ଜୋହାନସବର୍ଗ,୪ ।୧୨: କୋଭିଡର ନୂଆ ଭାରିଏଣ୍ଟ ଓମିକ୍ରନ୍ର ମୁକାବିଲା ପାଇଁ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ(ଡବ୍ଲୁଏଚ୍ଓ)ର ଏକ ବିଶେଷଜ୍ଞ ଦଳ ଦକ୍ଷିଣ ଆଫ୍ରିକା ପହଞ୍ଚିଛନ୍ତି । ଏମାନେ ଗୌତେଙ୍ଗ ଅଞ୍ଚଳରେ ଓମିକ୍ରନର ମୁକାବିଲା କରିବାରେ ସାହାଯ୍ୟ କରିବେ । ଓମିକ୍ରନ ଏବେ ସୁଦ୍ଧା ପାଖାପାଖି ୩୦ ଦେଶରେ ପହଞ୍ଚି ସାରିଲାଣି । ଡବ୍ଲୁଏଚ୍ଓର ଆଫ୍ରିକାର କ୍ଷେତ୍ରୀୟ ଆପାତକାଳୀନ ନିର୍ଦ୍ଦେଶକ ଡା. ସଲାମ ଗୁଏ କହିଛନ୍ତି ଓମିକ୍ରନ୍ ଉପରେ ନଜର ରଖିବା ଓ କଣ୍ଟାକ୍ଟ ଟ୍ରେସିଂ ପାଇଁ ଏକ ବିଶେଷଜ୍ଞ ଦଳ ଦକ୍ଷିଣ ଆଫ୍ରିକା ଗସ୍ତ କରିଛନ୍ତି । ଆଉ ଏକ ଦଳ ପୂର୍ବରୁ ଦକ୍ଷିଣ ଆଫ୍ରିକରେ ଅଛନ୍ତି । ଯେଉଁମାନେ ଜିନୋମ ସିକ୍ୟୁଏନ୍ସିଂରେ ସାହାଯ୍ୟ କରୁଛନ୍ତି । ଗୌତେଙ୍ଗ ଅଞ୍ଚଳ ଦକ୍ଷିଣ ଆଫ୍ରିକାର ପ୍ରମୁଖ ଆର୍ଥିକ କେନ୍ଦ୍ର । ଗୁରୁବାର ଦକ୍ଷିଣ ଆଫ୍ରିକାରେ ୧୧,୫୦୦ ନୂଆ ସଂକ୍ରମିତଙ୍କୁ ଚିହ୍ନଟ କରାଯାଇଥିଲା । ସେଠାକାର ନ୍ୟାଶନାଲ ଇନଷ୍ଟୁଚ୍ୟୁଟ ଫର କମ୍ୟୁନିକେବଲ ଡିଜିଜ(ଏନ୍ଆଇସିଡି) କହିଛି ପାଖାପାଖି ୭୫ ପ୍ରତିଶତ ସଂକ୍ରମଣ ନୂଆ ଭାରିଏଣ୍ଟ ଯୋଗୁ ହୋଇଛି । ଦକ୍ଷିଣ ଆଫ୍ରିକାର ସ୍ୱାସ୍ଥ୍ୟମନ୍ତ୍ରୀ ଫାହଲା କହିଛନ୍ତି ସଂକ୍ରମଣର ଚତୁର୍ଥ ଲହର ଆସିଯାଇଛି ।
