ଯାଜପୁର ଅଫିସ,୨୮ା୬:ମହିଳା ଯୌନକର୍ମୀଙ୍କୁ ସମାଜର ମୁଖ୍ୟସ୍ରୋତରେ ସାମିଲ କରିବା ଉଦ୍ଦେଶ୍ୟରେ ୨୦୦୮ରେ ପ୍ରଣୀତ ଲକ୍ଷ୍ୟଭେଦୀ ଯୋଜନା ଯାଜପୁର ଜିଲାରେ ଲକ୍ଷ୍ୟଭ୍ରଷ୍ଟ ହୋଇଛି। ଏହି ଯୋଜନାରେ ଜାଲ୍ କାଗଜପତ୍ର ପ୍ରସ୍ତୁତ କରି ଜିଲାରେ ୧୪୭୩ ଜଣ ମହିଳା ଯୌନକର୍ମୀ ଥିବା ଦର୍ଶାଇ କୋଟିଏରୁ ଊର୍ଦ୍ଧ୍ୱ ଟଙ୍କା ହଡ଼ପ ହୋଇଥିବା ଅଭିଯୋଗ ହୋଇଛି। ସ୍ବାସ୍ଥ୍ୟ ବିଭାଗ ଅଧିକାରୀ ଏବଂ ଏନ୍ଜିଓ ସଂସ୍ଥା ମିଳିମିଶି ଏଥିରେ ବ୍ୟାପକ ଅନିୟମିତତା କରିଥିବା ସୂଚନା ଅଧିକାର ଆଇନ (ଆର୍ଟିଆଇ) ବଳରେ ମିଳିଥିବା ତଥ୍ୟରୁ ସନ୍ଦେହ କରାଯାଉଛି।
ଯାଜପୁର ଜିଲାର ସୁକିନ୍ଦା, ଦାନଗଦି ଓ କୋରେଇ ବ୍ଲକ ସହ ବ୍ୟାସନଗର ପୌରାଞ୍ଚଳରେ ହାତଗଣତି ଯୌନକର୍ମୀ ରହିଥିବା କୁହାଯାଉଛି। କିନ୍ତୁ ଏହି ଅଞ୍ଚଳଗୁଡ଼ିକରେ ୧୪୭୩ ଜଣ ମହିଳା ଏବଂ ୧୨୮ ଜଣ ତୃତୀୟଲିଙ୍ଗୀ ଯୌନକର୍ମୀ ଥିବା ଦର୍ଶାଇ ସେମାନଙ୍କୁ ଲକ୍ଷ୍ୟଭେଦୀ ଯୋଜନାରେ ଏନ୍ଜିଓ ମାଧ୍ୟମରେ ସାହାଯ୍ୟ ଯୋଗାଇ ଦିଆଯାଉଛି। ଏନେଇ ଜିଲା ସ୍ବାସ୍ଥ୍ୟ ବିଭାଗରୁ ମିଳିଥିବା ଆରଟିଆଇ ତଥ୍ୟ ଅନୁଯାୟୀ, ଲକ୍ଷଭେଦୀ ଯୋଜନା ଜିଲାକୁ ୨୦୦୮ ଅକ୍ଟୋବର ୧ ଠାରୁ ୨୦୧୨ ମାର୍ଚ୍ଚ ୩୧ ମଧ୍ୟରେ ୮ଲକ୍ଷ ୬୫ ହଜାର ୪୩୯ ଟଙ୍କା ଯୋଗାଇ ଦିଆଯାଇଥିଲା। ସେହିପରି ୨୭ା୪ା୨୦୧୨ରେ ୧୦,୩୯,୫୫୯ ଟଙ୍କା, ୧୦ା୬ା୨୦୧୩ରେ ୧୭,୪୩,୩୦୧ ଟଙ୍କା, ୧୭ା୭ା୨୦୧୪ରେ ୨୮,୦୧,୨୫୯ ଟଙ୍କା, ୯ା୧୦ା୨୦୧୫ରେ ୧୭,୫୯,୭୦୦ ଟଙ୍କା, ୨୮ା୭ା୨୦୧୬ରେ ୧୮,୬୫,୨୦୦ ଟଙ୍କା, ୨୬ା୯ା୨୦୧୭ରେ ୭,୦୫,୩୫୮ ଟଙ୍କା, ୨୨ା୯ା୨୦୧୮ରେ ୯,୩୨,୭୨୮ ଟଙ୍କା ଓ ୩ା୧୧ା୨୦୨୦ରେ ୧୦,୦୦,୮୫୦ ଟଙ୍କା ଅନୁଦାନ ଯୋଗାଇ ଦିଆଯାଇଥିଲା। କିନ୍ତୁ ୨୦୨୧ ଏବଂ ୨୦୨୨ରେ ଏ ବାବଦକୁ କେତେ ଟଙ୍କାର ଅନୁଦାନ ମିଳିଛି ତାହା ସ୍ବାସ୍ଥ୍ୟ ବିଭାଗ ପାଖରେ ଖବର ନାହିଁିଁ। ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅଧୀନରେ ଥିବା ଓଡ଼ିଶା ରାଜ୍ୟ ଏଡ୍ସ ନିୟନ୍ତ୍ରଣ ସମିତି (ଓଏସ୍ଏସିଏସ୍)ଠାରୁ ମିଳିଥିବା ତଥ୍ୟ ଅନୁଯାୟୀ ଯାଜପୁର ଜିଲାରେ ୭ ଶହ ମହିଳା ଏବଂ ତୃତୀୟଲିଙ୍ଗୀ ଯୌନକର୍ମୀ ଅଛନ୍ତି। କିନ୍ତୁ ସ୍ବାସ୍ଥ୍ୟ ବିଭାଗର ପତ୍ରସଂଖ୍ୟା ୧୬୦୧/୬ା୧ା୨୦୨୨ ଅନୁଯାୟୀ ଜିଲାରେ ୧୬୦୧ ମହିଳା ଓ ତୃତୀୟଲିଙ୍ଗୀ ଯୌନକର୍ମୀ ଥିବା ଆର୍ଟିଆଇ ତଥ୍ୟରେ ଉଲ୍ଲେଖ ଅଛି। କିନ୍ତୁ ଜିଲା ସ୍ବାସ୍ଥ୍ୟ ବିଭାଗର ଅନ୍ୟ ଏକ ତଥ୍ୟରେ (ପତ୍ରସଂଖ୍ୟା ୧୩୪୩/୨୨ା୨ା୨୦୨୨) ଜିଲାରେ ଯୌନକର୍ମୀଙ୍କ ସଂଖ୍ୟା ୧୦୭୨ ଜଣ ବୋଲି ଦର୍ଶାଯାଇଛି। ଫଳରେ ସ୍ବାସ୍ଥ୍ୟ ବିଭାଗ ତଥ୍ୟରେ ତାଳମେଳ ରହୁ ନ ଥିବା ସ୍ପଷ୍ଟ ହେଉଛି।
ଅନ୍ୟପକ୍ଷରେ ଅଧିକାଂଶ ଲୋକ ଏ ସମ୍ପର୍କରେ ଜାଣି ନ ଥିଲେ ମଧ୍ୟ ତାଙ୍କୁ ଯୌନକର୍ମୀ ବୋଲି ସରକାରୀ ନଥିପତ୍ରରେ ଦର୍ଶାଯାଇଛି। କିନ୍ତୁ ସ୍ବାସ୍ଥ୍ୟ ବିଭାଗ ବିଭିନ୍ନ ଆଳ ଦେଖାଇ ସେମାନଙ୍କ ତାଲିକା ଦେବାକୁ କୁନ୍ଥୁ କୁନ୍ଥୁ ହେଉଛି। ସ୍ବାସ୍ଥ୍ୟବିଭାଗର ତାଲିକା ଅନୁଯାୟୀ ଜିଲାର ୧୧ ଅଞ୍ଚଳରେ ୯୩୨ଜଣ ମହିଳା, ୨ ସ୍ଥାନରେ ୫୯ ଜଣ ପୁରୁଷ ଓ ୮୧ଜଣ ତୃତୀୟଲିଙ୍ଗୀ ଯୌନକର୍ମୀ ଅଛନ୍ତି। ମୁଖ୍ୟତଃ ମାନପୁର, ସୁଆଁଲୋ, ସିଙ୍ଗାଡିଆ, ସୋଲେଇ, ବିନାୟକବିହାର, ଲକ୍ଷ୍ମୀନଗର, ସାପଗଡ଼ିଆ, ହଟିଙ୍ଗ, ସାରଙ୍ଗପୁର, ପାଣିକୋଇଲି, ଷଠିପୁର, ବାବାଜୀ ସାହି, ହାଟପଡ଼ିଆ, ନଡିଆଭଙ୍ଗା, ଚଣ୍ଡିଖୋଲ, ଗହିରାପାଟୁଳି, ଡୁବୁରି, ବାରଗଡ଼ିଆ, ସିଟିକ୍ୟାମ୍ପ, କଲରଙ୍ଗି, କୁସୁମୁଟିଆ, ହନୁମାନ ହଟିଙ୍ଗ, କେପି ନଗର, ରଙ୍ଗମାଟିଆ, ଟିସ୍କୋ କାଳିଆପାଣି, କାଳିଆପାଣି ଟାଉନଶିପ, କୋଲିପୋଷୀ, ପୁରୁଣାପାଣି, ହାତିହୁଡି, କଂସ ଓ ସାରୁଆବିଲ ଅଞ୍ଚଳରେ ଏହି ସମସ୍ତ ଯୌନକର୍ମୀ ଅଛନ୍ତି ବୋଲି ଜିଲା ସ୍ବାସ୍ଥ୍ୟବିଭାଗ ତାଲିକାରୁ ଜଣାପଡ଼ିଛି। ତେବେ ଜିଲାରେ ଏତେ ପରିମାଣରେ ଯୌନକର୍ମୀ ଥିବା ନେଇ ସନ୍ଦେହ ସୃଷ୍ଟି ହୋଇଛି। ସରକାରୀ ଭାବେ ବିଭିନ୍ନ ସଚେତନତା କାର୍ଯ୍ୟକ୍ରମ ହୋଇଥିବା ଦର୍ଶାଯାଉଥିବା ବେଳେ ଏସମ୍ପର୍କିତ କୌଣସି ଫଟୋ ଚିତ୍ର ଜିଲା ସ୍ବାସ୍ଥ୍ୟବିଭାଗ ନିକଟରେ ଉପଲବ୍ଧ ନାହିଁ। ଏଦିଗରେ ଯଦି ଉଚ୍ଚସ୍ତରୀୟ ତଦନ୍ତ କରାଯାଏ ଏହି ଯୋଜନା ପାଇଁ ଆସିଥିବା ବିପୁଳ ଟଙ୍କାର ଅନୁଦାନ କିପରି ହରିଲୁଟ୍ କରାଯାଇଛି ତାହା ଲୋକଲୋଚନକୁ ଆସିପାରନ୍ତା ବୋଲି ସାଧାରଣରେ ମତପ୍ରକାଶ ପାଇଛି। ସେହିପରି ଏନଜିଓ ଭୂମିକାକୁ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସମ୍ପର୍କରେ ମତାମତ ନେବାକୁ ଜିଲା ମୁଖ୍ୟ ଚିକିତ୍ସାଧିକାରୀ ବିରଞ୍ଚି ନାରାୟଣ ବାରିକଙ୍କୁ ସୋମବାର ତାଙ୍କ ମୋବାଇଲ ଫୋନକୁ ଯୋଗାଯୋଗ କରାଯାଇଥିଲେ ହେଁ ସେ ଫୋନ୍ କଲ୍ ଗ୍ରହଣ କରି ନ ଥିଲେ।