ଚଣ୍ଡିଖୋଲ,୧୯ା୨(ଡି.ଏନ.ଏ.): ବଡ଼ଚଣା ବ୍ଲକ ଅଧୀନ ଚଣ୍ଡିଖୋଲସ୍ଥିତ ବାବା ଭୈରବାନନ୍ଦ ମହାବିଦ୍ୟାଳୟକୁ ଅସ୍ଥାୟୀ ଭୋଟବାକ୍ସ ସଂରକ୍ଷଣ କେନ୍ଦ୍ର କରାଯାଇଛି। ତେଣୁ ଏଠାକୁ ଭୋଟ ବାକ୍ସ ଆସୁଛି। ଶୁକ୍ରବାର ଭୋଟ ଶେଷପରେ ଉକ୍ତ ବ୍ଲକ ଚମ୍ପାପୁର ପଞ୍ଚାୟତ ଗୋପୀନାଥପୁର ଗ୍ରାମର ୩ ନଂ. ବୁଥ୍ ଭୋଟ ବାକ୍ସକୁ ପୋଲିଂ ଅଧିକାରୀ ଆଣିଥିଲେ। ତେବେ କେନ୍ଦ୍ରରେ ବାକ୍ସ ଖୋଲି ଅଦଳବଦଳ କରାଯାଇଥିବା ଭାଜପା କର୍ମୀ ଅଭିଯୋଗ କରିଥିଲେ। ଫଳରେ ଏହାକୁ ନେଇ ଉତ୍ତେଜନା ପ୍ରକାଶ ପାଇଥିଲା। ପୋଲିସ ଉତ୍ତ୍ୟକ୍ତ ଲୋକଙ୍କୁ ନିୟନ୍ତ୍ରଣ କରିବାକୁ ଯାଇ ମୃଦୁ ଲାଠି ଚାଳନା କରିଥିଲା। ଜିଲା ପ୍ରଶାସନର ହସ୍ତକ୍ଷେପ ପରେ ସ୍ଥିତି ଶାନ୍ତ ପଡ଼ିଥିଲା।
ଭୋଟବାକ୍ସ ଖୋଲାଥିବାବେଳେ ଏହା ନିକଟରେ ପୋଲିଂ ଅଧିକାରୀ ଛିଡ଼ା ହେବା ଦେଖି ଭାଜପା କର୍ମୀ ହୋହଲ୍ଲା କରିଥିଲେ। ଖବର ପାଇ ଶତାଧିକ କର୍ମୀ ଘଟଣାସ୍ଥଳରେ ରୁଣ୍ଡ ହୋଇ ଭୋଟବାକ୍ସରେ ଜାଲିଆତି ହୋଇଥିବା ଅଭିଯୋଗ କରି ଜଣେ ପୋଲିଂ ଅଧିକାରୀଙ୍କୁ ମାଡ଼ ମାରିଥିଲେ। ଭାଜପା ନେତା ଅମର ନାୟକ ପହଞ୍ଚିବା ପରେ ପରିସ୍ଥିତି ଆହୁରି ଉତ୍ତେଜନା ମୂଳକ ହୋଇଥିଲା। ପୋଲିସ ବୁଝାଶୁଝା କରିବାକୁ ଉଦ୍ୟମ କରିଥିଲେ ମଧ୍ୟ ଲୋକେ କିଛି ଶୁଣି ନ ଥିଲେ। ଜିଲା ପ୍ରଶାସନ ପକ୍ଷରୁ ପ୍ରକଳ୍ପ ନିର୍ଦ୍ଦେଶକ ଅଶୋକ କୁମାର ବେଉରିଆ, ଅତିରିକ୍ତ ଜିଲାପାଳ ଅକ୍ଷୟ କୁମାର ମଲ୍ଲିକ, ତହସିଲଦାର ପ୍ରଦୀପ କୁମାର ସେଠୀ, ଅତିରିକ୍ତ ତହସିଲଦାର ନିରଞ୍ଜନ ଗୁରୁ ପ୍ରମୁଖ ପହଞ୍ଚି ଲୋକଙ୍କୁ ବୁଝାଶୁଝା କରିଥିଲେ। ଶେଷରେ ପୁନଃ ର୍ବାର ଉପସ୍ଥିତ ଲୋକଙ୍କ ସମ୍ମୁଖରେ ଭୋଟବାକ୍ସ ସିଲ କରାଯାଇ ସଂରକ୍ଷଣ କକ୍ଷକୁ ନିଆଯାଇଥିଲା। ତେବେ ପରିବହନ ସମୟରେ ଭୋଟ ବାକ୍ସ ଖୋଲି ଯାଇଥିବା ନେଇ ଦାୟିତ୍ୱରେ ଥିବା ଅଧିକାରୀ ସଫେଇ ଦେଇଛନ୍ତି।