ଭୋଗରାଇ, ୨୫ା୧୧(ପ୍ରଦୀପ ଦାସ): ମୋ କଥାରେ ରାଜି ହୋଇଯା। ରାଣୀ ହୋଇ ରହିବୁ। ନଚେତ୍ ବନ୍ଧୁକ ମୁନରେ ଜୀବନ ଦେବୁ। ଏଭଳି କଥା କହି ଜଣେ ଯୁବକ ଯୁକ୍ତ ୨ଶ୍ରେଣୀରେ ପଢୁଥିବା ଛାତ୍ରୀଙ୍କୁ ଏକତରଫା ପ୍ରେମ କରି ବନ୍ଧୁକ ଦେଖାଇ ଛାତ୍ରୀଙ୍କୁ ଭୟଭୀତ କରୁଥିବା ବେଳେ କଲେଜ ଛାତ୍ର ଓ ଅଧ୍ୟାପକମାନେ ମିଳିତ ହୋଇ ଯୁବକକୁ କୌଶଳକ୍ରମେ କାବୁକରି ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ଯୁବକଙ୍କୁ ସେଠାରୁ ଗିରଫ କରିବା ସହ ବନ୍ଧୁକ ଓ ୩ଟି ଅଫୁଟା ଜୀବନ୍ତ ଗୁଳି ଉଦ୍ଧାର କରାଯାଇଛି। ଶିକ୍ଷାନୁଷ୍ଠାନରେ ପ୍ରଥମଥର ଏଭଳି ଅଭାବନୀୟ ଘଟଣା ସମଗ୍ର ଭୋଗରାଇ ଅଞ୍ଚଳରେ ଆଲୋଡନ ସୃଷ୍ଟି କରିଛି।
ବାଲେଶ୍ୱର ଜିଲା ଭୋଗରାଇ ବ୍ଲକ କମର୍ଦ୍ଦାସ୍ଥିତ ସୁରେନ୍ଦ୍ର ନାଥ ଉଚ୍ଚ ମାଧ୍ୟମିକ ବିଦ୍ୟାଳୟରେ ଯୁକ୍ତ ୨ରେ ପଢୁଥିବା ଛାତ୍ରୀଜଣକ ମହାବିଦ୍ୟାଳୟରେ ଶୁକ୍ରବାର ସମନ୍ବିତ ଯୁବ ବିକାଶ କାର୍ଯ୍ୟକ୍ରମରେ ଖେଳପଡିଆରେ ଥିବା ବେଳେ ମହାଗବ ଗ୍ରାମର ବ୍ରଜଗୋପାଳ ଦାସ(୨୬)ବନ୍ଧୁକ ଲୁଚାଇ କଲେଜରେ ବାଇକ ଧରି ପ୍ରବେଶ କରିଥିଲେ। ସେ ଛାତ୍ରୀଙ୍କୁ ଅନୁସରଣ କରି ତାଙ୍କ ପାଖକୁ ଯାଇ ନାନା ଧମକଚମକ ଦେଇଥିଲେ।
ଛାତ୍ରୀଜଣକ କିଛି କହିବାରୁ ବ୍ରଜଗୋପାଳ ଉତ୍ତେଜିତ ହୋଇ ତାଙ୍କ ପ୍ୟାଣ୍ଟ ପକେଟରୁ ଏକ ବନ୍ଧୁକ ବାହାର କରି ଛାତ୍ରୀଙ୍କୁ ଅପହରଣ କରିବାକୁ ଉଦ୍ୟମ କରୁଥିବା ବେଳେ ଛାତ୍ର ଓ ଅଧ୍ୟାପକମାନେ ଉକ୍ତ ଯୁବକକୁ କାବୁ କରି ପୋଲିସ ଜିମା ଦେଇଥିଲେ। କମର୍ଦ୍ଦା ପୋଲିସ ପହଞ୍ଚି ଯୁବକଙ୍କୁ ଗିରଫ କରିବା ସହିତ ୩ଟି ଜୀବନ୍ତ ଅଫୁଟା ଗୁଳି ଜବତ କରିଛି। ପୋଲିସ କମର୍ଦ୍ଦା କଲେଜ ଅଧ୍ୟକ୍ଷଙ୍କ ଅଭିଯୋଗ ଆଧାରରେ ଯୁବକଙ୍କ ବିରୋଧରେ ବିଭିନ୍ନ ଦଫାରେ ମାମଲା (ନଂ.୧୪୧/୨୩ ରୁଜୁ କରି କୋର୍ଟଚାଲାଣ କରିଛି। ଯୁବକଙ୍କ ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ ହଜାତକୁ ପଠାଇ ଦିଆଯାଇଛି।