ଚିତ୍ରକୋଣ୍ଡା,୨୪।୮(ଡି.ଏନ୍.ଏ.): ମାଲକାନଗିରି ଜିଲା ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳରେ ଡଙ୍ଗାରୁ ନଦୀରେ ଖସିପଡ଼ି ଜଣଙ୍କର ମୃତ୍ୟୁ ଘଟିଛି। ମୃତକ ହେଲେ ବଡ଼ପଡ଼ା ପଞ୍ଚାୟତ ବାଇଲିଗୁମା ଗ୍ରାମର ଘେନୁ ପାଙ୍ଗି(୪୦)।
ସୂଚନାନୁଯାୟୀ, ଘେନୁ ଟଙ୍କା ଉଠାଇବାକୁ ନିଜ ଗ୍ରାମରୁ ଚିତ୍ରକୋଣ୍ଡା ବ୍ୟାଙ୍କ ଆସିଥିଲେ l କାମ ସାରି ସୋମବାର ଅପରାହ୍ନରେ ଜାନବାଇ କଲୋନୀଠାରୁ ଏକ ମାଛ ଧରା ଦେଶୀ ଡଙ୍ଗାରେ ନିଜ ଗ୍ରାମକୁ ସେ ଫେରୁଥିଲେ। ତାଙ୍କ ସାଙ୍ଗରେ ସ୍ତ୍ରୀ ତିଳତ୍ତମା ମଧ୍ୟ ଥିଲେ। ଘେନୁ ଅମାନିଆ ହୋଇ ଡଙ୍ଗାର ବାଡରେ ବସିଥିବା ବେଳେ ହଠାତ ତାଙ୍କ ମୁଣ୍ଡ ଘୁରାଇଥିଲା। ସେ ଭାରସାମ୍ୟ ହରାଇ ନଦୀ ଭିତରକୁ ଖସି ପଡିଥିଲେ। ସ୍ବାମୀ ନଦୀରେ ବୁଡିଯିବା ଦେଖି କାନ୍ଦି କାନ୍ଦି ବଞ୍ଚାଇବା ପାଇଁ ତିଳତ୍ତମା ପାଟି କରିଥିଲେ। ତେବେ ସେହି ବାଟଦେଇ ଯାଉଥିବା ଡ଼ଙ୍ଗା ଏବଂ ସ୍ଥାନୀୟ ଲୋକେ ମିଶି ତାକୁ ଉଦ୍ଧାର କରିବାକୁ ଚେଷ୍ଟା କରିଥିଲେ। ତାକୁ ଘୋଜାଖୋଜି କରି ଗଲକାଲି ଆଉ ପାଇ ନଥିଲେ l ମଙ୍ଗଳବାର ସକାଳଠାରୁ ଗ୍ରାମବାସୀ ଡ଼ଙ୍ଗା ଏବଂ ନଦୀର ଦୁଇ କୂଳରେ ଖୋଜାଖୋଜି କରିଥିଲେ। ଶେଷରେ ତାଙ୍କୁ ଉଦ୍ଧାର କରିଯାଇ ଜାନବାଇ ମେଡିକାଲ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପାପରମେଟେଲା ଥାନା ଅଧିକାରୀ ଚନ୍ଦ୍ରକାନ୍ତ ତାଣ୍ଡି ଖବର ପାଇ ଏକ ମାମଲା ରୁଜୁ କରି ଶବ ବ୍ୟବଚ୍ଛେଦ ପାଇଁ ପଠାଇ ଥିବାବେଳେ ଚିତ୍ରକୋଣ୍ଡା ତହସିଲଦାର ଟି. ପଦ୍ମନାଭ ଦୋରାଙ୍କୁ ଏ ସମ୍ପର୍କରେ ପଚାରି ବାରୁ ସେ ଅବଗତ ଥିବା ପ୍ରକାଶ କରିଛନ୍ତି । ସମ୍ପୂର୍ଣ୍ଣ ତଥ୍ୟ ଘଟଣାସ୍ଥଳରୁ ବଡ଼ପଡ଼ା ରାଜସ୍ବ ନିରୀକ୍ଷକ ଫେରିବା ପରେ ପୁରା ବିବରଣୀ ଦେଇପାରିବେ ବୋଲି କହିଛନ୍ତି।