କେନ୍ଦ୍ରାପଡ଼ା ଅଫିସ, ୯।୭: ତୁଳସୀ କ୍ଷେତ୍ରାଧିପତି ଶ୍ରୀବଳଦେବଜୀଉଙ୍କ ନବଦିନାତ୍ମକ ଶ୍ରୀଗୁଣ୍ଡିଚା ଯାତ୍ରା ଆସନ୍ତା ଏକାଦଶୀରେ ରବିବାର ଶେଷ ହେବ। ଏଥିପାଇଁ ଜିଲା ପ୍ରଶାସନ ଓ ଦେବୋତର ଟ୍ରଷ୍ଟ ବୋର୍ଡର ସମସ୍ତ ପ୍ରସ୍ତୁତି ଶେଷ ହୋଇଛି। ଦଶମୀ ତିଥିରେ ଅର୍ଥାତ ଶନିବାର ସନ୍ଧ୍ୟାରୁ ଶ୍ରୀଜୀଉମାନେ ବାହୁଡା ବିଜେ ପାଇଁ ରଥାଋଢ଼ ହେବେ। ଅପରାହ୍ନରେ ଶ୍ରୀଜୀଉଙ୍କ ଖେଚୁଡି ଭୋଗ ପରେ ରଥ ଦକ୍ଷିଣ ମୋଡ ହେବ। ବାହୁଡା ଦ୍ୱାରରେ ସନ୍ଧ୍ୟା ପ୍ରାୟ ୭ଟାରେ ଶ୍ରୀଜୀଉଙ୍କୁ ଧାଡି ପହଣ୍ଡିରେ ରଥାରୁଢ଼ କରାଯିବ। ଏକାଦଶୀ ତିଥିରେ ଅପରାହ୍ନ ୨ଟାରେ ଶ୍ରୀଜୀଉଙ୍କ ବ୍ରହ୍ମ ତାଳଧ୍ୱଜ ରଥ ଟଣା ହେବ ବୋଲି ଟ୍ରଷ୍ଟ ବୋର୍ଡ କାର୍ଯ୍ୟନିର୍ବାହୀ ଅଧିକାରୀ ବଳଭଦ୍ର ପତ୍ରୀ ସୂଚନା ଦେଇଛନ୍ତି। ସୂଚନା ଅନୁଯାୟୀ, ରଥାଋଢ଼ ଶ୍ରୀଜୀଉଙ୍କ ମଙ୍ଗଳ ଆଳତି ଓ ନୀତିସ୍ନାନ ବଢ଼ିଲା ପରେ ଶ୍ରୀଜୀଉଙ୍କ ରଘୁନାଥ ବେଶ ହେବ। ଏହି ବେଶରେ ଶ୍ରୀଜଗନ୍ନାଥଙ୍କ ଶ୍ରୀରାମ ବେଶ ହୋଇଥିବା ବେଳେ ବଡଭାଇ ଶ୍ରୀବଳଦେବଜୀଉଙ୍କୁ ସାନୁଜ ଲକ୍ଷ୍ମଣ ବେଶରେ ସଜ୍ଜିତ କରାଯିବ। ଶ୍ରୀଜୀଉଙ୍କ ଉଭୟପାର୍ଶ୍ୱରେ ହନୁମାନ, ଅଙ୍ଗଦ, ନଳ, ନୀଳ, ସୁଶେଣ, ଜାମ୍ବବାନଙ୍କ କାଷ୍ଠ ନିର୍ମିତ ମୂର୍ତି ଶୋଭା ପାଇଥାଏ। ଶ୍ରୀଜୀଉଙ୍କ ଶ୍ରୀଚରଣ ଓ ଶ୍ରୀଭୂଜ ଲାଗି ହୋଇ ପଦ୍ମ ଫୁଲ ଉପରେ ସେବାୟତମାନେ ଉପବେସନ କରାଇବେ। ସନ୍ଧ୍ୟାରେ ଶ୍ରୀଜୀଉଙ୍କ ଏହି ବେଶ ଉଲାଗି ହୋଇ ଅଧରପଣା ନୀତି ହେବ ବୋଲି କାର୍ଯ୍ୟନିର୍ବାହୀ ଅଧିକାରୀ ପତ୍ରୀ ସୂଚନା ଦେଇଛନ୍ତି।