କେନ୍ଦୁଝର,୧୭ା୧୨(ସ୍ବ.ପ୍ର.): କେନ୍ଦୁଝର ସଦର ରେଞ୍ଜ ଅଞ୍ଚଳରେ କିଛି ଦିନ ହେଲା ଏକ ଗୋଠଛଡ଼ା ଦନ୍ତା ଉପଦ୍ରବ କରୁଛି। ଦୁଇ ଦିନରେ ସଦର ରେଞ୍ଜର ଦୁଇଟି ସ୍ଥାନରେ ଆକ୍ରମଣ କରି ଜଣକୁ ମାରିଦେବା ସହ ଅନ୍ୟ ଜଣଙ୍କୁ ଆହତ କରିଦେଇଛି। ଫଳରେ ଏହାକୁ ନେଇ ଉକ୍ତ ଅଞ୍ଚଳବାସୀଙ୍କ ମଧ୍ୟରେ ଭୟର ବାତାବରଣ ଖେଳିଯାଇଛି। ଶନିବାର ଅପରାହ୍ନରେ ସଦର ରେଞ୍ଜ ମଇଦାନକେଲ ନିକଟରେ ଦନ୍ତା ଆକ୍ରମଣରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ତାଙ୍କ ନାମ ବ୍ରଜକିଶୋର ବେହେରା (୫୮) ଓ ଘର ତୁରୁମୁଙ୍ଗା ଥାନା ଅନ୍ତର୍ଗତ ଜାମନାଳିଆ ଗ୍ରାମରେ ବୋଲି ଜଣାପଡ଼ିଛି ା ସେ ସମ୍ପର୍କୀୟଙ୍କ ଘରୁ ନିଜ ଗ୍ରାମକୁ ଫେରୁଥିବା ବେଳେ ହାତୀ ହାବୁଡ଼ରେ ପଡ଼ିଯାଇଥିଲେ। ହାତୀଟି ତାଙ୍କୁ ଦଳି ଦେଇ ଗୁରୁତର କରି ଛାଡ଼ି ପଳାଇବା ପରେ ବନ ବିଭାଗ କର୍ମଚାରୀ ଉଦ୍ଧାର କରି ଜିଲା ମୁଖ୍ୟ ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ସେହିପରି ଶୁକ୍ରବାର ହରିଚନ୍ଦନପୁର ଥାନା ଅନ୍ତର୍ଗତ ଜଂଘିରା ନିକଟରେ ଲତା ଜୁଆଙ୍ଗ ନାମକ ଜଣେ ବୃଦ୍ଧାଙ୍କୁ ଏହି ଦନ୍ତା ଆକ୍ରମଣ କରି ଆହତ କରିଦେଇଥିଲା। ବନ ବିଭାଗ ଉଦ୍ଧାର କରି ଜିଲା ମୁଖ୍ୟ ଡାକ୍ତରଖାନାକୁ ଆଣିଥିଲେ। ତାଙ୍କ ଅବସ୍ଥା ଭଲ ରହିଥିବା ଜଣାପଡ଼ିଛି। ଏନେଇ ସଦର ରେଞ୍ଜ ଅଧିକାରୀ ବିଜୟ କୁମାର ମହାନ୍ତ କହିଛନ୍ତି, ହାତୀ ଦେଖୁଥିବା ବେଳେ ହଠାତ୍ ଆକ୍ରମଣ କରିବାରୁ ଧାଇଁ ଯାଇ ନ ପାରିବାରୁ ହାତୀ ହାବୁଡ଼ରେ ପଡ଼ିଯାଇଥିଲେ। ବନ ବିଭାଗ ନିୟମାନୁଯାୟୀ, ତାଙ୍କୁ ଅନୁକମ୍ପାମୂଳକ କ୍ଷତିପୂରଣ ଦିଆଯିବ। ଅନ୍ୟପକ୍ଷରେ ଆଜି କେନ୍ଦୁଝର ବନଖଣ୍ଡରେ ସମୁଦାୟ ୧୭୯ଟି ହାତୀ ଥିବା ବେଳେ ସଦର ରେଞ୍ଜରେ ଏହି ଗୋଠଛଡ଼ା ଏକୁଟିଆ ହାତୀ ବୁଲୁଛି ା ହାତୀମାନଙ୍କ ଚଳପ୍ରଚଳ ଓ ଯାତାୟାତକୁ ନୀରିକ୍ଷଣ କରାଯାଇ ଲୋକଙ୍କୁ ମେସେଜ ଦେବା ସହ ମାଇକ୍ରେ ସଚେତନ କରିବା ସହ ସତର୍କ କରାଯାଉଛି। ତଥାପି ଏପରି ଅଘଟଣ ଘଟୁଛି। ଲୋକମାନେ ଅଧିକରୁ ଅଧିକ ସଚେତନ ହେବା ସହ ସହଯୋଗ କରିବା ଜରୁରୀ ବୋଲି ଡିଏଫ୍ଓ ଏଚ୍.ଡି.ଧନରାଜ କହିଛନ୍ତି।
