ବଲିଉଡ୍ ଅଭିନେତା ବିକି କୌଶଲ ଆଜି ୩୪ ବର୍ଷରେ ପଦାର୍ପଣ କରିଛନ୍ତି। ଏଥର ତାଙ୍କ ଜନ୍ମଦିନ ସ୍ବତନ୍ତ୍ର ହେବାକୁ ଯାଉଛି। ବିବାହ ପରେ ସେ ସ୍ତ୍ରୀ କ୍ୟାଟ୍ରିନା କୈଫ୍ଙ୍କ ସହ ପ୍ରଥମ ଥର ପାଇଁ ପାଳନ କରିବାକୁ ଯାଉଛନ୍ତି। ଦୁହେଁ ଏବେ ନ୍ୟୁୟର୍କରେ ଅଛନ୍ତି। ବିକିଙ୍କ ପିତା ଶ୍ୟାମ କୌଶଲ ମଧ୍ୟ ଫିଲ୍ମ ଇଣ୍ଡଷ୍ଟ୍ରିର ଅଟନ୍ତି। ସେ ଜଣେ ପ୍ରସିଦ୍ଧ ଆକ୍ସନ ନିର୍ଦ୍ଦେଶକ। ଅନେକ ହିଟ ଫିଲ୍ମ ପାଇଁ ସେ ଆକ୍ସନ ଦୃଶ୍ୟ ଡିଜାଇନ କରିଛନ୍ତି। ତାଙ୍କ ଭାଇ ସନ୍ନି ମଧ୍ୟ ଜଣେ ଅଭିନେତା।
ଖୁବ କମ ଲୋକ ଜାଣନ୍ତି, ବିକି ଜଣେ ଅଭିନେତା ହେବା ପୂର୍ବରୁ ଜଣେ ଇଞ୍ଜିନିୟର ଥିଲେ। ବି-ଟେକ୍ ପରେ, ୨୦୧୨ରେ, ସେ ଫିଲ୍ମ ଜଗତରେ ପ୍ରବେଶ କରିବାକୁ ନିଷ୍ପତ୍ତି ନେଇଥିଲେ। ସେ ‘ଗ୍ୟାଙ୍ଗସ ଅଫ ୱାସେପୁର’ରେ ସହକାରୀ ନିର୍ଦ୍ଦେଶକ ଭାବରେ ନିଜର କ୍ୟାରିଅର୍ ଆରମ୍ଭ କରିଥିଲେ। ଏହି ଫିଲ୍ମରେ ସେ ଏକ ଛୋଟ ଭୂମିକା ମଧ୍ୟ ଗ୍ରହଣ କରିଥିଲେ। ଏହା ପରେ, ସେ ଫିଲ୍ମ ‘ମସାନ’ରେ ଜଣେ ମୁଖ୍ୟ ଅଭିନେତା ଭାବରେ ୨୦୧୫ରେ କାମ କରିବାର ସୁଯୋଗ ପାଇଥିଲେ। ଏହି ଫିଲ୍ମଟି ତାଙ୍କ କ୍ୟାରିଅର୍ ଟର୍ଣ୍ଣି ପଏଣ୍ଟ୍ ଥିଲା। ତାଙ୍କୁ ପ୍ରକୃତ ପରିଚୟ ଦେଇଥିବା ଫିଲ୍ମଟି ହେଲା ‘ଉରି’। ଏହି ଫିଲ୍ମଟି ବିକିଙ୍କ ଭାଗ୍ୟ ବଦଳାଇ ଦେଇଥିଲା। ଆଦିତ୍ୟ ଧରଙ୍କ ନିର୍ଦ୍ଦେଶିତ ଏହି ଫିଲ୍ମ ତାଙ୍କୁ ରାତାରାତି ଷ୍ଟାର କରିଥିଲା। ଏହି ଫିଲ୍ମ ପାଇଁ ବିକିଙ୍କୁ ଜାତୀୟ ପୁରସ୍କାରରେ ସମ୍ମାନିତ କରାଯାଇଥିଲା।
ବିକି ଆଜିକାଲି ଅନେକ ବଡ ପ୍ରୋଜେକ୍ଟରେ କାମ କରୁଛନ୍ତି। ତାଙ୍କୁ ଶଶାଙ୍କ ଖୈତାନଙ୍କ ଫିଲ୍ମ ‘ଗୋବିନ୍ଦା ନାମ ମେରା’ରେ ଦେଖିବାକୁ ମିଳିବ। ଏହି ସମୟରେ ତାଙ୍କୁ ମେଘନା ଗୁଲଜାରଙ୍କ ଫିଲ୍ମ ‘ଶାମ ବାହାଦୂର’ରେ ମଧ୍ୟ ଦେଖିବାକୁ ମିଳିବ।
