ଭୁବନେଶ୍ୱର,୨୫ା୫(ବ୍ୟୁରୋ): ସେକେଣ୍ଡ୍ ହ୍ୟାଣ୍ଡ୍ ହେଲେ ମଧ୍ୟ କମ୍ ଦାମ୍ରେ ଏକ ନମ୍ବର କ୍ୱାଲିଟିର ଜିନିଷ ମିଳିବ। ଟଙ୍କା ଦେଲେ ସହଜରେ ଘରେ ପହଞ୍ଚତ୍ବ ସାମଗ୍ରୀ। ଟ୍ରାନ୍ସପୋର୍ଟେଶନ ମାଗଣା। ଭୁବନେଶ୍ୱର, କଟକ ସହ ରାଜ୍ୟର ଯେଉଁଠି କହିବେ ସେଠାରେ ଜିନିଷ ସୁରକ୍ଷିତ ଭାବେ ପହଞ୍ଚତ୍ବ। ଏଥିପାଇଁ ପ୍ରଥମେ ୨ ହଜାର ଟଙ୍କା ଦେଇ ବୁକିଂ କରିବାକୁ ପଡିବ। ଜିନିଷ ବାଛିବା ପରେ ଅବଶିଷ୍ଟ ଟଙ୍କା ଅନ୍ଲାଇନ୍ରେ ପଠାଇବାକୁ ହେବ। ବିଶ୍ୱାସ ଜନ୍ମାଇବା ଭଳି ଏଭଳି ବିଭିନ୍ନ ପ୍ରତିଶ୍ରୁତି ଦେଇ ଲୋକଙ୍କୁ ଭୁଆଁ ବୁଲାଉଛନ୍ତି ଅନ୍ଲାଇନ ଠକ। ବିମାନବନ୍ଦରରେ ଚାକିରି କରିଥିବା ଫେସ୍ବୁକ ପେଜ୍ରେ ଉଲ୍ଲେଖ କରିବା ସହ ଏସବୁ ଜିନିଷ ବିକ୍ରି କରିବା ଲାଗି ଲମ୍ବା ତାଲିକା ପୋଷ୍ଟ କରୁଛନ୍ତି। ଏସି ୧.୫ ଟନ୍ ଫାଇଭ୍ ଷ୍ଟାର୍ ୧୧ ହଜାର, ସୋଫା ସେଟ୍ ୧୦ ହଜାର, ଡବଲ ବେଡ୍ ୮ ହଜାର, ଡବଲ ଡୋର ଫ୍ରିଜ୍ ୭ ହଜାର, ୱାଶିଂ ମେଶିନ ୬ ହଜାର, ଏଲଇଡି ଟିଭି ୬ ହଜାର ଟଙ୍କା ଆଦିରେ ମିଳୁଥିବାରୁ ଲୋକେ ମଧ୍ୟ ଆକର୍ଷିତ ହୋଇ ଲୋଭରେ ପଡି ଦିଆଯାଉଥିବା ଫୋନ୍ ନମ୍ବରରେ ଯୋଗାଯୋଗ କରୁଛନ୍ତି। ଏହାପରେ ଠକଙ୍କ କାର୍ନାମା ଆରମ୍ଭ ହେଉଛି। ଏଭଳି ଠକେଇ ଶିକାର ହୋଇଥିବା ଜଣେ ଯୁବକ କହିଛନ୍ତି, ଫେସବୁକ୍ ଖୋଲି ଦେଖୁଥିବାବେଳେ ସୁଶୀଲ କୁମାର ସାର୍ ନାମକ ଏକ ଆଇଡିରେ ସେକେଣ୍ଡ ହାଣ୍ଡ ଟିଭି, ଫ୍ରିଜ୍, ସୋଫା ସେଟ, ଡବଲ ବେଡ ଆଦି ୫ ମାସର ଜିନିଷ କମ୍ ଟଙ୍କାରେ ବିକ୍ରି ହେଉଥିବା ଜାଣିଲି। ତେଣୁ ଉକ୍ତ ଆଇଡିରେ ଦିଆଯାଇଥିବା ନମ୍ବରରେ ଯୋଗାଯୋଗ କରିଥିଲି। ବ୍ୟକ୍ତି ଜଣକ ହିନ୍ଦୀରେ କଥା ହେବା ସହ ଭୁବନେଶ୍ୱରସ୍ଥିତ ବିଜୁ ପଟ୍ଟନାୟକ ବିମାନ ବନ୍ଦରରେ ଚାକିରି କରିଥିବା କହିଥିଲେ। ତେଣୁ ବିଶ୍ୱାସ ବଢିଯାଇଥିଲା। ଏନେଇ ଜିନିଷ ବାବଦକୁ ପଚାରିବାରୁ ସେ ପ୍ରଥମେ ୨ ହଜାର ଟଙ୍କା ଦେଇ ବୁକିଂ କରିବାକୁ ପଡିବ ବୋଲି କହିଥିଲେ। ହେଲେ ମୁଁ ୫୦୦ ଟଙ୍କା ଦେଇଥିଲି। ଏହାପରେ ଜିନିଷ ଦେଖିବାକୁ କହିବାରୁ ସେ ବିଭିନ୍ନ ପ୍ରକାର ବାହାନା କରିବା ସହ ବାକି ଟଙ୍କା ଦେବାକୁ କହିଥିଲେ। ତେଣୁ ଟଙ୍କା ଫେରାଇବାକୁ କହିବାରୁ ସିଧା ମନା କରିଦେଲେ। ଏନେଇ ଠକ ସଂସ୍ଥା କହିବାରୁ ନାନା ଧମକ ଦେଇ ବ୍ୟକ୍ତିଜଣକ ଫୋନ୍ କାଟି ଦେଇଥିବା ସେ କହିଛନ୍ତି।