ନୂଆଦିଲ୍ଲୀ, ୨।୭- ବିଶ୍ୱ କ୍ରିକେଟ୍ରେ ଗତ ୭୦ ବର୍ଷ ମଧ୍ୟରେ ଭିଭିଆନ ରିଚାଡର୍ସଙ୍କଠାରୁ ଆରମ୍ଭ କରି ସଚିନ ତେନ୍ଦୁଲକର, ବିରାଟ କୋହଲିଙ୍କ ପରି ଅନେକ ମହାନ କ୍ରିକେଟର୍ ସୃଷ୍ଟି ହୋଇଛନ୍ତି। କିନ୍ତୁ ଭାରତର ପୂର୍ବତନ ମହାନ ବ୍ୟାଟ୍ସମ୍ୟାନ ରାହୁଲ ଡ୍ରାଭିଡ୍ ଓ୍ବେଷ୍ଟଇଣ୍ଡିଜର କିମ୍ବଦନ୍ତୀ ବ୍ୟାଟ୍ସମ୍ୟାନ ସାର୍ ଏଭରଟନ ଓ୍ବିକ୍ସଙ୍କ ଲଗାତର ୫ ଶତକର ନିକଟତର ହୋଇପାରିଥିଲେ। ବୁଧବାର ଓ୍ବିକ୍ସ ୯୫ ବର୍ଷରେ ପ୍ରାଣତ୍ୟାଗ କରିଛନ୍ତି। ଓ୍ବିକ୍ସ ବିଶ୍ୱର ଏକମାତ୍ର ବ୍ୟାଟ୍ସମ୍ୟାନ ଥିଲେ ଯିଏକି ଟେଷ୍ଟ କ୍ରିକେଟ୍ରେ ଲଗାତର ୫ ଇନିଂସରେ ଶତକ ହାସଲ କରିବାର ବିରଳ କିର୍ତ୍ତୀମାନର ଅଧିକାରୀ ରହିଥିଲେ। କିନ୍ତୁ ଓ୍ବିକ୍ସଙ୍କ ପରେ ଗତ ୭୦ ବର୍ଷ ମଧ୍ୟରେ କେବଳ ଡ୍ରାଭିଡ ହିଁ ଏହି ବିରଳ ରେକର୍ଡର ନିକଟତର ହୋଇପାରିଥିଲେ। ଡ୍ରାଭିଡ୍ ଟେଷ୍ଟରେ ଲଗାତର ୪ ଇନିଂସରେ ଶତକ ଅର୍ଜନ କରିପାରିଥିଲେ। ଯାହାକି ଗତ ୭୦ ବର୍ଷରେ ଆଉ କୌଣସି ବ୍ୟାଟ୍ସମ୍ୟାନଙ୍କ ପକ୍ଷେ ଛୁଇଁବା ସମ୍ଭବପର ହୋଇ ନ ଥିଲା। ୨୦୦୨ରେ ଚମତ୍କାର ଫର୍ମରେ ଥିବାବେଳେ ଡ୍ରାଭିଡ୍ କ୍ରମାଗତ ଏହି ୪ ଶତକ ହାସଲ କରିଥିଲେ। ଭାରତ ସେହିବର୍ଷ ସେପ୍ଟେମ୍ବରରେ ଇଂଲଣ୍ଡ ଗସ୍ତରେ ଯାଇଥିବାବେଳେ ଡ୍ରାଭିଡ୍ ନଟ୍ଟିଂହାମରେ ୧୧୫, ଲିଡ୍ସରେ ଉଭୟ ଇନିଂସରେ ଯଥାକ୍ରମେ ୧୪୮ ଓ ୨୧୭ ରନର ମାରାଥନ ଇନିଂସ ଖେଳିଥିଲେ। ଏହାପରେ ଭାରତ ଯେତେବେଳେ ଘରୋଇ ମାଟିରେ ଓ୍ବେଷ୍ଟଇଣ୍ଡିଜ ବିପକ୍ଷରେ ଖେଳିଥିଲା ସେହି ସିରିଜର ପ୍ରଥମ ଟେଷ୍ଟର ପ୍ରଥମ ଇନିଂସରେ ଡ୍ରାଭିଡ ୧୦୦ ରନ କରିଥିଲେ। ମୁମ୍ବାଇରେ ଖେଳାଯାଇଥିବା ଏହି ମ୍ୟାଚ୍ରେ ଡ୍ରାଭିଡ୍ ୧୦୦ ରନ କରି ରିଟାୟାଡ ହର୍ଟ ହୋଇଥିଲେ।
