ଭୁବନେଶ୍ୱର,୨୭।୩: ଦି ଇନ୍ଷ୍ଟିଚ୍ୟୁଟ୍ ଅଫ୍ ଚାର୍ଟାର୍ଡ ଆକାଉଣ୍ଟାଣ୍ଟସ୍ ଅଫ୍ ଇଣ୍ଡିଆ (ଆଇସିଏଆଇ)ର ଭୁବନେଶ୍ୱର ଶାଖା ପକ୍ଷରୁ ରବିବାର ଏକ ଦିନିକିଆ କର୍ମଶାଳାର ଆୟୋଜନ କରାଯାଇଥିଲା। ବିଶେଷକରି ବ୍ୟାଙ୍କ ଶାଖା ଅଡିଟ୍-୨୦୨୩ ଶୀର୍ଷକ ବିଷୟବସ୍ତୁ ଉପରେ ଉକ୍ତ ସେମିନାର ଆୟୋଜିତ ହୋଇଯାଇଛି। ଏହି ଅବସରରେ ଭାରତୀୟ ଷ୍ଟେଟ୍ ବ୍ୟାଙ୍କର ଜେନେରାଲ ମ୍ୟାନେଜର ଚନ୍ଦ୍ରଶେଖର ଶର୍ମା ମୁଖ୍ୟ ଅତିଥି ଭାବେ ଯୋଗଦେଇ ଏହାର ଉଦ୍ଘାଟନ କରିଥିଲେ।
ଅନ୍ୟମାନଙ୍କ ମଧ୍ୟରେ ଆଇସିଏଆଇ ଭୁବନେଶ୍ୱର ଶାଖାର ଅଧ୍ୟକ୍ଷ ସିଏ ରାଜୀବ ଶେଖର ସାହୁ, ଶାଖାର ଅଧ୍ୟକ୍ଷ ସିଏ ପ୍ରଦୀପ କୁମାର ସାହୁ, ଉପାଧ୍ୟକ୍ଷ ତଥା ଛାତ୍ର ସଂଗଠନର ଅଧ୍ୟକ୍ଷ ସିଏ ଗଗନ ବିହାରୀ ଦାସ, ସଭାପତି ମହେନ୍ଦ୍ର କୁମାର ସାହୁ, କୋଷାଧ୍ୟକ୍ଷ ସିଏ ଶାଶ୍ବତ ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ। ଏହି ପରିପ୍ରେକ୍ଷୀରେ ବ୍ୟାଙ୍କ ଶାଖା ଅଡିଟ୍ ସମ୍ବନ୍ଧରେ କାନାରା ବ୍ୟାଙ୍କର ସ୍ବାଧୀନ ନିର୍ଦ୍ଦେଶକ ଦିବାକର ପ୍ରସାଦ ହରିଚନ୍ଦନ ବିସ୍ତୃତ ଆଲୋକପାତ କରିଥିଲେ। ଅପରପକ୍ଷରେ ସିଏ ଲୋକେଶ ଗୁପ୍ତା ବ୍ୟାଙ୍କ ଅଡିଟ୍ ଏବଂ ଏଲଏଫ୍ଆର୍ ରିପୋର୍ଟିଂ, ସିଏ ଅଭୟ ବିଷ୍ଣୁ କାମାତ୍ ଆଇଆର୍ଏସି ନର୍ମସ, ଲୋନ୍, ଅତ୍ୟାଧୁନିକ ଏବଂ ସିଏ ସଞ୍ଜୀବ ସାଂଘି ଯଥାକ୍ରମେ ସିବିଏସ୍ ପରିବେଶ ଅଡିଟ୍ ସମ୍ବନ୍ଧରେ ବିସ୍ତୃତ ଭାବେ ସୂଚନା ପ୍ରଦାନ କରିଥିଲେ। ପରିଶେଷରେ ପୂର୍ବାଞ୍ଚଳ କାଉନ୍ସିଲ୍ ଶାଖାର ଅଧ୍ୟକ୍ଷ ସିଏ ଦେବାୟାନ୍ ପାତ୍ର, ଉପାଧ୍ୟକ୍ଷ ସିଏ ସଞ୍ଜୀବ ସାଂଘି, ସଭାପତି ବିଷ୍ଣୁ ତୁଲସୟାନ୍ ଏବଂ କୋଷାଧ୍ୟକ୍ଷ ସିଏ ମୟୂର ଅଗ୍ରୱାଲଙ୍କୁ ସମ୍ମାନିତ କରାଯାଇଥିଲା।
