ରୂପସା,୨୬।୯(ଡି.ଏନ୍.ଏ.): ଆସନ୍ତା ୨୯ ତାରିଖରେ ବାଲେଶ୍ୱର ଜିଲା ବସ୍ତା ବ୍ଲକ ଅଫିସ ଘେରାଉ ପାଇଁ କଂଗ୍ରେସ ଡାକରା ଦେଇଛି। ବନ୍ୟାଜନିତ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ, ଆବାସ ଯୋଜନାରେ ଘର, ଭୂମିହୀନଙ୍କୁ ଘରବାଡ଼ି ପଟ୍ଟା, ଜଳ ନିଷ୍କାସନ ସମସ୍ୟା ସ୍ଥାୟୀ ସମାଧାନ, ଟାଟାପାୱାର ଶୋଷଣ ନୀତି ବନ୍ଦ, ବୃଦ୍ଧାବୃଦ୍ଧ, ଦିବ୍ୟାଙ୍ଗ ଓ ବିଧବାଙ୍କୁ ଭତ୍ତା ଆଦି ଦାବି ନେଇ ସାଧାରଣ ଲୋକଙ୍କୁ ସରକାରୀ ସୁବିଧା ଯୋଗାଇବାରେ ବ୍ଲକ କର୍ତ୍ତୃପକ୍ଷଙ୍କ ମନମୁଖୀ କାର୍ଯ୍ୟକୁ ବିରୋଧ କରାଯାଇ ଏହି ବନ୍ଦ ଡାକରା ଦିଆଯିବ। ବ୍ଲକ ଅଫିସ୍ ଏବେ ଶାସକ ଦଳ ନେତା ଓ କର୍ମୀଙ୍କ କାର୍ଯ୍ୟାଳୟ ପାଲଟିଛି ବୋଲି ସୋମବାର ବାହାର୍ଦ୍ଦା ଡାକବଙ୍ଗଳାରେ ବସ୍ତା ବ୍ଲକ କଂଗ୍ରେସ ପକ୍ଷରୁ ଆୟୋଜିତ ଖବରଦାତା ସମ୍ମିଳନୀରେ ଯୋଗଦେଇ କଂଗ୍ରେସ ନେତା ତଥା ରାଜ୍ୟ ପ୍ରବକ୍ତା ସୁଦର୍ଶନ ଦାସ ଓ ବିଧାନସଭା କ୍ଷେତ୍ର ନେତା ବିଜନ ନାୟକ ଅଭିଯୋଗ କରି ପ୍ରଶାସନ ଉପରେ ବର୍ଷିଛନ୍ତି।
ସାଧାରଣ ଲୋକେ ବ୍ଲକ ଅଫିସରୁ ନ୍ୟାୟ ପାଉନାହାନ୍ତି। ବନ୍ୟା ହେବାର ମାସେ ପରେ ବି ଲୋକଙ୍କୁ ପଲିଥିନ୍ ଖଣ୍ଡେ ମିଳିନାହିଁ। ଟାଟା ପାୱାର ସରକାରଙ୍କ ପ୍ରୋତ୍ସାହନରେ ବିଜୁଳି ଉପଭୋକ୍ତାମାନଙ୍କୁ ମନଇଚ୍ଛା ଶୋଷଣ କରୁଛି ବୋଲି ଦାସ କହିଥିଲେ। ସେହିପରି ଜନସାଧାରଣଙ୍କ ସ୍ବାର୍ଥ ଦୃଷ୍ଟିରୁ ଜଳକା, ପଳପଳା, କଙ୍କୁଡି ଆଦି ନଦୀନାଳର ପୁନରୁଦ୍ଧାର ଜରୁରୀ ବୋଲି କହିଥିଲେ। ଏଗୁଡ଼ିକର ପୁନରୁଦ୍ଧାର ପାଇଁ ଡ୍ରେନେଜ ବିଭାଗ ଦ୍ୱାରା କୋଟି କୋଟି ଟଙ୍କା ଖର୍ଚ୍ଚ ହୋଇଛି। ମାତ୍ର ବ୍ୟାପକ ଦୁର୍ନୀତି ପାଇଁ ତାହାର କାମ ନିମ୍ନମାନର ହୋଇଛି ଏବଂ ଲୋକଙ୍କୁ ସୁଫଳ ମିଳିନାହିଁ। ଏହାର ଭିଜିଲାନ୍ସ ତଦନ୍ତ ପାଇଁ ନାୟକ ଦାବି କରିଛନ୍ତି। ବ୍ଲକ ସଭାପତି ସତ୍ୟନାରାୟଣ ଗୁପ୍ତା ଏଥିରେ ପୌରୋହିତ୍ୟ କରିଥିଲେ। ଖବରଦାତା ସମ୍ମିଳନୀରେ ଜିଲା କଂଗ୍ରେସ ସାଧାରଣ ସମ୍ପାଦକ ସୁଧାଂଶୁ ଶେଖର ଜେନା, ମହିଳା ନେତ୍ରୀ ଅଞ୍ଜଳି ପ୍ରଧାନ, କଂଗ୍ରେସ ନେତା ମନୋଜ ମହାନ୍ତି, ଜୟନ୍ତ ମହାପାତ୍ର, ଜଗଦୀଶ ସାହୁ, କମଳଲୋଚନ ଜେନା, ଅବିନାଶ ନାୟକ, ପ୍ରଦୀପ ଦେ, ନିତ୍ୟାନନ୍ଦ ନାୟକ ପ୍ରମୁଖ ଯୋଗଦେଇ ଯୋଗ୍ୟ ହିତାଧିକାରୀଙ୍କୁ ପାଇଖାନା, ରାଶନକାର୍ଡ଼, ଭତ୍ତା ଦେବା ସହ କ୍ଷତିଗ୍ରସ୍ତ ଚାଷୀଙ୍କୁ ସରକାରୀ ସହାୟତା ମିଳୁ ନ ଥିବାରୁ ୩୧ଟି ପଞ୍ଚାୟତର ଲୋକେ ଆଗାମୀ ୨୯ ତାରିଖରେ ବ୍ଲକ ଘେରାଉ କରିବା ସହ ଜୋରଦାର ଆନ୍ଦୋଳନ ହେବ ବୋଲି ଚେତାବନୀ ଦେଇଥିଲେ।