ସିମ୍ଲା, ୨୩।୦୮: ଆମ ଦେଶରେ ଏମିତି ଏକ ଗାଁ ରହିଛି ଯେଉଁଠି ପ୍ରତି ପରିବାର ପ୍ରତିବର୍ଷ ୭୫ ଲକ୍ଷ ଟଙ୍କାରୁ ଅଧିକ ଟଙ୍କା ରୋଜଗାର କରନ୍ତି । ହିମାଚଳ ପ୍ରଦେଶରେ ଏହି ଗ୍ରାମ ରହିଛି । ଏହି ଗାଁକୁ ହିମାଚଳର ସବୁଠାରୁ ଧନୀ ଗାଁ ବୋଲି କୁହାଯାଉଛି । ଏହି ଗାଁର ନାମ ମଡ଼ାଭାଗ । ମଡାଭାଗ ହିମାଚଳ ପ୍ରଦେଶର ଶିମଲା ଜିଲାର ଚାଉପାଲ ତହସିଲ ଅଧୀନରେ ରହିଛି । ମଡାଭାଗ ଶିମଲା ସହରଠାରୁ ପ୍ରାୟ ୮୩ କିଲୋମିଟର ଦୂରରେ ଅବସ୍ଥିତ। ଏହି ଗାଁର ପ୍ରତ୍ୟେକ ପରିବାର ସେଓ ଚାଷ ଉପରେ ର୍ନିଭରଶୀଳ ଏବଂ ୧୦୦ ବର୍ଷ ପୁରୁଣା ରୟାଲ କିସମର ସେଓ ଗଛ ଏଠି ଦେଖାଯାଏ ।
ମଡାଭାଗ ପଞ୍ଚାୟତ ମୁଖ୍ୟ ପ୍ରେମ ଡୋଗ୍ରା କହିଛନ୍ତି ଯେ ତାଙ୍କ ପଞ୍ଚାୟତରେ ୭ ଟି ୱାର୍ଡ ଅଛି । ଯେଉଁଥିରେ ୪୮୦ ରୁ ଅଧିକ ପରିବାର ବାସ କରନ୍ତି। ଏଠାରେ ସମସ୍ତେ ନିଜ ଆୟ ପାଇଁ ସେଓ ବଗିଚା ଉପରେ ର୍ନିଭରଶୀଳ ଏବଂ ଏଠାରେ ଥିବା ପ୍ରତ୍ୟେକ ପରିବାର ସେଓ ବିକ୍ରି କରି ପ୍ରତିବର୍ଷ ୭୫ ଲକ୍ଷରୁ ଅଧିକ ରୋଜଗାର କରନ୍ତି ।
ପ୍ରେମ ଡୋଗ୍ରା କହିଛନ୍ତି ଯେ ଏହି ଅଞ୍ଚଳର ରୟାଲ କିସମର ବିଭିନ୍ନ ପ୍ରକାରର ସେଓ ଏହାର ସ଼୍ବାଦ ଏବଂ ଉତ୍କୃଷ୍ଟ ଫଳ ପାଇଁ ସାରା ବିଶ୍ୱରେ ପ୍ରସିଦ୍ଧ । ଆଜି ବି ଏହି ଗାଁରେ ୧୦୦ ବର୍ଷ ପୁରୁଣା ରୟାଲ ସେଓ ଗଛ ରହିଛି । ରୟାଲ ବ୍ୟତୀତ ଏଠାରେ ୫୦ରୁ ଅଧିକ କିସମର ସେଓ ବୃହତ ପରିମାଣରେ ଉତ୍ପାଦିତ ହୁଏ ।