ବଡ଼ମ୍ବା,୩।୮(ମାୟାଧର ମଲ୍ଲିକ )ମହାନଦୀ ମଧ୍ୟଭାଗରେ ଥିବା କୁଦରେ ବୁଧବାର ୨ଜଣ ଗାଈ ଚରାଳିଙ୍କ ସହ ୫୦ରୁ ଊର୍ଦ୍ଧ୍ୱ ଗାଈ ଓ ମେଣ୍ଢା ଫସି ରହି ଯାଇଥିଲେ। ଗାଈ, ମେଣ୍ଢା ଚରାଇବାକୁ ଯାଇଥିବା ବେଳେ ମହାନଦୀର ବନ୍ୟା ଜଳ ବୃଦ୍ଧି ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଛି। ସେମାନଙ୍କ ମଧ୍ୟରୁ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଜଣେ ନିଖୋଜ ଥିବା ଜଣାପଡ଼ିଛି।
କଟକ ଜିଲା ବଡ଼ମ୍ବା ବ୍ଲକ ଅନ୍ତର୍ଗତ ଶଙ୍ଖାମେରୀ ଗ୍ରାମ ନିକଟସ୍ଥ ମହାନଦୀ ମଧ୍ୟ ଭାଗରେ ଥିବା କୁଦକୁ ପ୍ରତିଦିନ ପରି ବୁଧବାର ଶଙ୍ଖାମେରୀ ପଞ୍ଚାୟତର ବସନ୍ତ ବେହେରା ଓ ଅମିନ ନାଏକ ଗାଈ ଓ ମେଣ୍ଢା ଚରାଇବାକୁ ଯାଇଥିଲେ। ଅପରାହ୍ନରେ ମହାନଦୀରେ ବନ୍ୟାଜଳ ଆସି କୁଦ ଚତୁଃପାର୍ଶ୍ୱରେ ଘେରି ଯାଇଥିଲା। ତେବେ ସେମାନେ ଠିକ୍ ସମୟରେ ନ ଫେରିବାରୁ ଅମିନଙ୍କ ପୁଅ ରାକେଶ ବନ୍ୟାଜଳରେ ପହଁରି ସେଠାରେ ପହଞ୍ଚତ୍ଥିଲେ। ବସନ୍ତକୁ ଦେଖିବାକୁ ପାଇଥିବା ବେଳେ ତାଙ୍କ ବାପାଙ୍କୁ ନ ପାଇ ଫେରି ଆସି ଗଁା ଲୋକଙ୍କୁ ଜଣାଇଥିଲେ। ଏ ସମ୍ପର୍କରେ ବଡ଼ମ୍ବା ଅଗ୍ନିଶମ ଦଳ ଖବରପାଇ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ବସନ୍ତ ଓ ୨୦ରୁ ଊର୍ଦ୍ଧ୍ୱ ମେଣ୍ଢାକୁ ଉଦ୍ଧାର କରାଯାଇଥିବା ବେଳେ ଅମିନଙ୍କ କୌଣସି ସନ୍ଧାନ ପାଇନାହାନ୍ତି। ଅନ୍ୟପକ୍ଷରେ ୨ଟି ମେଣ୍ଢାଙ୍କ ମୃତ୍ୟୁ ଘଟିଛି। ଏ ସମ୍ପର୍କରେ ଖବରପାଇ ବଡ଼ମ୍ବା ବିଧାୟକ ଦେବୀ ପ୍ରସାଦ ମିଶ୍ର, କଟକ ଜିଲାପାଳ ଓ ଜିଲା ମୁଖ୍ୟ ଅଗ୍ନିଶମ ଅଧିକାରୀଙ୍କ ସହିତ ଯୋଗାଯୋଗ କରି ଅମିନଙ୍କୁ ଖୋଜିବା ଲାଗି କହିଛନ୍ତି। ସେହିଭଳି ବଡ଼ମ୍ବା ପଞ୍ଚାୟତ ସମିତି ଅଧ୍ୟକ୍ଷ ରଘୁପତି ମହାନ୍ତି, ଜିଲା ପରିଷଦ ସଭ୍ୟ ରବୀନ୍ଦ୍ର ସାହୁ, ସାଂସଦ ପ୍ରତିନିଧି ସଦାନନ୍ଦ ସ୍ବାଇଁଙ୍କ ସମେତ ସରପଞ୍ଚଙ୍କ ପ୍ରତିନିଧି ମାନସ ମୁଦୁଲି, ସମିତିସଭ୍ୟ ପ୍ରତିନିଧି ଦିଲୀପ ପଙ୍ଗାରୀ ଓ ଗ୍ରାମବାସୀ ଉପସ୍ଥିତ ରହି ଅଗ୍ନିଶମ ବିଭାଗ କର୍ମଚାରୀଙ୍କୁ ସହାୟତା କରୁଛନ୍ତି। କଳାପଥର ଅଗ୍ନିଶମ ଦଳ ପହଞ୍ଚତ୍ ଉଦ୍ଧାର କାର୍ଯ୍ୟ ଜାରି ରଖିଛି ।