ଣ୍ଣ ହେବେ। ଟୋକିଓ ଅଲିମ୍ପିକ୍ସରେ ସେ ଆମେରିକାର ବ୍ରଡ୍କାଷ୍ଟ ଟେଲିଭିଜନ ନେଟ୍ଓ୍ବର୍କ ଏନ୍ବିସି ପାଇଁ କମେଣ୍ଟେଟର ଓ ଖବରଦାତା ଭାବେ କାର୍ଯ୍ୟ କରିବେ। ଫେଲପ୍ସ ଅଲିମ୍ପିକ୍ସରେ ମୋଟ ୨୩ଟି ସ୍ବର୍ଣ୍ଣ ସମେତ ୨୮ଟି ପଦକ ହାସଲ କରି ଇତିହାସ ସୃଷ୍ଟି କରିଥିଲେ। ସନ୍ତରଣର କେତୋଟି ସ୍ବତନ୍ତ୍ର ଇଭେଣ୍ଟରେ ସେ ଡାନ ହିକ୍ସ ଓ ରୋଡି ଗେନ୍ସଙ୍କ ସହ କାର୍ଯ୍ୟ କରିବେ। ସେ ଖବରଦାତା ଭାବେ ଫିଚର ପ୍ରଦାନ କରିବା ସହ ପ୍ରାଇମଟାଇମ କଭରେଜ କରିବେ। ୨୦୦୦ରୁ ୨୦୧୬ ମଧ୍ୟରେ ଫେଲପ୍ସ ୫ଟି ଅଲିମ୍ପିକ୍ସରେ ଅଂଶଗ୍ରହଣ କରିଥିଲେ। ଗତମାସରେ ସେ ୟୁଏସ୍ ସୁଇମିଂ ଟ୍ରାଏଲ୍ସରେ ମଧ୍ୟ ଏନ୍ବିସି ପାଇଁ କାର୍ଯ୍ୟ କରିଥିଲେ। ଅଲିମ୍ପିକ୍ସରେ ସେ ବହୁ ସଂଖ୍ୟାରେ ପଦକ ହାସଲ କରିଛନ୍ତି। ସେ ଜଣେ ଉଚ୍ଚକୋଟୀର ସନ୍ତରଣକାରୀ ହୋଇଥିବାରୁ ଏହି କାର୍ଯ୍ୟ ସଫଳତାର ସହ ତୁଲାଇବେ ବୋଲି ଗେନ୍ସ କହିଛନ୍ତି।
