ଭୁବନେଶ୍ୱର,୧୩ା୧୨: ଓଡ଼ିଶାରେ କାୟା ବିସ୍ତାର କରି ଚାଲିଛନ୍ତି ନିଶା ବେପାରି। ପୋଲିସ ଏବଂ ଏସଟିଏଫ ଚାଲାଣକାରୀଙ୍କୁ ଧରି ବାହା ବାହା ନେଉଥିଲା ବେଳେ କିଙ୍ଗପିନଙ୍କ ପାଖରେ ପହଞ୍ଚି ପାରୁ ନାହାନ୍ତି। ସ୍ଥିତି ଏପରି ହେଲାଣି ଯେ, ରାଜଧାନୀ ଭୁବନେଶ୍ୱରରେ ଅନଲାଇନରେ ଅର୍ଡର କଲେ ଏବେ ଘରେ ଆସି ଡ୍ରଗ୍ସ ପହଞ୍ଚୁଛି। ଫୁଡ୍ ଡେଲିଭରି ସଂସ୍ଥାକୁ ବ୍ୟବହାର କରି ଏହି କାରବାର ଚାଲିଛି।
ଏନେଇ ନିଶା ମୁକ୍ତ ଭାରତ ଅଭିଯାନ କମିଟିର ପ୍ରଥମ ରାଜ୍ୟସ୍ତରୀୟ ବୈଠକରେ ଉଦବେଗ ପ୍ରକାଶ କରିଛନ୍ତି ପୋଲିସ୍ କମିଶନର ସୌମେନ୍ଦ୍ର ପ୍ରିୟଦର୍ଶୀ। ସେ କହିଛନ୍ତି, ”ପୂର୍ବରୁ କେବଳ ସହରରେ ଡ୍ରଗ୍ସ ମିଳୁଥିଲା, ଏବେ ଉପାନ୍ତକୁ ବ୍ୟାପିଲାଣି। ଅନଲାଇନ ଫୁଡ୍ ଡେଲିଭରି ସଂସ୍ଥାକୁ ବ୍ୟବହାର କରି ଏହି କାରବାର ଚାଲିଥିବା ବେଳେ ଖାଦ୍ୟ ନାଁରେ ଡେଲିଭରି ପ୍ୟାକେଟରେ କ’ଣ ଯାଉଛି, ଜାଣିବା ମୁସ୍କିଲ ହେଉଛି। ଅନ୍ୟପଟେ ଡେଲିଭରି ଦେଉଥିବା ସଂସ୍ଥା, କଣ ଯାଉଛି ସେ ବିଷୟରେ ସେମାନେ ପଚାରି ପାରିବେନି। ପୂର୍ବରୁ କେବଳ ଇଞ୍ଜିନିୟରିଂ ପିଲା ଡ୍ରଗ୍ସ ନେଉଥିଲେ ଏବେ ଅନ୍ୟ ସବୁ କଲେଜକୁ ଏହା ବ୍ୟାପିଲାଣି। ତେବେ କମିସନରେଟ ପୋଲିସ ପକ୍ଷରୁ ଏନ୍ଫୋର୍ସମେଣ୍ଟ ବଢିଥିବାରୁ ପ୍ରତି ବର୍ଷ ସିଜର ବଢୁଥିବା କମିସନର କହିଛନ୍ତି।”