ନୂଆଦିଲ୍ଲୀ,୨୧।୧୦: ବଲିଉଡ୍ ସୁପରଷ୍ଟାର ଶାହରୁଖ ଖାନ ପୁଅ ଆର୍ଯ୍ୟନଙ୍କୁ ଜେଲରେ ଭେଟିବା ପରେ ମନ୍ନତରେ ଗୁରୁବାର ପହଞ୍ଚିଥିଲା ନାର୍କୋଟିକ୍ କଣ୍ଟ୍ରୋଲ ବ୍ୟୁରୋ (ଏନ୍ସିବି)ର ଏକ ଦଳ। ମନ୍ନତରେ ଏନ୍ସିବି ଚଢ଼ାଉ କରିଥିବା ନେଇ ସୋସିଆଲ ମିଡିଆ ଓ ବିଭିନ୍ନ ଗଣମାଧ୍ୟମରେ ଢ଼େର ଚର୍ଚ୍ଚା ହୋଇଥିଲା। ତେବେ ଏହା ଚଢ଼ାଉ ନ ଥିଲା। ଆର୍ଯ୍ୟନଙ୍କ ଗିରଫ ସମ୍ପର୍କୀତ ପେପରଓ୍ବାର୍କ ପାଇଁ ଆଣ୍ଟି ଡ୍ରଗ୍ସ ବ୍ୟୁରୋ ଅଧିକାରୀ ମନ୍ନତ ଯାଇଥିଲେ ବୋଲି ଏନ୍ସିବି ଅଧିକାରୀ ସମୀର ଓ୍ବାଙ୍ଖଡେ କହିଛନ୍ତି।
ଗତ ୨ ତାରିଖରେ କ୍ରୁଜ ଯାହଜରେ ରେଭ ପାର୍ଟି ଚାଲିଥିବା ବେଳେ ଏନ୍ସିବି ଅଧିକାରୀମାନେ ଚଢ଼ାଉ କରି ଆର୍ଯ୍ୟନଙ୍କ ସମେତ ୮ ଜଣଙ୍କୁ ଗିରଫ କରିଥିଲେ। ଗତ ୧୪ ଦିନ ହେଲା ଜେଲରେ ଥିବା ଆର୍ଯ୍ୟନଙ୍କୁ ପ୍ରଥମ ଥର ପାଇଁ ଭେଟିବାକୁ ଯାଇଥିଲେ ଶାହରୁଖ। ଆର୍ଥର ଜେଲରେ ୨୦ ମିନିଟ୍ ବିତାଇବା ପରେ ଶାହରୁଖ ଗଣମାଧ୍ୟମକୁ କୌଣସି ପ୍ରତିକ୍ରିୟା ନ ଦେଇ ଫେରିଥିଲେ।