ଜୁନାଗଡ଼,୨୦।୧୦(ଡି.ଏନ୍.ଏ.): କଳାହାଣ୍ଡି ଜିଲା ଜୁନାଗଡ଼ ଥାନା ଅନ୍ତର୍ଗତ ନକଟିଗୁଡା ଗ୍ରାମରେ ଆଇପିଏଲ ସଟ୍ଟା ବେଟିଂ ଅଭିଯୋଗରେ ମଙ୍ଗଳବାର ଜଣକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ସେ ହେଲେ ନକଟିଗୁଡା ବନ୍ଦପଡ଼ାର ଅଜୟ କୁମାର ମେହେର(୪୩)।
ପୋଲିସ ସୂତ୍ରରୁ ପ୍ରକାଶ ଯେ, ନକଟିଗୁଡା ଗ୍ରାମରେ ଆଇପିଏଲ ସଟାବେଟିଂ ହେଉଥିବା ନେଇ ପୋଲିସ ଖବର ପାଇଥିଲା। ଥାନା ଅଧିକାରୀ ଉତ୍ତମ କୁମାର ସାହୁଙ୍କ ନେତୃତ୍ତ୍ୱରେ ଏକ ଟିମ୍ ବ୍ଲୁପ୍ରିଣ୍ଟ ପ୍ରସ୍ତୁତ କରି ଚଢ଼ାଉ କରାଯାଇଥିଲା। ଅଜୟ ନିଜ ଦୋକାନରେ ଆଇପିଏଲ ସଟ୍ଟା ବେଟିଂ କରୁଥିବା ବେଳେ ପୁଲିସ ତାଙ୍କୁ ଗିରଫ କରିଥିଲା। ତାଙ୍କ ନିକଟରୁ ଆଇପିଏଲ ସଟ୍ଟା କାଗଜ, ୩୪୫୦ ଟଙ୍କା, ଗୋଟିଏ ସାମ୍ସଙ୍ଗ ମୋବାଇଲ ଫୋନ ଏବଂ ଗୋଟିଏ ଆଇପିଏଲ ଫଟୋ ଜବତ କରାଯାଇଛି। ଏ ନେଇ ଥାନାରେ ଏକ ମାମଲା (ନଂ. ୨୯୬/୨୦) ରୁଜୁ ହୋଇଛି। ଗିରଫ ପରେ ଅଜୟଙ୍କୁ କୋର୍ଟଚାଲାଣ କରାଯାଇଥିବା ଜଣାପଡ଼ିଛି।