ଚଣ୍ଡିଗଡ଼,୨୫।୫: ଗୋଟିଏ ପଟେ ଯୋଗ ଗୁରୁ ବାବା ରାମଦେବ କ୍ରମାଗତ ଭାବେ ନିଜ ବୟାନକୁ ନେଇ ଚର୍ଚ୍ଚାରେ ରହୁଥିବା ବେଳେ ଏବେ ହରିଆଣାରେ କରୋନା ରୋଗୀଙ୍କୁ ନେଇ ଏକ ବଡ଼ ନିଷ୍ପତ୍ତି ନିଆଯାଇଛି। କରୋନା ରୋଗୀଙ୍କ ଶୀଘ୍ର ଆଶୁ ଆରୋଗ୍ୟ ପାଇଁ ହରିଆଣା ସରକାର ଆୟୁର୍ବେଦିକ ଚିକିତ୍ସାକୁ ଅର୍ନ୍ତଭୁକ୍ତ କରିଛନ୍ତି। ଏହିକ୍ରମରେ ବାବା ରାମଦେବଙ୍କ ପତଞ୍ଜଳୀର ଏକ ଲକ୍ଷ କରୋନିଲ୍ କିଟ୍କୁ ସରକାର କରୋନା ଆକ୍ରାନ୍ତଙ୍କୁ ମାଗଣାରେ ବଣ୍ଟନ କରିବେ ବୋଲି ଜଣାପଡ଼ିଛି। ଏନେଇ ରାଜ୍ୟ ଗୃହ ଓ ସ୍ବାସ୍ଥ୍ୟମନ୍ତ୍ରୀ ଅନିଲ ବିଜ୍ ଟୁଇଟ କରି ସୂଚନା ଦେଇଛନ୍ତି। ଏଥିସହ ସେ କହିଛନ୍ତି, ଏହି କାର୍ଯ୍ୟ ପାଇଁ କରୋନିଲ୍ର ଅଧା ଖର୍ଚ୍ଚ ପତଞ୍ଜଳୀ ଉଠାଇବ ଏବଂ ଅଧା ହରିୟାଣା ସରକାର କୋଭିଡ ରିଲିଫ୍ ପାଣ୍ଠିରୁ ବହନ କରିବ। ଅନ୍ୟପଟେ ବାବା ରାମଦେବ ଏନେଇ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ପତଞ୍ଜଳୀ ସରକାରଙ୍କୁ ସହଯୋଗ କରିବା ପାଇଁ ପ୍ରତିଶ୍ରୁତିବଦ୍ଧ। ତେବେ ଅନ୍ୟ ରାଜ୍ୟ ସରକାରଙ୍କୁ ମଧ୍ୟ ସମାନ ପଦକ୍ଷେପ ଗ୍ରହଣ କରିବାକୁ ବାବା ରାମଦେବ ଅନୁରୋଧ କରିଛନ୍ତି। ତେବେ ହରିଆଣା ସରକାରଙ୍କ ଏଭଳି ପଦକ୍ଷେପକୁ ନେଇ ଏବେ ରାଜନୈତିକ ହଇଚଇ ସୃଷ୍ଟି ହୋଇଛି।