ବନ୍ତ,୬।୫ (ଡି.ଏନ.ଏ.): ଭଦ୍ରକ ଜିଲା ବନ୍ତ ବ୍ଲକର ପ୍ରାୟ ୯୦ ପ୍ରତିଶତ ପ୍ରାଥମିକ ଶିକ୍ଷକ ନିଜର ସମ୍ପତ୍ତି ତାଲିକା ଦେଇପାରି ନ ଥିବା ଜଣାଯାଇଛି। ଅନ୍ଲାଇନ ଯାନ୍ତ୍ରିକ ତ୍ରୁଟି ଯୋଗୁ ଏଭଳି ସମସ୍ୟା ଉପୁଜିଥିବା କୁହାଯାଇଛି। ପ୍ରକାଶ ଯେ, ରାଜ୍ୟ ସରକାର ଉଭୟ ଶାସନ ଓ ପ୍ରଶାସନରେ ସ୍ବଚ୍ଛତା, ସଚ୍ଚୋଟତା, ଦୁର୍ନୀତିମୁକ୍ତ ଭାବମୂର୍ତ୍ତିକୁ ସୁନିଶ୍ଚିତ କରିବା ପାଇଁ ସମସ୍ତ ବର୍ଗର ସରକାରୀ କର୍ମଚାରୀ, ଲୋକପ୍ରତିନିଧିମାନଙ୍କୁ ବାର୍ଷିକ ସମ୍ପତ୍ତି ତାଲିକା ପ୍ରଦାନ କରିବାକୁ ନିର୍ଦ୍ଦେଶ ଦେଇଥିଲେ। ଏହା ପ୍ରଥମେ ମାର୍ଚ୍ଚ ୩୧ ଓ ପରେ ଏପ୍ରିଲ ୩୦ ମଧ୍ୟରେ ଅନ୍ଲାଇନ ମାଧ୍ୟମରେ ଅପ୍ଲୋଡ୍ କରିବା ଲାଗି ନିର୍ଦ୍ଦେଶ ଥିଲା। ଏହି ବ୍ଲକରେ ୬୧୨ ଜଣ ପ୍ରାଥମିକ ଶିକ୍ଷକ ଥିବାବେଳେ ସେମାନଙ୍କୁ ମଧ୍ୟରୁ ୯୦ ଭାଗ ଶିକ୍ଷକ ନିର୍ଦ୍ଧାରିତ ସମୟ ମଧ୍ୟରେ ସମ୍ପତ୍ତି ତାଲିକା ଦେଇପାରି ନାହାନ୍ତି। ଏଚ୍ଆର୍ଏମ୍୍ଏସ୍ ସାଇଟ୍ ନ ଖୋଲିବା, ସାଇଟ୍ ଖୋଲିବା ପରେ ଅନ୍ଲାଇନ ଯାନ୍ତ୍ରିକ ତ୍ରଟି ଯୋଗୁ ତାଲିକା ଅପ୍ଲୋଡ୍ ହୋଇପାରି ନ ଥିବା ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି।