ସୁନାବେଡ଼ା,୯।୭: ସୁନାବେଡ଼ା ପୋଲିସ ପାଟ୍ରୋଲିଂ କରୁଥିବା ବେଳେ ଗଞ୍ଜେଇ ଜବତ କରିଛି। ଜବତ ଗଞ୍ଜେଇର ଆନୁମାନିକ ମୂଲ୍ୟ ୧କୋଟି ଟଙ୍କାରୁ ଊର୍ଦ୍ଧ୍ୱ ହେବ ବୋଲି ପୋଲିସ ସୂଚନା ଦେଇଛି। ଏହି ଘଟଣାରେ ପୋଲିସ ଝାଡ଼ଖଣ୍ଡ ବୋକାରୋ ଅଞ୍ଚଳର ରମନ କୁମାର ରାଉତ (୩୩) ଓ ରାଜୀବ କୁମାର ମହତ (୧୯)ଙ୍କୁ ଗିରଫ କରିଛି ବୋଲି ଥାନା ଅଧିକାରୀ ପ୍ରଦ୍ୟୁମ୍ନ କୁମାର ମହାପାତ୍ର ସୂଚନା ଦେଇଛନ୍ତି।
ଗୁରୁବାର ରାତିରେ ପୋଲିସ ପାଟ୍ରୋଲିଂ କରୁଥିବା ବେଳେ ଏକ ଟ୍ରକ୍( ଜେଏଚ୍-୦୯ଏଏସ୍-୪୩୩୫) ଦ୍ରୁତଗତିରେ ସୁନାବେଡ଼ାରୁ କୋରାପୁଟ ଅଭିମୁଖେ ଯାଉଥିଲା। ସନ୍ଦେହ ହେବାରୁ ପୋଲିସ ତାହାକୁ ଅଟକାଇ ଯାଞ୍ଚ କରିଥିଲା। ଉକ୍ତ ଟ୍ରକ୍ ଡାଲାରେ କଦଳୀ କାନ୍ଧି ମଧ୍ୟରେ ବହୁ ଗଞ୍ଜେଇ ପ୍ୟାକେଟ ପୋଲିସକୁ ମିଳିଥିଲା। ଜବତ ଗଞ୍ଜେଇର ଓଜନ ୧୨ କୁଇଣ୍ଟାଲ ୪ କେଜି ୭ ଶହ ଗ୍ରାମ, ଯାହାର ବଜାର ମୂଲ୍ୟ ୧କୋଟିରୁ ଊଦ୍ଧର୍ବ ଟଙ୍କା ହେବ ବୋଲି ପୋଲିସ କହିଛି। ପୋଲିସ ଏ ନେଇ ୯୧/୨୧ରେ ମାମଲା ରୁଜୁ କରିଛି। ପାଟ୍ରୋଲିଂ ବେଳେ ଏସ୍ଆଇ ନୀଳାଦ୍ରି କଂହର, ଏଏସ୍ଆଇ କେ.ସି. ବେହେରା, ହାବିଲଦାର ଏମ୍.ଏମ୍ .ସାବତ, କନ୍ଷ୍ଟେବଳ ଡି.କେ. ମାଝି, କେ.ଆର୍. ଖେମୁଣ୍ଡୁ ଓ ଏନ୍. ଭତ୍ରା ପ୍ରମୁଖ ସାମିଲ ଥିଲେ। ଏସ୍ଆଇ ମୁକୁନ୍ଦ ମେଲକା ଏହାର ତଦନ୍ତ କରୁଛନ୍ତି।