ଭୁବନେଶ୍ୱର, ୮।୮(ବ୍ୟୁରୋ): ରାଜଧାନୀ ଭୁବନେଶ୍ୱରରେ ଶତପ୍ରତିଶତ ଟିକାକରଣ ହୋଇଥିବାନେଇ ଗତ ୩୧ ତାରିଖରେ ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ ସୂଚନା ଦିଆଯାଇଥିଲା। ହେଲେ ବାସ୍ତବ ଚିତ୍ର କିନ୍ତୁ ଭିନ୍ନ। ଏବେ ବି ସହରର ଟିକାକରଣ କେନ୍ଦ୍ର ସମ୍ମୁଖରେ ଲୋକଙ୍କ ଭିଡ଼ ଦେଖିବାକୁ ମିଳୁଛି। ଏପରି କି ଅନେକ ଟିକା ନେଇ ନ ଥିବା ପ୍ରକାଶ କରୁଛନ୍ତି। କେଉଁ ତଥ୍ୟ ଆଧାରରେ ବିଏମ୍ସି କର୍ତ୍ତୃପକ୍ଷ ଏଭଳି ସୂଚନା ଦେଲେ ତାହା ଟିକା ନେଇ ନ ଥିବା ଲୋକମାନେ ପ୍ରଶ୍ନ କରୁଛନ୍ତି। ଭୁବନେଶ୍ୱର ବାସିନ୍ଦାଙ୍କୁ ଟିକାକରଣ ସମ୍ପର୍କରେ ଧରିତ୍ରୀ ପକ୍ଷରୁ ଅଗଷ୍ଟ ୬ତାରିଖ ଶୁକ୍ରବାର ବିଭିନ୍ନ ଲୋକଙ୍କୁ ଭେଟି ସେମାନଙ୍କ ପ୍ରତିକ୍ରିୟା ନିଆଯାଇଥିଲା। ଏପରି କି ସେହିଦିନ ବିଏମ୍ସି ହସ୍ପିଟାଲରେ ପ୍ରଥମ ଡୋଜ୍ ଟିକା ନେବାକୁ ଲୋକ ଲଗାଇଥିବା ଲମ୍ବା ଲାଇନ୍ ଦେଖିବାକୁ ମିଳିଥିଲା। ଲୋକଙ୍କ ପ୍ରତିକ୍ରିୟା ପାଇବା ପରେ ରାଜଧାନୀରେ ଶତପ୍ରତିଶତ ଟିକାକରଣକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅପରପକ୍ଷରେ ଜୁଲାଇ ମାସ ସୁଦ୍ଧା ରାଜଧାନୀରେ ଟିକାକରଣ ନେଇ ବିଏମ୍ସି ପକ୍ଷରୁ ଯେଉଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା ତାହା ପୂରଣ ହୋଇଛି। ବହୁତ ଲୋକ ଭୁବନେଶ୍ୱର ବାହାରୁ ଆସି ଟିକା ନେଉଛନ୍ତି। ତେଣୁ ଏବେବି ସହରର ବିଭିନ୍ନ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଓ ଗୋଷ୍ଠୀସ୍ବାସ୍ଥ୍ୟକେନ୍ଦ୍ର ଗୁଡିକରେ ଲମ୍ବା ଧାଡି ଲାଗୁଛି ବୋଲି ବିଏମ୍ସି କମିଶନର ସଞ୍ଜୟ ସିଂ ସୂଚନା ଦେଇଛନ୍ତି। ଟିକାକରଣକୁ ନେଇ ଅଗଷ୍ଟ ୬ତାରିଖରେ ରାଜଧାନୀବାସୀ ଦେଇଥିବା ମତାମତକୁ ନେଇ ସ୍ବତନ୍ତ୍ର ଉପସ୍ଥାପନା।
