ନୂଆଦିଲ୍ଲୀ,୨୫।୭: ମହାମାରୀ କରୋନା ଭୂତାଣୁ କବଳରେ ଦେଶ ଏବେ ଭୟଙ୍କର ପରିସ୍ଥିତିର ସମ୍ମୁଖୀନ ହୋଇଛି। ମୋଟ ୧୩ ଲକ୍ଷ ଲୋକ ଭୂତାଣୁ ଆକ୍ରାନ୍ତ ହୋଇଥିବା ବେଳେ ୩୦,୬୬୦ ଲୋକଙ୍କ ଜୀବନ ଗଲାଣି। ଏହା ସତ୍ତ୍ୱେ ଉଗ୍ର ସଂକ୍ରମଣ ସ୍ଥିତି ଦେଖାଦେବାରୁ ଲୋକମାନେ ଆତଙ୍କିତ ହୋଇପଡ଼ିଛନ୍ତି। ଲକ୍ଡାଉନ୍ ସହ କୋଭିଡ୍ କଟକଣା ଜାରି ହେବା ପରେ ଏବେ ଦେଶରେ ଏକ-ପଞ୍ଚମାଂଶ ଲୋକ ବେକାର ହୋଇ ରହିଥିବା ଆଇଏନ୍ଏସ୍- ସି ଭୋଟର ସର୍ଭେ ରିପୋର୍ଟରୁ ଜଣାପଡ଼ିଛି। ମୋଟ ୧,୭୨୩ ଲୋକଙ୍କ ମତାମତ ନିଆଯାଇଥିବା ବେଳେ ଏଭଳି ବିକଳ ସ୍ଥିତି ନଜରକୁ ଆସିଛି। ସର୍ଭେ ରିପୋର୍ଟ ଅନୁଯାୟୀ, ୨୧.୫୭% ଲୋକ କାମାନ୍ତର ହୋଇଛନ୍ତି କିମ୍ବା କାମକୁ ଯାଉ ନ ଥିବା ଜଣାପଡ଼ିଛି। ୨୫.୯୨% ଲୋକ କୋଭିଡ୍ କଟକଣା ମାନି ସମାନ ଦରମାରେ ସୁରକ୍ଷିତ ଭାବେ ସେମାନଙ୍କ କାର୍ଯ୍ୟ କରୁଥିବା ରିପୋର୍ଟରେ ଦର୍ଶାଯାଇଛି। ୭.୦୯% ଲୋକ ସେମାନଙ୍କ ଦରମା ସହ ଘରେ ରହି କାର୍ଯ୍ୟ ସମ୍ପାଦନ କରିଆସୁଛନ୍ତି।
ମାର୍ଚ୍ଚ ୨୫ରେ କେନ୍ଦ୍ର ସରକାର ଦେଶବ୍ୟାପୀ ଲକ୍ଡାଉନ୍ କଟକଣା ଲାଗୁ କରିଥିଲେ। ଜୁନ୍ ୧ରୁ ଅନ୍ଲକ୍ ୧ ଆରମ୍ଭ ହୋଇଥିଲା। ଜୁନ୍ ୨୪ରୁ ଜୁଲାଇ ୨୨ ମଧ୍ୟରେ ଏହି ସର୍ଭେ କରାଯାଇଥିବା ବେଳେ ପରିବାରର ମୁଖ୍ୟ ଆୟକାରୀଙ୍କ ସ୍ଥିତି ସମ୍ପର୍କରେ ଅନୁଧ୍ୟାନ କରାଯାଇଥିଲା। ଲକ୍ଡାଉନ୍ କଟକଣା ଲାଗୁ ହେବା ପରେ ଗରିବ ଓ ମଧ୍ୟବିତ୍ତ ଶ୍ରେଣୀର ଲୋକମାନଙ୍କ ମେରୁଦଣ୍ଡ ଭାଙ୍ଗିଯାଇଥିବା ଜଣାପଡ଼ିଛି। ରୋଜଗାରକ୍ଷମ ୮.୩୩% ଲୋକଙ୍କ ଦରମା କମାଯାଇଥିବା ବେଳେ ସେମାନେ କଟକଣା ମାନି କାମ କରିଆସୁଥିବା ଜଣାପଡ଼ିଛି। ସେହିଭଳି ୮% ଲୋକଙ୍କ ଦରମା କାଟ୍ଛାଣ୍ଟ କରାଯାଇଥିଲେ ମଧ୍ୟ ସେମାନେ ଘରେ ରହି କାର୍ଯ୍ୟ କରିଆସୁଛନ୍ତି। ଲକ୍ଡାଉନ୍ ଲାଗୁ ହେବା ପରେ ୬.୧୨% ଲୋକ କାମ ଛାଡ଼ି ସମ୍ପୂର୍ଣ୍ଣ ଭାବେ ବେକାର ହୋଇପଡ଼ିଛନ୍ତି। ୧.୨୦% ଲୋକ କାମ କରିଆସୁଥିବାବେଳେ ସେମାନଙ୍କୁ କୌଣସି ପାରିଶ୍ରମିକ ମିଳୁନାହିଁ। ସି ଭୋଟର ଡେଲି ଟ୍ରାକିଂ ପୋଲ୍ରେ ବିଭିନ୍ନ ରାଜ୍ୟର ୧୮ ବର୍ଷରୁ ଊର୍ଦ୍ଧ୍ୱ ବୟସର ଲୋକମାନଙ୍କୁ ସାମିଲ କରାଯାଇଥିଲା। ସେମାନଙ୍କ ମତାମତ ଅନୁଯାୟୀ ଦେଶରେ ବେରୋଜଗାର ଲୋକଙ୍କ ସଂଖ୍ୟା ବଢ଼ି ବଢ଼ି ଚାଲିଛି। କେଉଁଠି କାମଧନ୍ଦା ହରାଇ ଲୋକମାନେ ଭାଗ୍ୟକୁ ଆଦରି ଘରେ ରହିଥିବା ବେଳେ ଆଉ କେଉଁଠି ସୁରକ୍ଷା କଟକଣା ମାନି ଦରମା କାଟ୍ଛାଣ୍ଟ ସତ୍ତ୍ୱେ ସେମାନେ କାମ କରିବାକୁ ବାଧ୍ୟ ହେଉଛନ୍ତି। ଦେଶରେ ଲକ୍ଡାଉନ୍ ଲାଗୁହେବା ପରେ କରୋନା ଲୋକଙ୍କ ରୋଜଗାର ଛଡ଼ାଇ ନେଇଥିବା ଏଥିରୁ ସହଜେ ଅନୁମେୟ।