ମହାକାଳପଡା,୨୪ା୭(ଡି.ଏନ୍.ଏ.): କରୋନା ମହାମାରୀ ପାଇଁ ରାଜ୍ୟରେ ବିଦ୍ୟାଳୟଗୁଡିକ ବନ୍ଦ ରହିଛି। ଏପରିସ୍ଥିତିରେ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ବଉଳକଣୀ ପଞ୍ଚାୟତର ଉପାନ୍ତ ଅଞ୍ଚଳ ଭାବେ ପରିଚିତ ବାଘୁଆମେଦସ୍ଥିତ ଆଦିବାସୀପଡ଼ାରେ ବହୁ ଛାତ୍ରୀଛାତ୍ର ଏବେ ପାଠପଢ଼ା ଛାଡ଼ି ଚାଷ କାମରେ ପରିବାର ଲୋକଙ୍କୁ ସହଯୋଗ କରୁଛନ୍ତି। ଆଉ କେତେଜଣ ନଦୀ ନାଳରୁ ମାଛ ଧରିବା ଓ ଜଙ୍ଗଲରୁ କାଠ ସଂଗ୍ରହ କରିବାରେ ବ୍ୟସ୍ତ ରହିଛନ୍ତି। ଏହାକୁ ବଜାରରେ ବିକ୍ରି କରି ପରିବାର ଲୋକେ ଘର ଚଳାଉଛନ୍ତି। ଫଳରେ ପିଲାଙ୍କ ପାଠପଢ଼ା ବାଧାପ୍ରାପ୍ତ ହୋଇଛି। ଅପରପକ୍ଷେ ମହାମାରୀ ସମୟରେ ଅନ୍ଲାଇନ୍ ମାଧ୍ୟମରେ ପାଠ ପଢ଼ା ପାଇଁ ରାଜ୍ୟ ସରକାର ମଧୁ ଓ ଶିକ୍ଷା ସଂଯୋଗ ଆପ୍ ଆରମ୍ଭ କରିଛନ୍ତି। ମାତ୍ର ଆଦିବାସୀ ଅଧ୍ୟୁଷିତ ଅଞ୍ଚଳରେ ବିଦ୍ୟୁତ୍ ଓ ମୋବାଇଲ ସେବା ଆଦି ନ ଥିବା ବେଳେ ପଡ଼ାରେ ଏହାର କାର୍ଯ୍ୟକାରିତା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅଭାବ ଅନଟନ ଭିତରେ ଦିନ କାଟୁଥିବା ଏହି ପଡ଼ାର ଲୋକେ ଆପ୍ ସମ୍ପର୍କରେ କିଛିି ଜାଣିନାହାନ୍ତି ବୋଲି କହିଛନ୍ତି। ଗ୍ରାମର ରାଖାଲ ସିଂ, କଟି ସିଂଙ୍କ କହିବାନୁସାରେ ଶଟ୍ଡାଉନ୍ ଓ ଲକ୍ଡାଉନ୍ ଯୋଗୁ ଆମେ କାମଧନ୍ଦା କରିବାକୁ ବାହାରକୁ ଯାଇପାରୁନୁ । ପେଟପୋଷିବା ପାଇଁ ପରିବାର ଅନ୍ୟ ସଦସ୍ୟଙ୍କ ସହ ପିଲାମାନଙ୍କୁ ମଧ୍ୟ କାମ କରିବାକୁ ପଡ଼ୁଛି।
ଏ ସମ୍ପର୍କରେ ଜିଲା ଶିକ୍ଷା ଅଧିକାରୀ ସଞ୍ଜୀବ କୁମାର ସିଂ କୁହନ୍ତି,ଗ୍ରାମାଞ୍ଚଳରେ ଅନ୍ଲାଇନ ପାଠପଢ଼ା ସରଳୀକରଣ କରିବା ପାଇଁ ଉଚ୍ଚ କର୍ତ୍ତୃପକ୍ଷଙ୍କୁ ପ୍ରସ୍ତାବ ଦିଆଯାଇଛି। ଏହା କାର୍ଯ୍ୟକାରୀ ହେଲେ ବହୁ ଛାତ୍ରୀଛାତ୍ର ଉପକୃତ ହେବେ।