ଆଜି ଅଗଷ୍ଟ ମାସ ୬ ତାରିଖ। ମୁଁ ଭୁବନେଶ୍ୱରରେ ରହେ। ମୋ ବୟସ ୨୮ବର୍ଷ। ମୁ ଏଯାବତ୍ କରୋନା ପ୍ରଥମ ଡୋଜ୍ ଟିକା ନେଇ ନାହିଁ। ଟିକା ଦିଆଯାଉଛି ଏବେ ନେଇଯିବି।
– ସସ୍ମିତା କଅଁର
ମୁଁ ଗ୍ୟାରେଜ୍ ଛକ ଅଞ୍ଚଳରେ ୨୫ବର୍ଷ ଧରି ରହି ଆସୁଛି। ମୋର ବୟସ ୩୬ ବର୍ଷ। ଆଧାର କାର୍ଡ ଅନୁଯାୟୀ ମୁଁ ଭୁବନେଶ୍ୱର ବାସିନ୍ଦା। ଟିକା ନେବାକୁ ଥରେ ଯାଇଥିଲି। ହେଲେ ଟିକା ଆସିନି ବୋଲି କହିବାରୁ ମୁଁ ଫେରି ଆସିଥିଲି। ଖୁବ୍ଶ୍ରୀଘ୍ର ଯାଇ ଟିକା ନେବି।
– ପାର୍ବତୀ ସାହୁ
ଗ୍ୟାରେଜ୍ ଅଞ୍ଚଳରେ ଦୀର୍ଘ ଦିନ ଧରି ରହୁଛି। ମୋର ପରିଚୟ ପତ୍ର ମଧ୍ୟ ଭୁବନେଶ୍ୱରର ରହିଛି। ମୁଁ ଏଯାବତ୍ ଟିକା ନେଇ ନାହିଁ।
– ଲକ୍ଷ୍ମୀ ସାହୁ
ମୋର ବୟସ ୩୯ ବର୍ଷ। ପ୍ରାୟ ୩୫ବର୍ଷ ହେବ ମଁୁ ଭୁବନେଶ୍ୱରରେ ରହୁଛି। ମୋର ପରିଚୟ ପତ୍ର ସବୁ ଏଠାକାର। ଆଜି ଅଗଷ୍ଟ ୬ତାରିଖ। ମୁଁ ଏଯାବତ୍ କରୋନା ପ୍ରଥମ ଟିକା ନେଇ ନାହିଁ। ମୋ ମା ଓ ବାପା ମଧ୍ୟ ଟିକା ନେଇ ନାହାନ୍ତି। ପ୍ରଶାସନ ତରଫରୁ କେହି ଇନ୍କ୍ୱାରି ମଧ୍ୟ କରି ନାହାନ୍ତି। ବିଏମ୍ସି ତରଫରୁ ଭୁବନେଶ୍ୱରବାସୀଙ୍କୁ ଶତପ୍ରତିଶତ ଟିକାକରଣ କରାଯାଇଥିବାନେଇ କୁହାଯାଉଥିଲେ ସୁଦ୍ଧା ତାହା ବାସ୍ତବ ଚିତ୍ର ନୁହେଁ। ତଥ୍ୟରେ ତାଳମେଳ ରହି ନ ଥାଇପାରେ।
– ବସନ୍ତ ପ୍ରଧାନ
ଭୁବନେଶ୍ୱର ଗ୍ୟାରେଜ ଅଞ୍ଚଳରେ ବିଜୁବାବୁ ଅମଳରୁ ରହି ଆସୁଛୁ। ଏଠାକାର ସ୍ଥାନୀୟ ବାସିନ୍ଦା ଭଳି ରହୁଛୁ । ଗାଁକୁ ଯାଉନାହୁଁ। ଏଯାବତ୍ ଟିକା ନେଇ ନାହିଁ।
– ରମା ପ୍ରଧାନ
