ମୁମ୍ବାଇ: ବଲିଉଡ୍ ଖିଲାଡି ଷ୍ଟାର ଅକ୍ଷୟ କୁମାରଙ୍କ ଶନିବାର ୫୬ତମ ଜନ୍ମଦିନ ଅବସରରେ ସେ ପରିବାର ସହ ମହାକାଳ ମନ୍ଦିରକୁ ଯାଇ ଦର୍ଶନ କରିଛନ୍ତି। ଏଥିସହ ସେ ତାଙ୍କ ଦର୍ଶକଙ୍କୁ ଏକ ଉପହାର ଦେଇଛନ୍ତି। ସେ ତାଙ୍କ ଆଗାମୀ କମେଡି ଫିଲ୍ମ ‘ୱେଲକମ୍ ୩’ର ପ୍ରୋମୋ ରିଲିଜ୍ କରିବା ସହ ରିଲିଜ୍ ତାରିଖ ଘୋଷଣା କରିଛନ୍ତି। ସିନେମାର ଟାଇଟଲ ରହିଛି ‘ୱେଲକମ୍ ଟୁ ଦି ଜଙ୍ଗଲ’। ପ୍ରୋମୋରେ ଅକ୍ଷୟ ପୂରା ଗ୍ୟାଙ୍ଗ ନଜରକୁ ଆସିଛନ୍ତି। ଏଥିରେ ଅକ୍ଷୟ କୁମାରଙ୍କ ସହିତ ରବୀନା ଟଣ୍ଡନ, ଲାରା ଦତ୍ତା, ଜାକଲିନ୍ ଫର୍ନାଣ୍ଡିଜ୍, ଦିଶା ପଟାନୀ, ସଞ୍ଜୟ ଦତ୍ତ, ସୁନୀଲ ସେଠୀ, ଅର୍ସଦ ୱାର୍ସି, ପରେଶ ରାୱଲ, ମିକା ସିଂ, ରାହୁଲ ଦେବ, ତୁଷାର କପୁର, ମୁକେଶ ତିୱାରି, ଜାକିର ହୁସେନ, ୟଶପାଲ ଶର୍ମା ପ୍ରମୁଖ କଳାକାରଙ୍କୁ ଦେଖିବାକୁ ମିଳିଛି। ଏହି ସମସ୍ତ କଳାକାରଙ୍କ ଅଭିନୟରେ ଦର୍ଶକଙ୍କ ପାଇଁ ହସର ପିଟାରି ଭରି ରହିଛି। ଅହମ୍ମଦ ଖାନ୍ଙ୍କ ଦ୍ୱାରା ନିର୍ଦ୍ଦେଶିତ ଏହି ଫିଲ୍ମ ଆଗାମୀ ବର୍ଷ ଡିସେମ୍ବର ୨୦ରେ ମୁକ୍ତିଲାଭ କରିବ। ଜ୍ୟୋତି ଦେଶପାଣ୍ଡେ ଓ ଫିରୋଜ ଏ ନାଡିଆ ଡୱାଲା ଫିଲ୍ମରେ ପ୍ରଯୋଜନା ଦେଇଛନ୍ତି। ତେବେ ୱେଲକମ୍ର ପ୍ରଥମ ଭାଗ ୨୦୦୭ରେ ରିଲିଜ୍ ହୋଇଥିବାବେଳେ ଦ୍ୱିତୀୟ ଭାଗ ୨୦୧୫ରେ ରିଲିଜ୍ ହୋଇଥିଲା। ଏହି ପ୍ରଥମ ଓ ଦ୍ୱିତୀୟ ଭାଗରେ ଆନେସ ବାଜ୍ମୀ ନିର୍ଦ୍ଦେଶନା ଦେଇଥିଲେ।