ଚଣ୍ଡିଗଡ଼/ଦିବ୍ରୁଗଡ଼,୧୯।୩: ବେଆଇନ ଅସ୍ତ୍ରଶସ୍ତ୍ର ଜବତ ପରେ ଖଲିସ୍ତାନୀ ନେତା ଅମ୍ରିତପାଲ୍ ସିଂ ଓ ତାଙ୍କର ସହଯୋଗୀଙ୍କ ବିରୋଧରେ ରବିବାର ସାନି ମାମଲା ରୁଜୁ ହୋଇଛି। ଅମ୍ରିତ୍ପାଲଙ୍କୁ ଧରିବା ପାଇଁ ପଞ୍ଜାବ ପୋଲିସ ପକ୍ଷରୁ ରାଜ୍ୟ ବ୍ୟାପୀ ଚଢ଼ାଉ ଜାରି ରହିଥିବା ବେଳେ ଗିରଫ ହୋଇଥିବା ତାଙ୍କର ୪ଜଣ ସହଯୋଗୀଙ୍କୁ ଆସାମର ଦିବ୍ରୁଗଡ଼ କେନ୍ଦ୍ରୀୟ ଜେଲକୁ ପଠାଇ ଦିଆଯାଇଛି। ସେମାନେ ଏକ ସ୍ବତନ୍ତ୍ର ବିମାନରେ ଆସାମର ଦିବ୍ରୁଗଡ଼ରେ ପହଞ୍ଚି ଥିଲେ। ରାଜ୍ୟରେ ମୋବାଇଲ ଇଣ୍ଟରନେଟ ସେବା ଏବଂ ଏସ୍ଏମ୍ଏସ୍ ସେବା ବନ୍ଦକୁ ସୋମବାର ମଧ୍ୟାହ୍ନ ପର୍ଯ୍ୟନ୍ତ ବଢ଼ାଇ ଦିଆଯାଇଛି। ଅମୃତସର, ଜଳନ୍ଧର ଏବଂ ଲୁଧିଆନା ସମେତ ପଞ୍ଜାବର ବିଭିନ୍ନ ସହରରେ ସୁରକ୍ଷା ବଳ ପକ୍ଷରୁ ରବିବାର ଫ୍ଲାଗ୍ମାର୍ଚ୍ଚ କରାଯାଇଛି। ଖୁବ୍ଶୀଘ୍ର ଅମ୍ରିତପାଲ୍ଙ୍କୁ ଗିରଫ କରାଯିବ ବୋଲି ପୋଲିସ କହିଛି। ଓ୍ବାରିସ୍ ପଞ୍ଜାବ ଡେ’ର ମୁଖ୍ୟ ଅମ୍ରିତପାଲ୍ଙ୍କୁ ଧରିବା ଲାଗି ଶନିବାର ରାଜ୍ୟ ପୋଲିସଙ୍କ ପକ୍ଷରୁ ବ୍ୟାପକ ଚଢ଼ାଉ କରାଯାଇ ୭୮ଜଣଙ୍କୁ ଗିରଫ କରାଯାଇଥିଲା। ଜଳନ୍ଧର ଜିଲାରେ ଖଲିସ୍ତାନୀ ନେତାଙ୍କୁ ପୋଲିସ ପିଛା କରୁଥିବାବେଳେ ସେ କୌଣସି ପ୍ରକାରେ ଖସି ପଳାଇଥିଲେ।
