ଜୟପୁର,୧୬।୧୨: ଭାରତ ଯୋଡୋ ଯାତ୍ରା ୧୦୦ ଦିନ ପୂରଣ କରିଛି। ଏହି ଅବସରରେ କଂଗ୍ରେସ ନେତା ରାହୁଲ ଗାନ୍ଧୀ ଏଠାରେ ଶୁକ୍ରବାର ଏକ ଖବରଦାତା ସମ୍ମିଳନୀ କରିଥିଲେ। ଏଠାରେ ସେ ଚାଇନା ଏବଂ ଭାରତୀୟ ଯବାନଙ୍କ ମଧ୍ୟରେ ସଂଘର୍ଷ ମାମଲାରେ ମୋଦି ସରକାରଙ୍କୁ କଟାକ୍ଷ କରିଛନ୍ତି। ଏପରିକି ସେ ବୈଦେଶିକ ମନ୍ତ୍ରୀ ଏସ୍. ଜୟଶଙ୍କରଙ୍କୁ ମଧ୍ୟ ଚେତାଇଛନ୍ତି।
ରାହୁଲ କହିଛନ୍ତି, ଚାଇନା ମାମଲାରେ ସରକାର ଲଗାତାର ଭାବେ ଅବହେଳା କରୁଛନ୍ତି। କିନ୍ତୁ ଏହାକୁ ଅଣଦେଖା କରାଯାଇପାରିବ ନାହିଁ କିମ୍ବା ଲୁଚାଯାଇପାରିବ ନାହିଁ। ଚାଇନା ଅପରେଶନ ଚଳାଇଛି। ପ୍ରସ୍ତୁତି ଚାଲିଛି। ହେଲେ ଆମ ସରକାର ନିଦରେ ଶୋଇଛି। ଯିଏ ବି ଏସବୁ କଥାକୁ ବୁଝିଛି ସେ ଦେଖିପାରୁଛି ସେମାନଙ୍କ ଅସ୍ତ୍ରଶସ୍ତ୍ର। ସେମାନେ ଯୁଦ୍ଧ ଲାଗି ପ୍ରସ୍ତୁତ ହେଉଛନ୍ତି। ଅନ୍ତର୍ଜାତୀୟ ମାମଲାରେ କାର୍ଯ୍ୟକ୍ରମ ନୁହେଁ ବରଂ ଶକ୍ତି କାମରେ ଆସେ। ମୁଁ ତିନିରୁ ଚାରି ଥର କହିଛି। ତାକୁ ବୁଝିବା ଦରକାର। କେବଳ ବୈଦେଶିକ ମନ୍ତ୍ରୀଙ୍କ ବୟାନ ଆସୁଛି। ହେଲେ ମନ୍ତ୍ରୀଙ୍କୁ ନିଜର ବୁଝିବା ଶକ୍ତିକୁ ବଢ଼ାଇବା ଉଚିତ ବୋଲି ସେ କହିଛନ୍ତି।
ଏହାଛଡ଼ା ସେ କହିଛନ୍ତି, କେହି ବି ମୋତେ ଚାଇନା ଉପରେ ପ୍ରଶ୍ନ କରିବେ ନାହିଁ ଜାଣେ। ସମସ୍ତେ ଗେହେଲଟ୍-ପାଇଲଟଙ୍କ ଉପରେ ପ୍ରଶ୍ନ ପଚାରିବେ। ହେଲେ ଚାଇନା ଆମର ୨ ହଜାର କିମି ବର୍ଗମିଟର ଅଞ୍ଚଳକୁ ଅକ୍ତିଆରକୁ ନେଇଛି। ଯବାନଙ୍କୁ ଶହୀଦ କରିଛି। ସେମାନଙ୍କୁ ପିଟୁଛି। ହେଲେ କେହି ସେ ବିଷୟରେ କିଛି ବି ପଚାରିବେ ନାହିଁ। ଏହା ପୁରା ଦେଶ ଦେଖୁଛି। ଲଦାଖ ଏବଂ ଅରୁଣାଚଳ ପଟରୁ ପ୍ରସ୍ତୁତି ସରିଲାଣି। ସରକାର ଶୋଇଛନ୍ତି। ବିପଦ ସ୍ପଷ୍ଟ ହୋଇଛି। ହେଲେ ସରକାର ଏହାକୁ ଲୁଚାଇବାକୁ ଚେଷ୍ଟା କରୁଛି। ହେଲେ ଏହା ଲୁଚି ପାରିବ ନାହିଁ। ଚାଇନା ଯୁଦ୍ଧର ପ୍ରସ୍ତୁତି କରୁଛି। ଏହା ଅନୁପ୍ରବେଶର ପ୍ରସ୍ତୁତି ନୁହେଁ। ଯାହା ହେଉଛି ତାକୁ ଦେଖି ସାବଧାନ ରହିବା ଉଚିତ। ଭାଜପା ଏବଂ ଆର୍ଏସ୍ଏସ୍ ସୃଷ୍ଟି କରିଥିବା ଡର ଏବଂ ଘୃଣାକୁ ନେଇ ଯାତ୍ରା କରୁଛି। ତାକୁ ନଷ୍ଟ କରିବାକୁ ଚେଷ୍ଟା କରୁଛି। ଯେଉଁଦିନ କଂଗ୍ରେସ ମାଟିକୁ ଫେରିବ, ତାକୁ କେହି ହରାଇ ପାରିବେ ନାହିଁ। ଯାତ୍ରାର ନଜର ଶ୍ରୀନଗରରେ ପତାକା ଉଡାଇବା ଉପରେ ରହିଛି ବୋଲି ସେ କହିଛନ୍ତି।