ଜେନେଭା,୪।୪ : ବିଶ୍ୱ ସ୍ବାସ୍ଥ୍ୟ ସଂଗଠନ ମଙ୍ଗଳବାର ଏକ ନୂତନ ରିପୋର୍ଟ ପ୍ରକାଶ କରିଛି। ବିଶ୍ୱସ୍ତରରେ ୬ ଜଣଙ୍କ ମଧ୍ୟରୁ ଜଣେ ବନ୍ଧ୍ୟାତ୍ୱର ଶିକାର ହୋଇଥିବା ରିପୋର୍ଟରେ ଉଲ୍ଳେଖ କରାଯାଇଛି। ସଂଗଠନ କହିଛି ଯେ ବୟସ୍କ ଜନସଂଖ୍ୟାର ପ୍ରାୟ ୧୭.୫ ପ୍ରତିଶତଙ୍କଠାରେ ବନ୍ଧ୍ୟାତ୍ୱ ସମସ୍ୟା ରହିଛି। ଏନେଇ ଲୋକେ ଶସ୍ତା ଏବଂ ଗୁଣାତ୍ମକ ଚିକିତ୍ସା ଆବଶ୍ୟକ କରନ୍ତି।
ଉଚ୍ଚ ଆୟକାରୀ ଦେଶରେ ଏହି ହାର ୧୭.୮ ପ୍ରତିଶତ ରହିଛି। ମଧ୍ୟମ ଏବଂ ସ୍ବଳ୍ପ ଆୟକାରୀ ଦେଶରେ ଏହା ୧୬.୫ ପ୍ରତିଶତ ରହିଛି। ବିଶ୍ୱ ସ୍ବାସ୍ଥ୍ୟ ସଂଗଠନର ମହାନିର୍ଦ୍ଦେଶକ ଟେଡ୍ରୋସ ଆଧାନୋମ ଘେବ୍ରେୟସସ କହିଛନ୍ତି ଯେ ବନ୍ଧ୍ୟାତ୍ୱ ଭେଦଭାବ କରେ ନାହିଁ। ବନ୍ଧ୍ୟାତ୍ୱ ଦ୍ୱାରା ପ୍ରଭାବିତ ବ୍ୟକ୍ତିଙ୍କ ପାଇଁ ଏହା ପ୍ରଜନନ ଯତ୍ନର ଆବଶ୍ୟକତାକୁ ପ୍ରତିଫଳିତ କରିଥାଏ। ସନ୍ତାନସନ୍ତତି ନହେବା ଏକ ବାଧା ସୃଷ୍ଟି କରିଥାଏ। ଏହା ଲୋକଙ୍କୁ ମାନସିକ ସ୍ତରରେ ପ୍ରଭାବିତ କରିଥାଏ।
ବନ୍ଧ୍ୟାତ୍ୱକୁ ରୋକିବା ଏବଂ ଚିକିତ୍ସା ପାଇଁ ଆଇଭିଏଫ ପରି ଟେକ୍ନୋଲୋଜି ବହୁତ ମହଙ୍ଗା। ଏଥି ସହିତ, ବହୁତ ସୀମିତ ହୋଇଥିବାରୁ, ଏହା ମଧ୍ୟ ଅନେକ ଲୋକଙ୍କ ପାଖରେ ପହଞ୍ଚିପାରେ ନାହିଁ। ବିଶ୍ୱ ସ୍ବାସ୍ଥ୍ୟ ସଂଗଠନର ଅଧିକାରୀ ପାସ୍କାଲ ଏଲୋଟେ କହିଛନ୍ତି ଯେ ଲକ୍ଷ ଲକ୍ଷ ଲୋକଙ୍କ ପାଇଁ ଏହାର ଚିକିତ୍ସା ଅତ୍ୟନ୍ତ ମହଙ୍ଗା ହୋଇଥାଏ। ଏଭଳି ଖର୍ଚ୍ଚ ପ୍ରଭାବିତ ବ୍ୟକ୍ତିଙ୍କ ପାଇଁ ଚିକିତ୍ସା କରିବା ବେଳେବେଳେ ଅସମ୍ଭବ ମଧ୍ୟ କରିଥାଏ।
