ନୂଆଦିଲ୍ଲୀ, ୧୫।୧୨: ଦେଶରେ କରୋନା ମହାମାରୀର ନୂଆ ଭାରିଆଣ୍ଟ ଓମିକ୍ରନ୍ ଯୋଗୁ ଆତଙ୍କ ସୃଷ୍ଟି ହୋଇଛି। ପୃଥିବୀର ୭୭ ଦେଶରେ ଓମିକ୍ରନ ଯୋଗୁ ସଙ୍କଟ ସୃଷ୍ଟି ହୋଇଛି। ଜାନୁଆରୀ-ଫେବୃଆରୀ ମାସରେ ଭାରତରେ ଓମିକ୍ରନ ସଂକ୍ରମଣ ବୃଦ୍ଧି ପାଇପାରେ ବୋଲି ଆଶଙ୍କା କରାଯାଉଛି। ସ୍ବାସ୍ଥ୍ୟ ବିଭାଗ ସହ ଜଡିତ ଜଣେ ଅଧିକାରୀ କହିଛନ୍ତି, ଡେଲ୍ଟା ଭାରିଆଣ୍ଟ ଯେଉଁଭଳି ବେଗରେ ସଂକ୍ରମଣ କରିଥିଲା ଓମିକ୍ରନ୍ ମଧ୍ୟ ସେଭଳି କରିବାର ଯଥେଷ୍ଟ ଆଶଙ୍କା ରହିଛି।
ତେବେ ଏହା ମଧ୍ୟ କୁହାଯାଉଛି ଯେ ଓମିକ୍ରନର କେବଳ ସାମାନ୍ୟ ମାମଲା ସାମ୍ନାକୁ ଆସିବ। ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ କୁହାଯାଇଛି ଯେ ଓମିକ୍ରନ ଦ୍ରୁତ ଗତିରେ ବ୍ୟାପିବାରେ ଲାଗିଛି। ଅଧିକାରୀମାନେ କହିଛନ୍ତି ଯେ ଓମିକ୍ରନ ନେଇ ଭୟଭୀତ ହେବାର ଆବଶ୍ୟକତା ନାହିଁ ବରଂ ଏହାର ସଂକ୍ରମଣ ବନ୍ଦ କରିବା ଲାଗି ପଦକ୍ଷେପ ଗ୍ରହଣ କରିବା ଜରୁରୀ।
ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ନିକଟରେ ପ୍ରକାଶିତ ଏକ ରିପୋର୍ଟରେ ଦର୍ଶାଯାଇଛି ଯେ ଓମିକ୍ରନ କରୋନା ଭାଇରସର ପୂର୍ବ ଭାରିଆଣ୍ଟ୍ ତୁଳନାରେ କମ ଗୁରୁତର ସଂକ୍ରମଣ ସୃଷ୍ଟି କରିବାର ଅନୁମାନ କରାଯାଉଛି। କୁହାଯାଉଛି ଯେ ଓମିକ୍ରନର ପ୍ରଭାବ ଡେଲଟା ଭାରିଆଣ୍ଟ ଠାରୁ କମ ହେବ। ଭାରତର ସ୍ବାସ୍ଥ୍ୟ ଅଧିକାରୀମାନେ କହିଛନ୍ତି ଯେ ଅଧିକରୁ ଅଧିକ ଲୋକଙ୍କୁ କରୋନା ଟିକା ଦେବା ପାଇଁ ପ୍ରୟାସ କରାଯାଉଛି। ବିଶ୍ୱ ସ୍ବାସ୍ଥ୍ୟ ସଂଗଠନର ରିପୋର୍ଟରେ କୁହାଯାଇଛି, ଫାଇଜରର ଟିକା ସଂକ୍ରମଣରୁ କମ୍ ସୁରକ୍ଷା ଦେବାକୁ ସକ୍ଷମ ହେଉଛି। ତେଣୁ ଅଧିକ ପ୍ରଭାବଶାଳୀ ଟିକା ପ୍ରସ୍ତୁତ କରିବା ଆବଶ୍ୟକ।
ଟିକାର ଦୁଇଟି ଡୋଜ ଓମିକ୍ରନ୍ ବିରୋଧରେ କେବଳ ୩୩ ପ୍ରତିଶତ ସୁରକ୍ଷା ଯୋଗାଇଥାଏ। କିନ୍ତୁ ଡାକ୍ତରଖାନାରେ ଭର୍ତ୍ତି ହାରକୁ ୭୦ ପ୍ରତିଶତ ହ୍ରାସ କରିଥାଏ ବୋଲି ସ୍ବାସ୍ଥ୍ୟ ବିଶେଷଜ୍ଞ ସୂଚନା ଦେଇଛନ୍ତି। ତେବେ କରୋନା ମାର୍ଗଦର୍ଶିକା ପାଳନ କରିବା ଉପରେ ଗୁରୁତ୍ୱାରୋପ କରିବା ଅପରିହାର୍ଯ୍ୟ ବୋଲି ବିଶେଷଜ୍ଞ କହିଛନ୍ତି।