ଫିଲ୍ମ ‘ଓଏମ୍ଜି’ ଏକ ସୁପର-ଡୁପର ହିଟ ଥିଲା। ସେବେଠାରୁ ପ୍ରଶଂସକମାନେ ଉତ୍ସାହର ସହିତ ଏହି ଚଳଚ୍ଚିତ୍ରର ସିକ୍ୱେଲକୁ ଅପେକ୍ଷା କରିଛନ୍ତି। ଦର୍ଶକଙ୍କ ଅପେକ୍ଷାର ଅନ୍ତ ଘଟିଛି। ଓଏମ୍ଜି-୨ର ଦମ୍ଦାର ଟ୍ରେଲର ରିଲିଜ୍ ହୋଇଛି। ଟ୍ରେଲର ଦେଖି ବୁଝାପଡୁଛି ଯେ ଏଥର ଫିଲ୍ମରେ ଦେଶର ଶିକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠିଛି। ଫିଲ୍ମର ଟ୍ରେଲର ଅଗଷ୍ଟ ୨ରେ ରିଲିଜ୍ ହେବାର ଥିଲା କିନ୍ତୁ କଳା ନିର୍ଦ୍ଦେଶକ ନିତିନ ଦେଶାଇଙ୍କ ଆତ୍ମହତ୍ୟା ପରେ ତାଙ୍କ ସମ୍ମାନର୍ଥେ ଏହାକୁ ଗୋଟିଏ ଦିନ ପାଇଁ ଘୁଞ୍ଚାଇ ଦିଆଯାଇଥିଲା।
ଅକ୍ଷୟ କୁମାରଙ୍କ ଅଭିନୀତ ହିନ୍ଦୀ ସିନେମା ‘ଓହ ମାଇଁ ଗଡ୍’ର ସିକ୍ୱେଲ ‘ଓଏମ୍ଜି ୨’କୁ ସେଣ୍ଟ୍ରାଲ ବୋର୍ଡ ଅଫ୍ ଫିଲ୍ମ ସାର୍ଟିଫିକେଶନ ପକ୍ଷରୁ ‘ଏ’ ସାର୍ଟିଫିକେଟ୍ ମିଳିଛି। ଫିଲ୍ମରେ ଅଳ୍ପ କେତୋଟି ପରିବର୍ତ୍ତନ ସହ ସେନ୍ସର ବୋର୍ଡ ପ୍ରାପ୍ତ ବୟସ୍କଙ୍କ ପାଇଁ ଉଦ୍ଦିଷ୍ଟ (ଆଡଲ୍ଟ) ପ୍ରମାଣପତ୍ର ପ୍ରଦାନ କରିଛି। ଫିଲ୍ମଟି ଅଗଷ୍ଟ ୧୧ରେ ମୁକ୍ତିଲାଭ କରିବ। ଭେଟେରାନ୍ ପଙ୍କଜ ତ୍ରିପାଠୀ, ଗୋବିନ୍ଦ ନାମଦେବ ଅଭିନୟ କରିଥିବା ଏହି ଫିଲ୍ମରେ ‘ରାମାୟଣ’ ଧାରାବାହିକର ଅରୁଣ ଗୋଭିଲଙ୍କୁ ରାମ ଭୂମିକାରେ ଦେଖିବାକୁ ମିଳିବ। ଅଭିନେତ୍ରୀ ୟାମୀ ଗୌତମ ଏଥିରେ କାମିନୀ ମାହେଶ୍ୱରୀ ଭୂମିକାରେ ନଜର ଆସିବେ। ଅମିତ ରାଏଙ୍କ ନିର୍ଦ୍ଦେଶିତ ‘ଓଏମ୍ଜି ୨’କୁ ‘ୟୁଏ’ ସାର୍ଟିଫିକେଟ ପ୍ରଦାନ କରାଯାଉ ବୋଲି ପ୍ରଯୋଜକ ଭିପୁଲ ଡି. ଶାହା ଆବେଦନ କରିଥିଲେ। କିନ୍ତୁ ଏଥିରେ ଥିବା କେତେକ ଆପତ୍ତିଜନକ ସଂଳାପ ଓ ଦୃଶ୍ୟକୁ ବାଦ୍ ଦେବା ପାଇଁ ସେନ୍ସର ବୋର୍ଡ ସର୍ତ୍ତ ବାଢ଼ିଥିଲା। ତେବେ ଫିଲ୍ମର ମୌଳିକତା ନଷ୍ଟ ହେବା ଆଶଙ୍କାରେ ପ୍ରଡକ୍ସନ ହାଉସ୍ ମନା କରିଦେଇଥିଲା। ସିବିଏଫ୍ସି ଅନୁସାରେ ‘ୟୁଏ’ ପ୍ରମାଣପତ୍ର ପ୍ରଦାନର ଅର୍ଥ ହେଉଛି ୧୨ ବର୍ଷରୁ କମ୍ ବୟସର ପିଲା ମଧ୍ୟ ଫିଲ୍ମକୁ ଦେଖିପାରିବେ। ‘ଏ’ ପ୍ରମାଣପତ୍ର ପ୍ରାପ୍ତ ଫିଲ୍ମ ୧୮+ଙ୍କ ପାଇଁ ଉଦ୍ଦିଷ୍ଟ।