ପାନ୍ନା, ୬।୮: ଖଣିରେ କାମ କରୁଥିବା ଶ୍ରମିକଙ୍କ ଭାଗ୍ୟ ପୁଣିଥରେ ବଦଳାଇ ଦେଇଛି ମୂଲ୍ୟବାନ ହୀରା। ଏହାର ଏକ ଜ୍ୱଳନ୍ତ ଉଦାହରଣ ମଧ୍ୟପ୍ରଦେଶର ପାନ୍ନା ଜିଲାରେ ଦେଖିବାକୁ ମିଳିଛି। ହୀରା ପାଇଁ ପ୍ରସିଦ୍ଧ ପାନ୍ନାରେ ହୀରା କେତେବେଳେ ସାଧାରଣ ଲୋକଟିର ଭାଗ୍ୟ ବଦଳାଇ ଦେଇଥାଏ ତାହାର ଅନୁମାନ ଲଗାଇବା କଷ୍ଟକର ହୋଇଥାଏ। ଏଠାକାର ଭୂମି ଲୋକଙ୍କୁ ଗୋଟିଏ ରାତିରେ ରାଜା ବନାଇ ଦେଇଥାଏ। ତେଣୁ ଏଠାକାର ଅଧିକାଂଶ ଲୋକ ହୀରା ଖଣିରେ କାମ କରିବାକୁ ଆଗ୍ରହ ପ୍ରକାଶ କରିଥାନ୍ତି।
ସଦ୍ୟତମ ଘଟଣାକ୍ରମେ ଗୁରୁବାର ଜିଲାର ଜରୁଆପୁରଠାରେ ଏକ ଅସ୍ଥାୟୀ ଖଣିରୁ ୬ ଜଣ ଶ୍ରମିକ ୩ଟି ମୂଲ୍ୟବାନ ହୀରା ପାଇଥିଲେ। ଏହି ୩ଟି ହୀରର ଓଜନ ୭.୫୪ କ୍ୟାରେଟ୍ ହୋଇଛି। ସାଧାରଣତଃ ଗୋଟିଏ କ୍ୟାରେଟ୍ ହୀରାର ମୂଲ୍ୟ ୫ ଲକ୍ଷ ଟଙ୍କା ହୋଇଥିବାରୁ ଶ୍ରମିକମାନେ ପାଇଥିବା ସମସ୍ତ ହୀରାର ଆନୁମାନିକ ବଜାର ମୂଲ୍ୟ ୩୦-୩୫ ଲକ୍ଷ ଟଙ୍କା ହେବ ବୋଲି ଆକଳନ କରାଯାଇଛି। ୬ ଜଣ ଶ୍ରମିକ ଏହି ୩ଟି ହୀରାକୁ ନେଇ ଜିଲା ହୀରା କାର୍ଯ୍ୟାଳୟରେ ଦାଖଲ କରିଛନ୍ତି। ନିଲାମ ପରେ ୧୨ ପ୍ରତିଶତ ଟିକସ କଟାଯାଇ ବଳକା ୮୮ ପ୍ରତିଶତ ଅର୍ଥରାଶି ଶ୍ରମିକମାନଙ୍କୁ ପ୍ରଦାନ କରାଯିବ ବୋଲି ପାନ୍ନା ହୀରା ଅଧିକାରୀ ସୂଚନା ଦେଇଛନ୍ତି। ଫଳରେ କରୋନା ମହାମାରୀ ଭଳି ସଙ୍କଟଜନକ ସମୟରେ ଏହି ୬ ଜଣ ଶ୍ରମିକ ଏବେ ଲକ୍ଷପତି ବନିଯିବା ନିଶ୍ଚିତ ହୋଇଛି।