ଠିକ୍ ୭୬ ବର୍ଷ ତଳେ ଆମେରିକା ଏହାର ପ୍ରଥମ ପରମାଣୁ ବୋମା ପକାଇଥିଲା ଜାପାନର ହିରୋଶିମାରେ। ଚାହୁଁଚାହୁଁ ଚାଲି ଯାଇଥିଲା ୭୦ରୁ ୮୦ ହଜାର ଲୋକଙ୍କ ଜୀବନ। ଏହାର ୩ ଦିନ ପରେ ନାଗାସାକିରେ ପଡ଼ିଥିଲା ଦ୍ୱିତୀୟ ପରମାଣୁ ବୋମା। ଏଥିସହ ଶେଷ ହୋଇଥିଲା ଦ୍ୱିତୀୟ ବିଶ୍ୱଯୁଦ୍ଧ।
ହିରୋଶିମାରେ କ’ଣ ଘଟିଥିଲା
୧୯୪୫ ମସିହା ଅଗଷ୍ଟ ୬ ତାରିଖ ସକାଳ ୮ଟା ୧୫। ରାସ୍ତା ଚଳଚଞ୍ଚଳ ଥାଏ। ଛୁଆମାନେ ସ୍କୁଲରେ ଥାନ୍ତି। କର୍ମସ୍ଥଳରେ ପହଞ୍ଚି ସାରିଥାନ୍ତି କର୍ମଚାରୀ। ବି-୧୯ ବମ୍ବର ଏନୋଲା ଗେ ପକାଇଥିଲା ‘ଲିଟ୍ଲ ବୟ’ ନାମକ ପରମାଣୁ ବୋମା, ଯାହାକି ୨୦ ହଜାର ଟନ୍ର ବଳ ସହ ହିରୋଶିମାରେ ମାଡ଼ ହୋଇଥିଲା।
୧୯୪୬ର ୟୁଏସ୍ ଷ୍ଟ୍ରାଟେଜିକ ବମ୍ବିଂ ସର୍ଭେ ଅନୁଯାୟୀ, ବିସ୍ଫୋରଣରେ ୮୦ ହଜାର ଲୋକଙ୍କ ମୃତ୍ୟୁ ଘଟିଥିବା ବେଳେ ସମାନ ସଂଖ୍ୟକ ଲୋକେ ଆହତ ହୋଇଥିଲେ। କିନ୍ତୁ ବିସ୍ଫୋରଣର ପ୍ରଭାବ ଦୀର୍ଘ ଦିନ ଧରି ରହିଥିଲା। ଏହାର ରେଡିଏଶନ କାରଣରୁ ହଜାର ହଜାର ଲୋକେ ପ୍ରାଣ ହରାଇଥିଲେ।
କାହିଁକି ପରମାଣୁ ବୋମା ପକାଇଲା ଆମେରିକା
ଆମେରିକା ଓ ତା’ର ସହଯୋଗୀ ଦେଶ ବ୍ରିଟେନ, ଚାଇନା ଓ ସୋଭିଏଟ୍ ୟୁନିଅନ ପ୍ରତି ଦ୍ୱିତୀୟ ବିଶ୍ୱଯୁଦ୍ଧବେଳେ ସବୁଠୁ ବଡ଼ ଶତ୍ରୁ ଥିଲା ଜାପାନ। ୧୯୪୫ରେ ଯୁଦ୍ଧ ଶେଷ ହେବା ପରେ ଆମେରିକା ଓ ଜାପାନ ମଧ୍ୟରେ ତିକ୍ତତା ଦେଖାଦେଇଥିଲା। ଏହାର ମୁଖ୍ୟ କାରଣ ଥିଲା ଜାପାନ ସେନା ତୈଳରେ ଭରପୂର ଇଷ୍ଟ ଇଣ୍ଡିଜ ଅଞ୍ଚଳକୁ ଅଧିକାର କରିବାକୁ ନିଷ୍ପତ୍ତି ନେଇଥିଲା। ଆକ୍ରମଣ ସମ୍ପର୍କରେ ସେନା ଅଧିକାରୀମାନେ ଖୋଲାଖୋଲି ଭାବେ ଘୋଷଣା କରିଥିଲେ। ଏଣୁ ପରମାଣୁ ବୋମା ପକାଇବାକୁ ନିର୍ଦ୍ଦେଶ ଦେଇଥିଲେ ଆମେରିକାର ରାଷ୍ଟ୍ରପତି ହ୍ୟାରି ଟ୍ରୁମ୍ୟାନ। ଏହାପରେ ବାଧ୍ୟ ହୋଇ ଆମେରିକା ଆଗରେ ଆତ୍ମସମର୍ପଣ କରିଥିଲା ଜାପାନ।