ନବରଙ୍ଗପୁର,୫ା୪(ବି.ପ୍ର.): ଦିନେ କଂଗ୍ରେସର ଗଡ଼ କୁହାଯାଉଥିବା ନବରଙ୍ଗପୁର ଜିଲାରେ ବିଜେଡିର ପତାକା ଉଡ଼ାଇ ସମସ୍ତ ଆସନ ହାତେଇବା ପଛରେ ଥିଲା ତାଙ୍କର ଅବଦାନ। ଦୁଇ ଦୁଇ ଥର ନଗରପାଳ ଓ ଥରେ ଉପାଧ୍ୟକ୍ଷ ଥିବା ସମୟରେ ନବରଙ୍ଗପୁର ସହରର ନବକଳେବର ମଧ୍ୟ ଦେଖିଛନ୍ତି ସହରବାସୀ। ଜଣେ ଦକ୍ଷ ସଙ୍ଗଠକ ସାଜି ବିଜେଡିରୁ ୨ଥର ଜିଲା ସଭାପତି ଥିଲେ। ତାଙ୍କ ଗୋଟିଚାଳନାରେ ଲୋକସଭା ଆସନ ସହ ୪ଟି ବିଧାନସଭା ସଭା ଆସନରୁ ୩ଟିରେ ବିଜେଡି ଦଖଲ ଥିଲା। ଗତ ନିର୍ବାଚନରେ ମଧ୍ୟ ନବରଙ୍ଗପୁର ବିଧାନସଭା ଆସନ ପାଇଁ ନିଜେ ପ୍ରାର୍ଥୀ ଚୟନ କରି ସଦାଶିବ ପ୍ରଧାନୀଙ୍କୁ ବିଜୟୀ କରାଇ ବିଧାୟକ ବନାଇଥିଲେ। ସେ ହେଉଛନ୍ତି ପ୍ରହଲ୍ଲାଦ ତ୍ରିପାଠୀ, ଯାହାଙ୍କୁ ସମସ୍ତେ ଅର୍ଜୁନ ବୋଲି ଡାକନ୍ତି। ଏବେ କିନ୍ତୁ ଦଳର କୌଣସି ସଭା ସମିତିରେ ତାଙ୍କୁ ଦେଖିବାକୁ ମିଳୁନାହିଁ। ଦିନେ ପୌର କାର୍ଯ୍ୟାଳୟରେ ବସି ସହରର ଆଲୋକୀକରଣ ରାସ୍ତାଘାଟର ଉନ୍ନତି ପାଇଁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଉଥିବାବେଳେ ଏବେ ସାଧାରଣ ମଣିଷ ଭଳି ଧାଡ଼ିରେ ରହି ପୌରପାଳିକାରେ ନିଜ ଅଭିଯୋଗ ଦେବାକୁ ଆସିଥିଲେ। ସୋମବାର ପୌରପାଳିକାରେ ପ୍ରଥମଥର ସହରବାସୀଙ୍କ ପାଇଁ ଜିଲା ପ୍ରଶାସନ ପକ୍ଷରୁ ଆୟୋଜନ କରାଯାଇଥିଲା ଜନଶୁଣାଣି ଶିବିର। ଲୋକଙ୍କ ଭିଡ଼ ଭିତରେ ଅର୍ଜୁନ ମଧ୍ୟ ଲାଇନରେ ଛିଡ଼ା ହୋଇ ନିଜ ଅଭିଯୋଗ ଲେଖାଇଥିଲେ l ବର୍ଷାଋତୁ ଆସିଲେ ନବରଙ୍ଗପୁର ସହରରେ ନାଳନର୍ଦ୍ଦମାର ପାଣି ଆସି କୃତ୍ରିମ ବନ୍ୟା ସୃଷ୍ଟି କରୁଛି। ପ୍ରତିବର୍ଷ ଲୋକଙ୍କ ଘରେ ନାଳ ପାଣି ପଶୁଛି। ଏକ ମାଷ୍ଟର ପ୍ଲାନ୍ କରି ମଦର ଡ୍ରେନ୍ର ଆବଶ୍ୟକତା ରହିଛି ବୋଲି ସେ ଅଭିଯୋଗ ଜଣାଇଛନ୍ତି। ଏଥିସହ ସହରର ପ୍ରତ୍ୟେକ ସାହିରେ ଥିବା ପୂର୍ତ୍ତ ବିଭାଗ ରାସ୍ତା ଶୋଚନୀୟ ହୋଇପଡ଼ିଛି। କାଉନ୍ସିଲରଙ୍କ କ୍ଷମତା ସଙ୍କୁଚିତ କରାଯାଉଥିବାରୁ ସମସ୍ୟା ଦୂର ହୋଇପାରୁନାହିଁ ବୋଲି ସେ ଅଭିଯୋଗ କରିଛନ୍ତି। ସହରର ସମସ୍ୟା ବିଷୟରେ ଲୋକଙ୍କ ସହ ଲାଇନରେ ଆସି ଅଭିଯୋଗ ଦେବା ଅନୁଭୂତି ଭଲ ଲାଗିଥିବା ବୋଲି ସେ କହିଛନ୍ତି। ସହରବାସୀଙ୍କର କିଛି ପ୍ରମୁଖ ସମସ୍ୟାକୁ ନେଇ ଧାଡ଼ିରେ ଛିଡ଼ାହୋଇ ଅଭିଯୋଗ କରିବା ଦୃଶ୍ୟ କିନ୍ତୁ ସମସ୍ତଙ୍କୁ ଚକିତ କରିଛି। ଜିଲାପାଳ ମଧ୍ୟ ସମସ୍ତ ସମସ୍ୟା ସମାଧାନ କରିବାକୁ ପ୍ରତିଶ୍ରୁତି ଦେଇଥିବା ସୂଚନା ମିଳିଛି। ଅର୍ଜୁନଙ୍କ ଏଭଳି କାର୍ଯ୍ୟକୁ ପ୍ରଶଂସା କରିଛନ୍ତି। ନବରଙ୍ଗପୁର ପୌରପାଳିକା ନିର୍ବାହୀ ଅଧିକାରୀ ପ୍ରାଣନାଥ ସେଠ। ଅର୍ଜୁନ ଆମର ମାର୍ଗଦର୍ଶକ ହିସାବରେ ଆସି ଅଭିଯୋଗ ଦେଇଥିବା ସେ କହିଛନ୍ତି। ତାଙ୍କର ଏଭଳି କାର୍ଯ୍ୟକୁ ଆମେ ଅଲଗା ଅର୍ଥରେ ଗ୍ରହଣ କରିବା ଉଚିତ ନୁହେଁ ବୋଲି ପ୍ରତିକ୍ରିୟା ରଖିଛନ୍ତି।