ବାଲେଶ୍ୱର ଅଫିସ, ୧୭।୪: ବାଲେଶ୍ୱର ଜିଲା ଜାତୀୟ ରାଜପଥ ପାର୍ଶ୍ୱସ୍ଥିତ ରେମୁଣାଠାରେ ନବନିର୍ମିତ ଏମ୍ସ ସାଟେଲାଇଟ୍ ସେଣ୍ଟରର ନିଜସ୍ବ କୋଠାରେ ଶନିବାରଠାରୁ ଓପିଡି ସେବା ଆରମ୍ଭ ହୋଇଛି। ପୂର୍ବାହ୍ନ ୮ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ଏଣ୍ଡୋକ୍ରାଇନୋଲୋଜି, ଜେନେରାଲ ସର୍ଜରି ଓ ଚର୍ମ ରୋଗ ବିଭାଗର ବିଶେଷଜ୍ଞ ଡାକ୍ତରମାନେ ସେବା ପ୍ରଦାନ କରିଥିଲେ।
ପ୍ରଥମ ଦିନରେ ଆଇଟିଆର୍ ନିର୍ଦ୍ଦେଶକ ଏଚ୍.କେ. ରଥ ଭୁବନେଶ୍ୱର ଏମ୍ସରୁ ଆସିଥିବା ୩ଜଣ ଡାକ୍ତର ଡା. କିଶୋର କୁମାର ବେହେରା, ଡା. ଶାନ୍ତନୁ କୁମାର ସାହୁ ଓ ଡା. ମନୋଜ କୁମାର ନାୟକଙ୍କୁ ପୁଷ୍ପଗୁଚ୍ଛ ଦେଇ ସ୍ବାଗତ କରିଥିଲେ। ପ୍ରଥମ ଦିନରେ ୩ଟି ବିଭାଗର ବିଶେଷଜ୍ଞ ଡାକ୍ତରମାନେ ୧୨୪ରୋଗୀଙ୍କୁ ଚିକିତ୍ସା କରିଛନ୍ତି। କରୋନା ସମୟରେ ବନ୍ଦ ରହିଥିବା ଏମ୍ସର ଆଉଟ୍ଡୋର ସେବା ପୁନଃ କାର୍ଯ୍ୟକ୍ଷମ ହୋଇଛି। ସେହିପରି ରେଗୁଲାର ଓପିଡିର ଉଦ୍ଘାଟନ ହେବା ପର୍ଯ୍ୟନ୍ତ ସାମୟିକ ଭାବେ ଏହି ସ୍ବାସ୍ଥ୍ୟସେବା ପ୍ରତ୍ୟେକ ଶନିବାର ଓ ରବିବାର ପ୍ରଦାନ କରାଯିବ। ତେବେ ଶନିବାର ପ୍ରଥମ ଦିନରେ ରୋଗୀମାନେ ଆସି ସ୍ବାସ୍ଥ୍ୟ ପରୀକ୍ଷା କରୁଥିବା ଦେଖିବାକୁ ମିଳିଥିଲା। ଏହି ଅବସରରେ ମେଡ଼ିକାଲ କଲେଜ କ୍ରିୟାନୁଷ୍ଠାନ କମିଟି ସମେତ ବହୁ ମାନ୍ୟଗଣ୍ୟ ବ୍ୟକ୍ତି, ବୁଦ୍ଧିଜୀବୀମାନେ ଉପସ୍ଥିତ ରହି ଓପିଡି ସେବା ଆରମ୍ଭ କରିଥିଲେ। ଏମ୍ସ ସାଟେଲାଇଟ୍ ସେଣ୍ଟର ନୋଡ଼ାଲ ଅଫିସର ଡା. ମୁକୁନ୍ଦ କୁମାର ସାହୁ, ଏମ୍ସ ବାଲେଶ୍ୱର ଇନଚାର୍ଜ ପ୍ରଫେସର ଡା. ସରୋଜ ଦାସ ମଜୁମଦାର ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିଥିଲେ।