କାଶୀପୁର,୧୫।୬: ରାୟଗଡା ଜିଲା କାଶିପୁର ବ୍ଲକ ଟିକିରି ଥାନା ଅନ୍ତର୍ଗତ ମଙ୍କଡ଼ଝୋଲା ଗ୍ରାମରେ ଆଜି ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଘଟଣାରେ ଉକ୍ତ ଗ୍ରାମର ଗୋଟିଏ ପରିବାର ୪ ଜଣ ସଦସ୍ୟ ବଜ୍ରପାତର ଶିକାର ହୋଇଛନ୍ତି। ଏଥିରେ ଜଣଙ୍କର ମୃତ୍ୟୁ ଘଟିଥିବାବେଳେ ୩ ଆହତ ହୋଇଛନ୍ତି। ଗାଁର ଆମରି ମାଝିଙ୍କର ପୁତ୍ର ଆକାଶ(୬)ଙ୍କର ଘଟଣା ସ୍ଥଳରେ ମୃତ୍ୟୁ ହୋଇଯାଇଥିବା ବେଳେ ଝିଅ ବୈଶାଳୀ ମାଝି (୧୩)ଗୁରୁତର ଅବସ୍ଥା ମେଡ଼ିକାଲରେ ଭର୍ତ୍ତି କରାଯାଇଛି। ସେହିପରି ଆମରି ଓ ତାଙ୍କ ସ୍ତ୍ରୀ ଜିରିମେ ମଧ୍ୟ ଘଟଣାର ଅନେକ ସମୟ ପର୍ଯ୍ୟନ୍ତ ଅଚେତ ହୋଇଯାଇଥିବାବେଳେ ବର୍ତ୍ତମାନ ଉଭୟଙ୍କ ସ୍ଥିତି ସାମାନ୍ୟ ଥିବା ଜଣାପଡିଛି।
ସୂଚନାଯୋଗ୍ୟ, ଆମରି ମାଝି ବଙ୍କାମ ଗ୍ରାମପଞ୍ଚାୟତର ମାଙ୍କଡ଼ଝୋଲା ଗ୍ରାମରେ ସପରିବାର ରୁହନ୍ତି। ଘର ଠାରୁ ଅଳ୍ପ ଦୂରରେ ତାଙ୍କର ଚାଷ ଜମି ରହିଛି। ପ୍ରତିଦିନ ଭଳି ଆଜି ଆମରି ତାଙ୍କ ସପରିବାର ଜମିକୁ ଯାଇଥିଲେ। ଦ୍ୱିପହର ସମୟରେ ଅଳ୍ପ ବର୍ଷା ସହିତ ଘଡଘଡି ଆରମ୍ଭ ହୋଇଯାଇଥିଲା। ବର୍ଷା ସମ୍ଭାବନା ଦେଖି ସପରିବାର ଘରକୁ ଫେରୁଥିବାବେଳେ ବାଟରେ ଥିବା ଏକ ଆମ୍ବ ଗଛ ମୂଳରେ ବର୍ଷା ଦାଉରୁ ରକ୍ଷା ପାଇବାକୁ ଆଶ୍ରୟ ନେଉଥିବାବେଳେ ହଠାତ୍ ବଜ୍ରପାତ ଘଟିଥିଲା। ଏଥିରେ ପରିବାର ସମସ୍ତ ୪ ଜଣ ସଦସ୍ୟ ଅଚେତ ହେଇଯାଇଥିଲେ। କିନ୍ତୁ କୌଣସି ପ୍ରକାରରେ ଆମରି ଓ ତାଙ୍କ ସ୍ତ୍ରୀ ଙ୍କର ଚେତା ଫେରିଲାବେଳେ ପୁଅ ଆକାଶ ଓ ଝିଅ ବୈଶାଳୀ ଚେତାଶୂନ୍ୟ ଥିବା ଦେଖିବାକୁ ପାଇଥିଲେ। ଆମରି କୌଣସି ପ୍ରକାର ଗାଁ ଲୋକଙ୍କୁ ଖବର ଦେଇଥିବାପରେ ଆକାଶ ଓ ବୈଶାଳୀଙ୍କୁ ଚେତାଶୂନ୍ୟ ଅବସ୍ଥାରେ ଗୋବର ଲେପନ କରାଯାଇଥିଲା। ଏଥିରେ ବୈଶାଳୀଙ୍କ ଚେତା ଫେରିଲା ଥିବାବେଳେ ଆକାଶଙ୍କ ମୃତ୍ୟୁ ହୋଇଥିଲା। ତୁରନ୍ତ ବୈଶାଳୀଙ୍କୁ ପ୍ରଥମେ ଟିକିରି ଉପ ସ୍ବାସ୍ଥ୍ୟକେନ୍ଦ୍ର ଏବଂ ପରେ ସମୟରେ କାଶୀପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା।