ଲିଡ୍ସ,୨୬।୮: ମ୍ୟାଚ୍ରେ ଆହୁରି ୩ ଦିନ ବାକି ଅଛି। ଟିମ୍ ଇଣ୍ଡିଆ ଏବେ ୩୪୫ ରନ୍ରେ ପଛୁଆ। ଇଂଲଣ୍ଡ ହାତରେ ଆହୁରି ୨ ଉଇକେଟ ଅଛି। ଏଭଳି ଗମ୍ଭୀର ସ୍ଥିତିରେ ବିରାଟ କୋହଲିଙ୍କ ନେତୃତ୍ୱାଧୀନ ଦଳକୁ କୌଣସି ଚମତ୍କାର ହିଁ ବଞ୍ଚାଇ ପାରିବ। ପ୍ରଥମ ଇନିଂସରେ ଭାରତ ମାତ୍ର ୭୮ ରନରେ ସୀମିତ ରହିବା ପରେ ଘରୋଇ ଇଂଲଣ୍ଡ ଦ୍ୱିତୀୟ ଦିନ ସୁଦ୍ଧା ୮ ଉଇକେଟ ହରାଇ ୪୨୩ ରନ୍ କରିଛି।
ପ୍ରଥମ ଦିନ ଭଳି ଗୁରୁବାର ଆରମ୍ଭରୁ ବୋଲରଙ୍କୁ ଉଇକେଟ ମିଳି ନ ଥିଲା। ଭାରତୀୟ ବୋଲରଙ୍କୁ ବେଶ ପରିଶ୍ରମ ପରେ ମିଳିଥିଲା ଦୁଇ ଓପନରଙ୍କ ଉଇକେଟ। ରୋରି ବନର୍ସ (୬୧) ଓ ହାସିବ ହାମିଦ (୬୮) ପ୍ରଥମ ଉଇକେଟ ପାଇଁ ୧୩୫ ରନ୍ ଯୋଡ଼ିଥିଲେ। ଦୀର୍ଘ ୩ ବର୍ଷ ପରେ ଟେଷ୍ଟ ଦଳକୁ ଫେରିଥିବା ଡେଭିଡ୍ ମଲାନ ୭୦ ରନ୍ କରିଥିଲେ। କ୍ୟାରିୟରର ଶ୍ରେଷ୍ଠ ଫର୍ମରେ ଥିବା ଅଧିନାୟକ ଜୋ ରୁଟ୍ (୧୨୧) ପୁଣି ଥରେ ଖେଳିଥିଲେ ଶତକୀୟ ପାଳି। ତାଙ୍କ କ୍ୟାରିୟରର ୨୩ ତମ ଶତକରେ ସାମିଲ ଥିଲା ୧୪ ଚୌକା। ଶେଷ ଆଡ଼କୁ ଘରୋଇ ଦଳର ୩ ବ୍ୟାଟ୍ସମ୍ୟାନଙ୍କୁ ପ୍ୟାଭିଲିୟନ ପଠାଇଥିଲେ ଭାରତୀୟ ପେସର। ଫଳରେ ଦ୍ୱିତୀୟ ଦିନ ଶେଷ ସୁଦ୍ଧା ଇଂଲଣ୍ଡ ୮ ଉଇକେଟ ହରାଇ ୪୨୩ ରନ୍ କରିଛି।
ଭାରତ ପାଇଁ ସର୍ବାଧିକ ସଫଳତା ହାତେଇଥିଲେ ମହମ୍ମଦ ଶାମି। ସେ ୩ ଉଇକେଟ ନେଇଥିବାବେଳେ ମହମ୍ମଦ ସିରାଜ ଓ ରବୀନ୍ଦ୍ର ଜାଡେଜା ୨ ଲେଖାଏ ଉଇକେଟ ହାତେଇଛନ୍ତି।