ଭୁବନେଶ୍ୱର ସାଲିଆ ସାହି ଅଞ୍ଚଳରେ ୪୦ବର୍ଷ ହେଲା ରହିଲିଣି। ଏପର୍ଯ୍ୟନ୍ତ ଟିକା ନେଇ ନାହିଁ। ଏନେଇ ଭୟ ମଧ୍ୟ ଲାଗୁ ନାହିଁ। ଟିକା ନେବାକୁ ଚେଷ୍ଟା କରୁଛି। ଆଇନ୍କାନୁନ୍ ସମସ୍ତେ ମାନିଲେଣି। ଖବ୍ଶୀଘ୍ର ଟିକା ନେବି।
– ବିଜୟ ମହାରଣା
ଭୁବନେଶ୍ୱର ନିରାକାର ନଗରରେ ରହୁଛି। ଏଯାବତ୍ ଟିକା ନେଇ ନାହିଁ। ଟିକା ନେବାକୁ ଯୋଜନା କରିଛି।
– ପୂର୍ଣ୍ଣମାସୀ ନାୟକ
ଭୁବନେଶ୍ୱର ଗୌରୀନଗରସ୍ଥିତ ମା’ ଗୌରୀ ବସ୍ତିରେ ରହୁଛି। ଭୁବନେଶ୍ୱର ବାସିନ୍ଦାଭାବେ ମୋର ପରିଚୟପତ୍ର ରହିଛି। ମୋର ବୟସ ୪୫ବର୍ଷ। ପୂର୍ବରୁ ୨ଥର ଯାଇଥିଲି। ହେଲେ ନ ମିଳିବାରୁ ଫେରି ଆସିଛି। ଅଗଷ୍ଟ ୬ତାରିଖରେ ପ୍ରଥମ ଟିକା ନେଇଛି।
– ମଙ୍ଗୁଚରଣ ପୃଷ୍ଟି
ମୁଁ ଭୁବନେଶ୍ୱର ବାସିନ୍ଦା । ମୋର ବୟସ ୨୦ବର୍ଷ। ପ୍ରଥମ ଡୋଜ୍ ଟିକା ନେବାକୁ ଆସିଛି। ପୂର୍ବରୁ ସ୍ଲଟ ମିଳୁ ନ ଥିଲା। ଏପରି କି ଓ୍ବାକ୍ ଇନ୍ ଭାକ୍ସିନେଶନ ମିଳୁ ଥିବା ନେଇ ଜାଣି ନ ଥିଲି। ସମସ୍ତଙ୍କୁ ଟିକା ଦିଆଯାଇଥିବା ନେଇ ବିଏମ୍ସି ଯେଉଁ କଥା କହୁଛି, ସେଥିରେ ସତ୍ୟ ଥିବା ଭଳି ମନେ ହେଉ ନାହିଁ। କାରଣ ମୁଁ ଏଯାବତ୍ ଟିକା ନେଇ ନାହିଁ।
– ଅଭିଷେକ ମିଶ୍ର
ଆଜି ଅଗଷ୍ଟ ୬ତାରିଖରେ ମୁଁ ବିଏମ୍ସି ହସ୍ପିଟାଲକୁ ଟିକା ନେବାକୁ ଆସିଛି। ମୋର ପରିଚୟ ପତ୍ରରେ ଭୁବନେଶ୍ୱର ବାସିନ୍ଦା ବୋଲି ଉଲ୍ଲେଖ ରହିଛି।
– ଅପର୍ଣ୍ଣା ବେହେରା
ମୁଁ ସୁନ୍ଦରପଦା ଅଞ୍ଚଳରେ ରୁହେ। ପୂର୍ବରୁ ନେଇ ପାରି ନ ଥିଲି। ଆଜି ମୁଁ ପ୍ରଥମ ଡୋଜ୍ ନେବାକୁ ବିଏମ୍ସି ହସ୍ପିଟାଲକୁ ଆସି ଅପେକ୍ଷା କରିଛି।
– ରସ୍ମିତା ପ୍ରଧାନ
ମୁଁ ଭୁବନେଶ୍ୱର ବାସିନ୍ଦା। ମୋର ବୟସ ୪୫ବର୍ଷ। ଅଗଷ୍ଟ ୬ତାରିଖରେ ପ୍ରଥମ ଡୋଜ୍ ଟିକା ନେବାକୁ ବିଏମ୍ସି ହସ୍ପିଟାଲକୁ ଆସିଛି। – ଲିଙ୍ଗରାଜ ବେହେରା