ଭୁବନେଶ୍ୱର,୧୮।୫(ବ୍ୟୁରୋ): କୋଭିଡ୍ ସଂକ୍ରମଣକୁ ଦୃଷ୍ଟିରେ ରଖି କମିଶନରେଟ୍ ପୋଲିସ ପକ୍ଷରୁ ଲୋକଙ୍କୁ ଯଥା ସମ୍ଭବ ଥାନାକୁ ନ ଆସିବା ପାଇଁ ପରାମର୍ଶ ଦିଆଯାଉଛି। ଏଥିପାଇଁ ଅଭିଯୋଗଠାରୁ ଆରମ୍ଭ କରି ବିଭିନ୍ନ କାର୍ଯ୍ୟ ଓ ଜରୁରୀ କାଳିନ ସେବା ପାଇଁ କମିଶନରେଟ୍ ପୋଲିସ ପକ୍ଷରୁ ଅନ୍ଲାଇନ୍ ସେବା ପ୍ରଦାନ କରାଯାଉଛି। ଏବେ ଆଉଏକ ପଦକ୍ଷେପ ନିିଆଯାଇଛି। କଟକ ଓ ଭୁବନେଶ୍ୱର ଦ୍ୱୈତନଗରୀରେ ବିବାହ ଏବଂ ଅନ୍ତ୍ୟେଷ୍ଟି କ୍ରିୟା ପାଇଁ ଅନ୍ଲାଇନ୍ ଅନୁମତିର ବ୍ୟବସ୍ଥା ହୋଇଛି। ଏଥିପାଇଁ ୭୨ ଘଣ୍ଟା ପୂର୍ବରୁ ଓ୍ବେବ୍ସାଇଟ୍ www.bhubaneswarcuttackpolice.gov.inରେ ଆବେଦନ କରିବାକୁ ହେବ। ସ୍ବତନ୍ତ୍ର ରିଲିଫ୍ କମିଶନରଙ୍କ ଗାଇଡ୍ଲାଇନ ଅନୁସାରେ, ବିବାହ ଓ ଅନ୍ତ୍ୟେଷ୍ଟିରେ ଯେଉଁମାନେ ଯୋଗ ଦେବେ ସେମାନଙ୍କ ତଥ୍ୟ ଦେଇ ଉକ୍ତ ଓ୍ବେବସାଇଟ୍ରେ ଆବେଦନ କରିବାକୁ ପଡ଼ିବ। ଆବେଦନର କିଛି ସମୟ ପରେ ଡିସିପି ଅଫିସ ପକ୍ଷରୁ ମୋବାଇଲ୍ ନମ୍ବରକୁ ଏସ୍ଏମ୍ଏସ୍ ମାଧ୍ୟମରେ ଅନୁମତି ପଠାଯିବ ବୋଲି ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ କହିଛନ୍ତି। ଏହାସହ ଯେଉଁ ନିମନ୍ତ୍ରିତ ଅତିଥିଙ୍କ ତଥ୍ୟ ପ୍ରଦାନ କରାଯାଇଥିବ ସେମାନଙ୍କ ନମ୍ବରକୁ ମଧ୍ୟ ଏସ୍ଏମ୍ଏସ୍ ପଠାଯିବ। ଉକ୍ତ ଏସ୍ଏମ୍ଏସ୍ ଦେଖାଇ ସେମାନେ କାର୍ଯ୍ୟକ୍ରମରେ ଯୋଗଦେବାକୁ ଯାଇପାରିବେ। ତେବେ ବର୍ତ୍ତମାନ ଏହି ଅନ୍ଲଇନ୍ ସୁବିଧା କେବଳ ଭୁବନେଶ୍ୱର ସହରାଞ୍ଚଳ ପାଇଁ ଆରମ୍ଭ କରାଯାଇଛି। ଖୁବ୍ଶୀଘ୍ର କଟକ ସହରାଞ୍ଚଳ ପାଇଁ ଆରମ୍ଭ କରାଯିବ। ଅନ୍ୟପକ୍ଷେ କୌଣସି ପ୍ରକାର ଅନୁସନ୍ଧାନ ନିମନ୍ତେ ପୋଲିସ ପକ୍ଷରୁ ଏକ ହ୍ବାଟ୍ସଆପ ନଂ.୮୧୪୪୨୦୭୧୦୦ ଜାରି କରାଯଇଛି। ଉକ୍ତ ନମ୍ବରରେ ହ୍ବାଟ୍ସଆପ୍ କଲେ ପୋଲିସ ପକ୍ଷରୁ ସମସ୍ତ ଉତ୍ତର ଦିଆଯିବ ବୋଲି ବୋଲି କମିଶନର କହିଛନ୍ତି।
ଗର୍ଭବତୀଙ୍କ ପାଇଁ ଘରେ ଟେଷ୍ଟିଂ ସୁବିଧା
ସହରରେ ସଂକ୍ରମଣ ରୋକିବାକୁ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। ଏବେ ଗର୍ଭବତୀଙ୍କ ପାଇଁ ଘରେ ଟେଷ୍ଟିଂର ସୁବିଧା କରିଛି ବିଏମ୍ସି। ଏଥିପାଇଁ ଗର୍ଭବତୀମାନେ ସକାଳ ୮ଟାରୁ ୧୧ଟା ମଧ୍ୟରେ ୧୯୨୯କୁ କଲ୍ କରି ଟେଷ୍ଟିଂ ପାଇଁ ବୁକିଂ କରିପାରିବେ। ପରଦିନ ବିଏମ୍ସିର ମୋବାଇଲ ଭ୍ୟାନ୍ ଆସି ଘରୁ ସେମାନଙ୍କ ନମୁନା ପରୀକ୍ଷା ପାଇଁ ନେବେ। ତେବେ କଲ୍ ସମୟରେ ନିଜର ପୂରା ନାମ ସହ ସମ୍ପୂର୍ଣ୍ଣ ଠିକଣା ଓ ଠିକ୍ ମୋବାଇଲ ନମ୍ବର ଦେବାକୁ ବିଏମ୍ସି ପକ୍ଷରୁ କୁହାଯାଇଛି। ସୂଚନାଯୋଗ୍ୟ, ପ୍ରଥମେ ୪୫ରୁ ଊର୍ଦ୍ଧ୍ୱ ନାଗରିକଙ୍କୁ ଦ୍ୱିତୀୟ ଡୋଜ୍ ଟିକା ଦେବା ପାଇଁ ଡ୍ରାଇଭ୍ ଇନ୍ ଭାକ୍ସିନେଶନ ବ୍ୟବସ୍ଥା ଆରମ୍ଭ କରିଥିଲା ବିଏମ୍ସି। ଏଥିସହ ସୋମବାରଠାରୁ ୬୦ରୁ ଊର୍ଦ୍ଧ୍ୱ ବୟସର ବରିଷ୍ଠ ନାଗରିକଙ୍କ ପାଇଁ ଡୋର୍ ଷ୍ଟେପ୍ରେ ଟିକାକରଣ ଓ ଟେଷ୍ଟିଂ ବ୍ୟବସ୍ଥା ହୋଇଛି।