ଚର୍ଚ୍ଚିତ ଡବ୍ଲ୍ୟୁଡବ୍ଲ୍ୟୁଇର ଚାମ୍ପିଅନ ‘ ଦ ଗ୍ରେଟ୍ ଖଲି’ଙ୍କ ଆଜି ହେଉଛି ୪୭ତମ ଜନ୍ମଦିନ। ଖଲିକୁ କିଏ ବା ନ ଜାଣେ। ଛୋଟଠୁ ବଡ଼ଯାଏ ସମସ୍ତେ ଖଲିଙ୍କୁ ବେଶ୍ ଭଲ ଭାବେ ଜାଣିଛନ୍ତି। ବିଶେଷକରି ଯେଉଁମାନେ ଡବ୍ଲ୍ୟୁଡବ୍ଲ୍ୟୁ ଦେଖୁଥିବେ ସେମାନେ ଖଲିଙ୍କୁ ରିଙ୍ଗ୍ ଭିତରେ ଦେଖି ଅତ୍ୟଧିକ ଖୁସି ହୋଇଥିବେ। ଯିଏ କି ଜଣେ ସାଥୀ ଖେଳାଳିଙ୍କୁ ଟେକି କଚାଡ଼ି ତାଙ୍କ ଜୀବନ ନେଇଯାଇଥିଲେ। ଏପରିକି ତାଙ୍କୁ ଏଥିପାଇଁ ଜରିମାନା ମଧ୍ୟ ଦେବାକୁ ପଡ଼ିଥିଲା। ଆଜି ସେହି ଖଲି ଦେଶର ଗୌରବ ପାଲଟିଛନ୍ତି। ଆଜିର ଏହି ଖାସ୍ ଦିନରେ ଜାଣନ୍ତୁ ତାଙ୍କ ସମ୍ପର୍କରେ କିଛି କଥା…
୧୯୭୨ ମସିହା ଅଗଷ୍ଟ ୨୭ରେ ହିମାଚଳପ୍ରଦେଶର ଧିରିୟାନା ଗାଁର ଏକ ପଞ୍ଜାବୀ ହିନ୍ଦୁ ପରିବାରରେ ତାଙ୍କର ଜନ୍ମ। ତାଙ୍କ ପିତାଙ୍କ ନାମ ଜ୍ୱାଲାରମା ଏବଂ ମା’ଙ୍କ ନାମ ତାଣ୍ଡି ଦେବୀ। ଗରିବ ପରିବାରରେ ଜନ୍ମ ନେଇଥିଲେ ଖଲି। ୭ ଫୁଟ ୧ ଇଞ୍ଚ ଲମ୍ବର ଖଲିଙ୍କ ପ୍ରକୃତ ନାମ ଦିଲ୍ଲୀପ ସିଂହ ରାଣା। ଖଲିଙ୍କ ଓଜନ ୧୫୭ କିଲୋଗ୍ରାମ। ଅର୍ଥାଭାବ ଯୋଗୁ ତାଙ୍କୁ ସ୍କୁଲ ଛାଡ଼ିବାକୁ ପଡ଼ିଥିଲା। ଖଲି ପାଠପଢ଼ା ଛାଡ଼ି ପେଟ ପଥର ଫଟାଇ ପରିବାର ପୋଷୁଥିଲେ।
ଖାଲି ଏତିକି ନୁହେଁ, ଖଲି ସିକ୍ୟୁରିଟି ଗାର୍ଡ ଭାବରେ ମଧ୍ୟ କାମ କରିଛନ୍ତି। ଏହି ସମୟରେ ଏକ ପଞ୍ଜାବର ଜଣେ ପୋଲିସଙ୍କ ନଜରକୁ ଆସିଥିଲେ। ଏହା ପରେ ତାଙ୍କର ଜୀବନ ବଦଳି ଗଲା। ଖଲି ପେସାରେ ମଧ୍ୟ ଜଣେ ଅଭିନେତା। ସେ କେତେକ ହଲିଉଡ୍ ଏବଂ ବଲିଉଡ୍ ଫିଲ୍ମରେ ମଧ୍ୟ ଅଭିନୟ କରିଛନ୍ତି। ବିଗ୍ବସ୍ ସିଜିନ୍-୪ରେ ଖଲି ପ୍ରତିଯୋଗୀ ଭାବରେ ଭାଗ ନେଇଥିଲେ।
୧୯୯୩ରେ ପଞ୍ଜାବ ପୋଲିସରେ ସେ ଚାକିରି ପାଇଥିଲେ। ଏହା ପରେ ସେ କୁସ୍ତି କରିବା ଆରମ୍ଭ କରିଥିଲେ। ୨୦୦୧ ମେ’ ୨୮ରେ ତାଙ୍କ କୁସ୍ତି କ୍ୟାରିୟର ଆରମ୍ଭ କରିଥିଲେ।
