ବ୍ରହ୍ମପୁର,୧୭।୭(ସ୍ମୃତି ରଞ୍ଜନ ମହାଲିକ): ବର୍ଷା ଦିନ ଆରମ୍ଭରୁ ସହରବାସୀ ବିଭିନ୍ନ ସଂକ୍ରମିତ ରୋଗରେ ପଡ଼ୁଛନ୍ତି। ବିଶେଷକରି ଡେଙ୍ଗୁ ରୋଗୀଙ୍କ ସଂଖ୍ୟା ବଢ଼ୁଛି। ମ୍ୟାଲେରିଆ ଓ ବାତଜ୍ୱର ମଧ୍ୟ ହେଉଛି। ମଶା ବଂଶ ନିପାତ ପାଇଁ ବ୍ରହ୍ମପୁର ମହାନଗର ନିଗମ (ବିଇଏମସି) ପକ୍ଷରୁ ନାନା ସଚେତନତା ମୂଳକ ପଦକ୍ଷେପ ଗ୍ରହଣ କରାଯାଉଛି। କିନ୍ତୁ ତାହା ସଫଳ ହେଉ ନାହିଁ। ନିଗମ ପକ୍ଷରୁ ବର୍ତ୍ତମାନ ଟିଫା ମେଶିନ ସାହାର୍ଯ୍ୟରେ ୱାର୍ଡ ଗୁଡିକରେ ମଶାମରା ଧୂଆଁ ଛଡା ଯାଉଛି। ନିଗମର ସାନିଟେଶନ ବିଭାଗ ପକ୍ଷରୁ ପ୍ରତିଦିନ ୨ଟି ୱାର୍ଡରେ ଟିଫା ମେଶିନ ବୁଲିବା ପାଇଁ ସ୍ଥିର କରାଯାଇଛି। ଏଭଳି ଭାବେ ଚଳିତ ମାସ ଶେଷ ସୁଦ୍ଧା ୪୨ଟି ୱାର୍ଡରେ ଟିଫା ବୁଲିବା ନେଇ ଲକ୍ଷ୍ୟ ରଖାଯାଇଛି। ଯାହାଦ୍ୱାରା ମଶା ବଂଶ ରୋକିବାରେ ସାମାନ୍ୟ ସଫଳତା ଆଣିବ ବୋଲି ନିଗମ ଆଶା ପ୍ରକଟ କରିଛି। ଗତ ବର୍ଷ ମଧ୍ୟ ନିଗମ ପକ୍ଷରୁ ଏଭଳି ପଦକ୍ଷେପ ଗ୍ରହଣ କରାଯାଇଥିଲା। କିନ୍ତୁ ସମସ୍ତ ୱାର୍ଡକୁ ଟିଫା ମେଶିନ ବୁଲିପାରି ନ ଥିଲା। ଫଳରେ ନିଗମର ଯୋଜନା ଫସର ପାଲଟିଥିଲା। ଏହାର ମୂଳ କାରଣ ହେଉଛି ଟିଫା ମେଶିନର ଅଭାବ। ବିଇଏମସି ନିକଟରେ ବର୍ତ୍ତମାନ ଗୋଟିଏ ଟିଫା ମେଶିନ ରହିଛି। ତାହା ବି ପୁଣି ଭଙ୍ଗା ଓ ଜରାଜୀର୍ଣ୍ଣ ଅବସ୍ଥାରେ ରହିଛି। ଏହାକୁ ଏକ ଟ୍ରାକ୍ଟର ସାହାର୍ଯ୍ୟରେ ସଂଯୋଗ କରାଯାଇ ୱାର୍ଡ ଗୁଡିକୁ ମଶା ଧୂଅଁା ଛଡାଯାଉଛି। ଏହି ମେଶିନରେ ମଶା ମରା ତେଲ ଓ ଡିଜେଲ ମିଶାଯାଉଛି।
