‘ଏକ ଦେଶ-ଏକ ନିର୍ବାଚନ’ ସପକ୍ଷରେ ବହୁ କେନ୍ଦ୍ର ମନ୍ତ୍ରୀ, ବିରୋଧୀଙ୍କୁ ଦେଲେ କଡା ଜବାବ
ନୂଆଦିଲ୍ଲୀ,୧।୯: ଏକ ଦେଶ-ଏକ ନିର୍ବାଚନକୁ ନେଇୁ ଜାତୀୟ ରାଜନୀତି ସରଗରମ ରହିଛି। ଆଶା କରାଯାଉଛି କି, ଆସନ୍ତା ମୌସୁମୀ ଅଧିବେଶନରେ ଏହି ବିଷୟରେ ଚର୍ଚ୍ଚା ହେବ। କେନ୍ଦ୍ର ସରକାରଙ୍କ ଏହି ନିଷ୍ପତ୍ତିରେ ବିରୋଧୀ ଲଗାତାର ତାଙ୍କୁ ଟାର୍ଗେଟ କରିବାରେ ଲାଗିଛନ୍ତି। ପ୍ରଧାନମନ୍ତ୍ରୀ ମୋଦି ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଏହି କମିଟିରି ଅଧ୍ୟକ୍ଷ କରିଛନ୍ତି। ଏହି କମିଟିରି ଏକ ଦେଶ ଏକ ନିର୍ବାଚନ ନେଇ ଆଲୋଚନା ଓ ବିଚାର ବିମର୍ଶ କରିବ। ଏହିକ୍ରମରେ କୋବିନ୍ଦଙ୍କୁ କମିଟିର ଅଧ୍ୟକ୍ଷ ଭାବେ କିପରି ନିଯୁକ୍ତି ହେଉଛି ସେ ନେଇ ମଧ୍ୟ ବିରୋଧୀ ଲଗାତାର ପ୍ରଶ୍ନବାଣ ମାରି ଚାଲିଛନ୍ତି। ବହୁ କେନ୍ଦ୍ର ମନ୍ତ୍ରୀ ଏହି ପ୍ରସଙ୍ଗରେ ସମର୍ଥନ ଜଣାଇବା ସହ ବିରୋଧୀଙ୍କୁ ଟାର୍ଗେଟ କରୁଛନ୍ତି।
କେନ୍ଦ୍ର ମନ୍ତ୍ରୀ ପ୍ରହ୍ଲାଦ ଯୋଶୀ ଏହି କମିଟିକୁ ସମର୍ଥନ କରିବା ସହ ବିରୋଧୀଙ୍କୁ ଟାର୍ଗେଟ କରିଛନ୍ତି। ସରକାରଙ୍କ ଏହି ନିଷ୍ପତ୍ତିରେ ବିରୋଧୀ ଭୟଭୀତ ହୋଇ ଯାଇଛନ୍ତି ବୋଲି ସେ କହିଛନ୍ତି।
‘ଏ ପ୍ରସଙ୍ଗରେ ସଂସଦରେ ଆଲୋଚନା ହେବ। ବିରୋଧୀ କାହିଁକି ଏତେ ଭୟଭୀତ? ଗଣତନ୍ତ୍ରର ବିକାଶ ବିଷୟରେ ଆଲୋଚନା ହେବ ଏବଂ ଭାରତ ହେଉଛି ଗଣତନ୍ତ୍ରର ମାତା। ଏହା ବିକାଶର ଏକ ଅଂଶ।
ଦେଶର ବିକାଶ ପାଇଁ ପାରିତ ହୋଇଥିବା ସମସ୍ତ ପ୍ରସ୍ତାବ ଉପରେ ଆଲୋଚନା କରାଯିବ। ବର୍ତ୍ତମାନ ଏକ କମିଟି ଗଠନ କରାଯାଇଛି, ଯାହା ଏନେଇ ପରାମର୍ଶ ଦେବ ଏବଂ ତା’ପରେ ସମସ୍ତଙ୍କ ଉପସ୍ଥିତିରେ ଏହି ପ୍ରସଙ୍ଗ ଉପରେ ଆଲୋଚନା କରାଯିବ। ୧୯୬୭ ପର୍ଯ୍ୟନ୍ତ ଲୋକସଭା ଏବଂ ବିଧାନସଭା ପାଇଁ ଏକକାଳୀନ ନିର୍ବାଚନ ଅନୁଷ୍ଠିତ ହୋଇଥିଲା। ବର୍ତ୍ତମାନ ପ୍ରତି ମାସରେ ନିର୍ବାଚନ ଅନୁଷ୍ଠିତ ହେଉଛି ଯାହା ଖର୍ଚ୍ଚ ବହୁଳ। ଏହା ଉପରେ ଏକ ଆଲୋଚନା ହେବା ନିହାତି ଜରୁରୀ।’
