ବଅଁରପାଳ,୨୬।୧୧(ଡି.ଏନ.ଏ.): ନାଲ୍କୋ ପାରିପାର୍ଶ୍ୱିକ ଗ୍ରାମ କୁଲାଡ଼ ଗ୍ରାମବାସୀଙ୍କ ପକ୍ଷରୁ ଶୁକ୍ରବାର ଏକ ବୈଠକ ଅନୁଷ୍ଠିତ ହୋଇଯାଇଛି। ସରପଞ୍ଚ ଊଷାରାଣୀ ସ୍ବାଇଁ ଏହାର ନେତୃତ୍ୱ ନେଇଥିଲେ। ବୈଠକରେ କୁହାଯାଇଛି ଯେ, ନାଲ୍କୋ ପ୍ଲାଣ୍ଟ ନିକଟରେ ଥିବା କୁଲାଡ଼ ଗ୍ରାମବାସୀ ଦୀର୍ଘଦିନ ହେଲା ଧୂଳିଧୂଆଁରେ ଜୀବନ ବିତାଉଛନ୍ତି। ହେଲେ ଗ୍ରାମକୁ ଅବହେଳା କରାଯାଉଛି। ଗ୍ରାମରେ ବହୁ ବେକାର ଯୁବତୀଯୁବକ ଥିଲେ ମଧ୍ୟ ସେମାନଙ୍କୁ ଥଇଥାନ କରାଯାଉନାହିଁ। ସ୍କୁଲର ଉନ୍ନତି କରାଯାଉ ନ ଥିବାବେଳେ ରାସ୍ତାଘାଟ ଶୋଚନୀୟ ହୋଇପଡିଛି। ନାଲ୍କୋରେ ଯାଇଥିବା ସ୍ଥାୟୀ ସରକାରୀ ଜମି, ଗୋଚର ଜମି ଏବଂ ଜଳାଶୟ, ଜଙ୍ଗଲ ଜମି ବଦଳରେ ଗ୍ରାମବାସୀଙ୍କୁ ଜମି ପ୍ରଦାନ କରିବା ପାଇଁ ଗ୍ରାମବାସୀ ଦାବି କରିଥିଲେ। ଅଫିସରମାନଙ୍କ ସମ୍ପର୍କୀୟମାନେ ବିଭିନ୍ନ କାର୍ଯ୍ୟରେ ନିୟୋଜିତ ହେଉଥିବାବେଳେ ପାରିପାର୍ଶ୍ୱିକ ଲୋକଙ୍କୁ ଅବହେଳା କରାଯାଉଥିବାରୁ ଗ୍ରାମବାସୀ ଅସନ୍ତୋଷ ପ୍ରକାଶ କରିଥିଲେ। ଏହାର ପ୍ରତିବାଦରେ ଆସନ୍ତା ୨୯ ତାରିଖରେ ଆନ୍ଦୋଳନ କରିବା ପାଇଁ ବୈଠକରେ ନିଷ୍ପତ୍ତି ହୋଇଥିଲା। ବୈଠକରେ ଗ୍ରାମ ସଭାପତି ଅଶୋକ ବିଶୋଇ, ସମ୍ପାଦକ ବିଚିତ୍ରା ସାମଲ, ପ୍ରଭାତ ବିଶୋଇ, ପୂର୍ବତନ ସରପଞ୍ଚ ପଦ୍ମ ଅମାନ୍ତ, ହରମୋହନ ସିଂ, ଭାଗୀରଥି ଜେନା, ଟ୍ରକ୍ ମାଲିକ ସଂଘ ସଭାପତି ମନୋରଞ୍ଜନ ଜେନା, ଅଭୟ ସିଂ, ଶେଷଦେବ ଦେହୁରୀ, ରାଜା ଧୀର, ବିନୋଦ ସେଠ, ବୁଟୁ ଅମାନ୍ତ, ମୁକେଶ ଜେନା, ରମେଶ ଆମାନ୍ତ ପ୍ରମୁଖ ଉପସ୍ଥିତ ଥିଲେ।
