ଭୁବନେଶ୍ୱର,୨୨ା୧୨(ଅନିଲ ଦାସ): ଏକ ଦେଶ ଏକ ନିର୍ବାଚନ(ୱାନ୍ ନେଶନ ୱାନ୍ ଇଲେକ୍ସନ) ପ୍ରସଙ୍ଗରେ ବିଜେଡିର ଆଭିମୁଖ୍ୟ ଅସ୍ପଷ୍ଟ ରହିଛି। ରାଜ୍ୟ ସଭାରେ ଏହି ବିଲ୍କୁ ଦଳ ସମର୍ଥନ କରିବ କି ବିରୋଧ କରିବ ସେ ନେଇ ବିଜେଡି ସଭାପତି ନବୀନ ପଟ୍ଟନାୟକ କୌଣସି ମତ ଦେଇ ନାହାନ୍ତି। ଅନ୍ୟପକ୍ଷରେ ଦଳର ବରିଷ୍ଠ ନେତା ତଥା ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ ନିକଟରେ ଶେଷ ହୋଇଥିବା ବିଧାନସଭାରେ ୱାନ୍ ନେଶନ ୱାନ୍ ଇଲେକ୍ସନ୍ ସଙ୍କଳ୍ପକୁ ବିରୋଧ କରିଥିଲେ। ପରେ ସୋସିଆଲ୍ ମିଡିଆରେ ନିଜ ଅଭିଭାଷଣକୁ ମଧ୍ୟ ପୋଷ୍ଟ କରିଥିଲେ। ତେବେ ରାଜ୍ୟ ସଭା ସଦସ୍ୟ ମାନସ ମଙ୍ଗରାଜଙ୍କ ସୋସିଆଲ୍ ମିଡିଆ ପୋଷ୍ଟକୁ ନେଇ ଦ୍ୱନ୍ଦ୍ୱ ଆହୁରି ବଢ଼ିଯାଇଛି; ଯେଉଁଥିରେ ୱାନ୍ ନେଶନ ୱାନ୍ ଇଲେକ୍ସନ୍ ବିଲ୍ ପାଇଁ ଗଠିତ ଯୁଗ୍ମ ସଂସଦୀୟ କମିଟିରେ ସ୍ଥାନ ପାଇ ସେ ଗର୍ବିତ ବୋଲି ଲେଖିଛନ୍ତି । ଅନ୍ୟପକ୍ଷରେ ବିଧାନସଭାରେ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି, ସଂସଦ ଏ ନେଇ ନିଷ୍ପତ୍ତି ନେବ ।
ସମ୍ବିଧାନକୁ ନେଇ ଯେଭଳି ବାକ୍ବିତଣ୍ଡା ହେଉଛି ତାହା ଗ୍ରହଣୀୟ ନୁହେଁ ବୋଲି ସେ କହିଛନ୍ତି।
ଭିନ୍ନମତ ଭିତରେ ନବୀନଙ୍କ ନୀରବତା ଦଳ ଭିତରେ ଦ୍ବନ୍ଦ୍ବକୁ ଆହୁରି ବଢ଼ାଇ ଦେଇଛି। ସରକାରରେ ଥିବାବେଳେ ବିଜେଡି ସମଦୂରତା କଥା କହି ଅନେକ ପ୍ରସଙ୍ଗରେ ଫାଇଦା ନେବାକୁ ଚେଷ୍ଟା କରୁଥିଲା। ମାତ୍ର ଏବେ ରାଜନୈତିକ ଦୃଶ୍ୟପଟ ବଦଳି ଯାଇଛି। ଗତ ଲୋକ ସଭା ନିର୍ବାଚନରେ ଦଳ ଗୋଟିଏ ଆସନ ପାଇବାକୁ ସକ୍ଷମ ହୋଇ ନ ଥିବାବେଳେ ଆଗାମୀ ରଣନୀତି ପୂର୍ବଭଳି ରହିବ କି ବଦଳିବ ସେ ନେଇ ମଧ୍ୟ ବିଜେଡିରେ ଦ୍ୱନ୍ଦ୍ୱ ସୃଷ୍ଟି ହୋଇଛି। ନିକଟରେ ନବୀନ ନିବାସରେ ହୋଇଥିବା ବିଜେଡି ପରାମର୍ଶ ଦାତା କମିଟି ବୈଠକରେ ବରିଷ୍ଠ ନେତାମାନେ ଜାତୀୟ ସ୍ତରରେ ଦଳର ଆଭିମୁଖ୍ୟ ଉପରେ ନିଷ୍ପତ୍ତି ନେବା ପାଇଁ ଏକ ପାର୍ଲାମେଣ୍ଟ କମିଟି ଗଠନ କରିବାକୁ ବିଜେଡି ସଭାପତିଙ୍କୁ ପ୍ରସ୍ତାବ ଦେଇଥିବା ଶୁଣବାକୁ ମିଳିଛି। ୱାନ୍ ନେଶନ ୱାନ୍ ଇଲେକ୍ସନ ବିଲ୍କୁ ନେଇ ଦଳର ଅସ୍ପଷ୍ଟ ଆଭିମୁଖ୍ୟ ଆଗକୁ ଦଳକୁ ଆହୁରି ଅଡୁଆରେ ପକାଇବା ନେଇ ରାଜନୈତିକ ସମୀକ୍ଷକ ମତ ଦେଉଛନ୍ତି।