ଲଣ୍ଡନ,୧୪ ।୧୨: ବ୍ରିଟେନରେ କରୋନା ଭାଇରସର ନୂଆ ଭାରିଏଣ୍ଟ ଓମିକ୍ରନ୍ ଯୋଗୁଁ ସୋମବାର ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ନିଜେ ପ୍ରଧାନମନ୍ତ୍ରୀ ବୋରିସ ଜନସନ ଏହା ସ୍ପଷ୍ଟ କରିଛନ୍ତି । ସେ ଜନସାଧାରଣକୁ ଚେତାବନୀ ଦେଇ କହିଛନ୍ତି ଆଗକୁ କରୋନା ଭାଇରସର ନୂଆ ଭାରିଏଣ୍ଟ ‘ଓମିକ୍ରନ୍’ ର ଏ ବଡ ଲହର ଆସୁଛି । ତେଣୁ ଏହାକୁ ରୋକିବା ଜରୁରୀ । ଏହି ଭାରିଏଣ୍ଟ ଦ୍ରୁତ ଗତିରେ କାୟା ବିସ୍ତାର କି ଚାଲିଛି । ଏହାକୁ ଦେଖି ପ୍ରଧାନମନ୍ତ୍ରୀ ବୋରିସ ଜନସନ କହିଛନ୍ତି ଡିସେମ୍ବର ଶେଷ ସୁଦ୍ଧା ୧୮ ବର୍ଷରୁ ଊର୍ଦ୍ଧ୍ୱ ଲୋକେ ବୁଷ୍ଟର ଡୋଜ ନେବା ଜରୁରୀ ।
ଓମିକ୍ରନ୍ ଭାରିଏଣ୍ଟ ଏବେ ସାରା ବିଶ୍ୱକୁ ଚିନ୍ତାରେ ପକାଇ ଦେଇଥିବା ବେଳେ ଏବେ ଏହାର ଭୟାବହତାକୁ ନେଇ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ଓ ବିଶେଷଜ୍ଞମାନେ ଚେତାବନୀ ଦେଲେଣି । ଲଣ୍ଡନ ସ୍କୁଲ ଅଫ୍ ହାଇଜିନ ଆଣ୍ଡ ଟ୍ରପିକାଲ ମେଡିସିନ ଓ ଦକ୍ଷିଣ ଆଫ୍ରିକାର ଷ୍ଟେଲନବୋଶ ୟୁନିଭର୍ସିଟିର ବିଶେଷଜ୍ଞମାନେ କହିଛନ୍ତି ଓମିକ୍ରନ୍ ବ୍ରିଟେନରେ ଭୟାବହ ପରିସ୍ଥିତି ସୃଷ୍ଟି କରିବ । ଯଦି ଏହାକୁ ରୋକିବାକୁ ଉଚିତ ପଦକ୍ଷେପ ନିଆ ନ ଗଲା ତେବେ ଆସନ୍ତା ବର୍ଷ ଏପ୍ରିଲ ସୁଦ୍ଧା ବ୍ରିଟେନରେ ୨୫,୦୦୦ରୁ ୭୫,୦୦୦ ଲୋକଙ୍କ ମୃତ୍ୟୁ ଓମିକ୍ରନ୍ ଯୋଗୁ ହେବ । ବିଶେଷଜ୍ଞମାନେ କହିଛନ୍ତି ଏହି ଭାରିଏଣ୍ଟ ଦ୍ରୁତ ଗତିରେ ବ୍ୟାପୁଥିବାରୁ ଏହା ମହାମାରୀର କାରଣ ହୋଇପାରେ ।