କେନ୍ଦ୍ର ମନ୍ତ୍ରୀ ପ୍ରହ୍ଲାଦ ଯୋଶୀଙ୍କ ବ୍ୟତୀତ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ମଧ୍ୟ ଏହି ନିଷ୍ପତ୍ତିକୁ ସମର୍ଥନ କରିଛନ୍ତି। ସେ କହିଛନ୍ତି, ‘ମୁଁ ଗୋଟିଏ ଦେଶ ଗୋଟିଏ ନିର୍ବାଚନକୁ ସ୍ବାଗତ କରୁଛି। ନିର୍ବାଚନରେ ଖର୍ଚ୍ଚ ହୋଇଥିବା ଅଧିକ ଅର୍ଥକୁ ଏହାଦ୍ୱାରା ସଞ୍ଚୟ କରିହେବ, ଯାହା ଜନ କଲ୍ୟାଣକାରୀ ଯୋଜନାରେ ବ୍ୟବହୃତ ହୋଇପାରିବ’।
ସେହିପରି ମହାରାଷ୍ଟ୍ରର ଡେପୁଟି ସିଏମ ଦେବେନ୍ଦ୍ର ଫଡନାଭିସ ମଧ୍ୟ ଏହି ପ୍ରସଙ୍ଗକୁ ସମର୍ଥନ କରିଛନ୍ତି ଏବଂ ଏହାକୁ ଏକ ସଠିକ ପ୍ରସ୍ତାବ ବୋଲି କହିଛନ୍ତି।
ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ଏହାକୁ ସମର୍ଥନ କରିଛନ୍ତି। ସେ କହିଛନ୍ତି, ଉତ୍ତରପ୍ରଦେଶବାସୀଙ୍କ ତରଫରୁ ସେ ଏହି ପଦକ୍ଷେପ ପାଇଁ ପ୍ରଧାନମନ୍ତ୍ରୀ ମୋଦୀଙ୍କୁ କୃତଜ୍ଞତା ଜଣାଉଛି। ଏହି ପଦକ୍ଷେପ ପ୍ରଶଂସନୀୟ। ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ ଏଥିପାଇଁ ଗଠିତ କମିଟିର ସଭାପତି କରାଯାଇଛି ବୋଲି ଶୁଣି ଆମେ ବହୁତ ଖୁସି। ବାରମ୍ବାର ନିର୍ବାଚନ ହେବା ଦ୍ୱାରା ବିକାଶ କାର୍ଯ୍ୟରେ ବାଧା ସୃଷ୍ଟି ଉପୁଜୁଛି।
ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଏହି ନିଷ୍ପତ୍ତିକୁ ଐତିହାସିକ ନିଷ୍ପତ୍ତି ବୋଲି କହିଛନ୍ତି। ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଏହି କମିଟିର ସଭାପତି କରିଥିବାରୁ ସେ ଖୁସି ବ୍ୟକ୍ତ କରିଛନ୍ତି। ସେ କହିଛନ୍ତି ଯେ, ‘ଏକାଧିକ ନିର୍ବାଚନରେ ବହୁ ଅର୍ଥ ଖର୍ଚ୍ଚ ହୋଇଥାଏ ଏବଂ ପ୍ରତ୍ୟେକ ଥର ଭାରତ ନିର୍ବାଚନ ମୋଡରେ ଥିବାବେଳେ ବିକାଶର ଅନେକ କ୍ଷତି ହୋଇଥାଏ।’
ଲୋକ ଜନଶକ୍ତି ପାର୍ଟି (ରାମ ଭିଲାସ)ଅଧ୍ୟକ୍ଷ ଚିରାଗ ପାସୱାନ ମଧ୍ୟ ସରକାରଙ୍କ ଏହି ନିଷ୍ପତ୍ତିକୁ ସମର୍ଥନ କରିଛନ୍ତି। ସେ କହିଛନ୍ତି, ‘ବର୍ତ୍ତମାନର ପ୍ରଧାନମନ୍ତ୍ରୀ ଏହାକୁ ଗମ୍ଭୀରତାର ସହ ନେଇଛନ୍ତି। ଯଦି ଏହାକୁ ଅଣାଯାଏ ତେବେ ଲୋକ ଜନଶକ୍ତି ପାର୍ଟି ଏହାକୁ ସମର୍ଥନ କରିବେ। ଏକ ଦେଶ ଏକ ନିର୍ବାଚନ କାର୍ଯ୍ୟକାରୀ କରାଯାଉ। କାର୍ଯ୍ୟକାରୀ ହେବା ପୂର୍ବରୁ ଆଲୋଚନା ହେବା ଆବଶ୍ୟକ।