ନୂଆଦିଲ୍ଲୀ,୨୪ ।୧୨: ଦେଶରେ ବେଳକୁ ବେଳ ବଢି ଚାଲିଛି ଓମିକ୍ରନ୍ ସଂକ୍ରମିତଙ୍କ ସଂଖ୍ୟା । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁଯାୟୀ, ଶୁକ୍ରବାର ସୁଦ୍ଧା ଦେଶର ୧୭ ରାଜ୍ୟରେ ଓମିକ୍ରନ୍ ଭାରିଏଣ୍ଟ ପହଞ୍ଚି ସାରିଥିବା ବେଳେ ଏଥିରେ ମୋଟ ୩୫୮ ଜଣ ସଂକ୍ରମିତ ହୋଇଛନ୍ତି । ଏମାନଙ୍କ ମଧ୍ୟରୁ ୧୧୪ ଜଣ ସୁସ୍ଥ ହୋଇଯାଇଥିବା ବେଳେ ୨୪୪ ଜଣଙ୍କର ଚିକିତ୍ସା ଚାଲିଛି । ଓମିକନରେ ଆକ୍ରାନ୍ତ ୧୮୩ ଜଣଙ୍କର ଆନାଲିସିସ କରାଯାଇଥିଲା । ଏହି ୧୮୩ ଜଣଙ୍କ ମଧ୍ୟରୁ ୮୭ ଜଣ ଭ୍ୟାକ୍ସିନର ୨ଟି ଯାକ ଡୋଜ ନେଇ ସାରିଥିଲେ । ଏମାନଙ୍କ ମଧ୍ୟରୁ ୩ ଜଣ ବୁଷ୍ଟର ଡୋଜ ବି ନେଇଥିଲେ । ଅନ୍ୟପଟେ ୭ ଜଣ ଭ୍ୟାକ୍ସିନର ଗୋଟିଏ ଡୋଜ ବି ନେଇ ନ ଥିଲେ । ୧୨୧ ଜଣ ବିଦେଶ ଯାତ୍ରା କରିଥିଲେ, ୪୪ ଜଣଙ୍କର କୌଣସି ଟ୍ରାଭେଲ ହିଷ୍ଟ୍ରି ନାହିଁ । ହେଲେ ଏମାନେ ସଂକ୍ରମିତଙ୍କ ସମ୍ପର୍କରେ ଆସିଥିଲେ । ଡେଲ୍ଟା ତୁଳନାରେ ଏହା ଅଧିକ ବେଗରେ ସଂକ୍ରମଣ କରୁଥିବାରୁ ଏହା ୩ ଦିନ ମଧ୍ୟରେ ଦୁଇ ଗୁଣା ହୋଇଯାଉଛି । ଏଥିପାଇଁ କରୋନା ଗାଇଡଲାଇନ୍ ପାଳନ କରିବା ଜରୁରୀ ହୋଇ ପଡିଛି । କେରଳ ଓ ମିଜୋରାମରେ କରୋନା ସଂକ୍ରମିତଙ୍କ ସଂଖ୍ୟା ସବୁଠାରୁ ଅଧିକ ହୋଇଥିବା ବେଳେ ଏବେ ଏହା ସ୍ୱାସ୍ଥ୍ୟ ବିଭାଗକୁ ଚିନ୍ତାରେ ପକାଇଦେଇଛି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ସଚିବ ରାଜେଶ ଭୂଷଣ କହିଛନ୍ତି ବିଶ୍ୱରେ କରୋନାର ଚତୁର୍ଥ ଲହର ଚାଲିଛି । ସେଥିପାଇଁ ଆମକୁ ସତର୍କ ଓ ସାବଧାନ ରହିବା ଜରୁରୀ । ସୂଚନାଯୋଗ୍ୟ, ବିଶ୍ୱରେ ଏବେ ପର୍ଯ୍ୟନ୍ତ ୧୦୮ ଦେଶରେ ଓମିକ୍ରନ ପହଞ୍ଚି ସାରିଥିବା ବଳେ ୧,୫୧,୦୦୦ରୁ ଅଧିକ ଓମିକ୍ରନ୍ ଭାରିଏଣ୍ଟ ଦ୍ୱାରା ସଂକ୍ରମିତ ହୋଇଛନ୍ତି । ଏମାନଙ୍କ ମଧ୍ୟରୁ ୨୬ ଜଣଙ୍କ ମୃତ୍ୟୁ ହୋଇଛି । ସବୁଠାରୁ ଅଧିକ ସଂକ୍ରମିତ ରହିଛନ୍ତି ବ୍ରିଟେନ, ଡେନମାର୍କ, କାନାଡା, ନରୱେ ଓ ଜର୍ମାନୀରେ ।
