ବ୍ରହ୍ମପୁର ଅଫିସ,୨୦।୬: ଓଡ଼ିଶା ସେଲ୍ସ ରିପ୍ରେଜେଣ୍ଟିଭ ୟୁନିୟନ ପକ୍ଷରୁ ବିଭିନ୍ନ ଦାବିକୁ ନେଇ ରବିବାର ବ୍ରହ୍ମପୁର ସହରରେ ଏକ ବାଇକ୍ ଶୋଭାଯାତ୍ରା ହୋଇଥିଲା। ଏଥିରେ ଶହୀଦ ଲକ୍ଷ୍ମଣ ନାୟକ କମ୍ୟୁନିଟି ହଲ୍ଠାରୁ ବାହାରି ପୁରୁଣା ବସ୍ଷ୍ଟାଣ୍ଡଠାରେ ଏକ ପଥପ୍ରାନ୍ତ ସଭା ଆୟୋଜିତ ହୋଇଥିଲା। ଏଥିରେ ସଂଘର ଜିଲା ସଭାପତି ଲକ୍ଷ୍ମଣ ନାୟକ ସଭାପତିତ୍ୱ କରିଥିଲେ। ସଂଘ ସାଧାରଣ ସମ୍ପାଦକ ସତ୍ୟବ୍ରତ ମହାପାତ୍ର ବିଭିନ୍ନ ଦାବି ଉପରେ ଆଲୋଚନା କରିଥିଲେ। ଦାବିଗୁଡିକ ମଧ୍ୟରେ ଔଷଧର ମୂଲ୍ୟ ବୃଦ୍ଧି ରୋକ୍ ଲଗାଇବା ପାଇଁ ପ୍ରଚଳିତ ବଜାର ଦ୍ୱାରା ନିୟନ୍ତ୍ରିତ ବ୍ୟବସ୍ଥାକୁ ରଦ୍ଦ କରି ଉପତ୍ାଦନଭିତ୍ତିକ ଖର୍ଚ୍ଚ ଅନୁଯାୟୀ ଔଷଧର ସର୍ବାଧିକ ବିକ୍ରୟ ମୂଲ୍ୟ ସ୍ଥିର କରିବା, ସୁଲଭ ମୂଲ୍ୟରେ ଉତ୍ତମ ମାନର ଔଷଧ ପ୍ରସ୍ତୁତି କରିବା କ୍ଷମତା ଥିବା ସମସ୍ତ ସରକାରୀ ଔଷଧ ପ୍ରତିଷ୍ଠାନଗୁଡିକର ପୁନରୁଦ୍ଧାର, ଦୁର୍ନୀତିଗ୍ରସ୍ତ କର୍ପୋରେଟ ମାଲିକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ, ଅନ୍ଲାଇନ ମାଧ୍ୟମରେ ହେଉଥିବା ସମସ୍ତ ଔଷଧ ବିକ୍ରି ପ୍ରକ୍ରିୟାକୁ ସମ୍ପୂର୍ଣ୍ଣ ନିଷେଧ, ଔଷଧ ଉପରେ ପ୍ରଚଳିତ ସମସ୍ତ ଟିକସ ବ୍ୟବସ୍ଥାକୁ ହଟାଇ ୦% ଜିଏସ୍ଟି ଲାଗୁ ଓ ସ୍ବାସ୍ଥ୍ୟ ସେବାର ଅଧିକ ଉନ୍ନତି ନିମନ୍ତେ ଜିଡିପିର ୫% ହାରରେ ଅର୍ଥ ମଞ୍ଜୁର କରିବା ପାଇଁ ଦାବି ହୋଇଥିଲା। ଅନ୍ୟମାନଙ୍କ ମଧ୍ୟରେ ସଂଘ ରାଜ୍ୟ କମିଟି ସଭ୍ୟ ବି.ଈଶ୍ୱର ରାଓଙ୍କ ସମେତ ଯୁଗ୍ମ ସାଧାରଣ ସମ୍ପାଦକ ନୃସିଂହ ପ୍ରସାଦ ବ୍ରହ୍ମା, ଭାସ୍କର ମିଶ୍ର ଓ ବରିଷ୍ଠ ସଭ୍ୟ ମଧୁସୂଦନ ବେହେରା ନିଜର ବକ୍ତବ୍ୟ ପ୍ରଦାନ କରିଥିଲେ। ସିଆଇଟିୟୁ ପକ୍ଷରୁ ଯୁଧିଷ୍ଠିର ବେହେରା, ବିଡବ୍ଲ୍ୟୁଇସିସିର ପ୍ରତାପ ଚାୈଧୁରୀଙ୍କ ସମେତ ବିଭିନ୍ନ ସଂଗଠନର ନେତୃ୍ବୃନ୍ଦ ଉପସ୍ଥିତ ଥିଲେ।