ନିୟମାନୁଯାୟୀ, ବର୍ଷା ଆରମ୍ଭରୁ ଓ ପରେ ଟିଫା ମେସିନ ବୁଲାଇବାର ନିୟମ ରହିଛି। କିନ୍ତୁ ବିଇଏମସି ପକ୍ଷରୁ ଉକ୍ତ ନିୟମକୁ ପାଳନ କରାଯାଉ ନାହିଁ। ଗୋଟିଏ ଟିଫା ମେସିନ ଥିବା କାରଣରୁ ଏହା ସଫଳ ହୋଇପାରୁ ନ ଥିବା ବିଭାଗ ପକ୍ଷରୁ କୁହାଯାଉଛି। ମଶା ବଂଶ ରୋକିବାର ସଫଳ ରୂପାୟନ ପାଇଁ ଗତ ୨ ବର୍ଷ ତଳେ ସାନିଟେସନ ବିଭାଗ ପକ୍ଷରୁ ୪୦ଟି ୱାର୍ଡ ନିମନ୍ତେ ୪୦ଟି ହ୍ୟାଣ୍ଡ ଫଗିଂ ମେସିନ କିଣାଯାଇଥିଲା। ପ୍ରତି ୱାର୍ଡର ଏସଆଇ ଓ ଜମାଦାରଙ୍କୁ ଦାୟିତ୍ୱ ପ୍ରଦାନ କରାଯାଥିଲା। ଏହି ୨ ଅଧିକାରୀଙ୍କ ତତ୍ୱବଧାନରେ ନିୟୋଜିତ କର୍ମଚାରୀଙ୍କ ଦ୍ୱାରା ଡ୍ରେନ ଗୁଡିକରେ ଫଗିଂ କରାଯାଉଥିଲା। ଯେଉଁଥିରେ ମାଲାଥିନ ଓ ଡିଜେଲ ମିଶୁଥିଲା। କିନ୍ତୁ ଏଗୁଡିକର ଯାନ୍ତ୍ରିକ ତ୍ରୁଟି ଫଳରେ ଫଗିଂ ପ୍ରକିୟା ସମ୍ପୂର୍ଣ୍ଣ ରୂପେ ବନ୍ଦ ହୋଇଗଲା। ଏହାର ମରାମତି ପାଇଁ ମଧ୍ୟ କାୈଣସି ପଦକ୍ଷେପ ଗ୍ରହଣ କରାଗଲା ନାହିଁ। ସହରରେ ୱାର୍ଡ ସଂଖ୍ୟା ୪୨କୁ ବୃଦ୍ଧି ପାଇଛି। ହେଲେ ସହରବାସୀଙ୍କୁ ଉତ୍ତମ ବାତାବରଣ ଓ ମଶା କାମୁଡା ଦାଉରୁ ରକ୍ଷା ପାଇଁ ସୁପଦକ୍ଷେପ ଗ୍ରହଣ କରାଯାଇ ନାହିଁ। ୪୨ଟି ୱାର୍ଡକୁ ଗୋଟିଏ ଟିଫା ମେଶିନ ମାଧ୍ୟମରେ କାମଚଳା ନୀତି ଜାରି ରହିଥିବା ଅଭିଯୋଗ ହୋଇଛି। ଏ ନେଇ ଡେପୁଟି କମିଶନର ଆଶୀର୍ବାଦ ପରିଡାଙ୍କୁ ପଚାରିବାରୁ ସେ କହିଛନ୍ତି ଯେ, ୬ଟି ହ୍ୟାଣ୍ଡ ଫଗିଂ ମେଶିନ ଓ ଆଉ ଗୋଟିଏ ଟିଫା ମେଶିନ କିଣିବା ପାଇଁ ନିଷ୍ପତ୍ତି ହୋଇଛି। ଏହା କାଉନସିଲ ବୈଠକରେ ପାରିତ ହେବା ପରେ କିଣାଯିବ ବୋଲି ସେ କହିଛନ୍ତି।