ଭୁବନେଶ୍ୱର,୨୮ା୧୧(ସତ୍ୟଜିତ୍ ରାଉତ):ନାଗରିକଙ୍କୁ ଉତ୍ତମ ସେବା ପ୍ରଦାନ କରିବାକୁ ବିଭିନ୍ନ ସରଳ ବ୍ୟବସ୍ଥା କାର୍ଯ୍ୟକାରୀ କରାଯାଉଥିବା ଓଡ଼ିଶା ପୋଲିସ ପକ୍ଷରୁ କୁହାଯାଉଛି। ବିଶେଷକରି ବୈଷୟିକ ଜ୍ଞାନକୌଶଳ ବ୍ୟବହାର କରାଯାଇ ଯୋଜନା ପରେ ଯୋଜନା ହାତକୁ ନିଆଯାଉଛି। ଏହାକୁ ନେଇ କିଛି ଦିନ ପର୍ଯ୍ୟନ୍ତ ପୋଲିସ ଅଧିକାରୀମାନେ ତତ୍ପରତା ଦେଖାଇବା ସହ ବାହା ବାଃ ନେଉଛନ୍ତି। ହେଲେ ପରବର୍ତ୍ତୀ ସମୟରେ ଅଧିକାଂଶ ଯୋଜନା ଗୁରୁତ୍ୱହୀନ ହୋଇପଡୁଛି, ଯେଉଁଥିପାଇଁ ଏବେ ବହୁ ଯୋଜନା ଓ ଆପ୍ ଲୋକଙ୍କ ସେବାରେ ଆସୁନି। କ୍ରାଇମ୍ ଆଣ୍ଡ୍ କ୍ରିମିନାଲ୍ ଟ୍ରାକିଂ ନେଟ୍ୱର୍କ ଆଣ୍ଡ୍ ସିଷ୍ଟମ(ସିସିଟିଏନ୍ଏସ୍) ପ୍ରୋଜେକ୍ଟ ଅଧୀନରେ ଓଡ଼ିଶା ପୋଲିସ ପକ୍ଷରୁ ଏକ ମୋବାଇଲ ଆପ୍ଲିକେଶନ୍ ‘ସହାୟତା’ ରହିଛି। ରାଜ୍ୟ ଅପରାଧ ନଥି ସଂସ୍ଥା (ଏସ୍ସିଆର୍ବି) ପକ୍ଷରୁ ଏହି ଆପ୍କୁ ପ୍ରସ୍ତୁତ କରାଯାଇ ୨୦୧୮ ମାର୍ଚ୍ଚ ୧୪ରୁ ଲୋକଙ୍କ ସେବାର ଲଗାଯାଇଛି। ଗୁଗଲ୍ ପ୍ଲେ ଷ୍ଟୋର୍ରୁ ଲୋକେ ଏହାକୁ ଡାଉନ୍ଲୋଡ୍ କରି ଘରେ ବସି ୧୮ଟି ସୁବିଧା ପାଇବାର ବ୍ୟବସ୍ଥା ରହିଛି। ହେଲେ ଏହି ଆପ୍ ଏବେ କାମ କରୁ ନ ଥିବା ଅଭିଯୋଗ ହୋଇଛି। ପୋଲିସ ବିଭାଗରେ ଏଭଳି ଅବ୍ୟବସ୍ଥାକୁ ନେଇ ଲୋକେ ଅସନ୍ତୋଷ ବ୍ୟକ୍ତ କରିଛନ୍ତି।
ପୋଲିସ ଷ୍ଟେଶନକୁ ନ ଯାଇ ଅଭିଯୋଗକାରୀ ‘ସହାୟତା’ ଆପ୍ ଜରିଆରେ ନିଜ ଏତଲା ଦେଇ ଏଫ୍ଆଇଆର୍ (ଫାର୍ଷ୍ଟ ଇନ୍ଫରମେଶନ୍ ରିପୋର୍ଟ)ର କପି ମଧ୍ୟ ଡାଉନ୍ଲୋଡ୍ କରିପାରିବେ। ସେହିଭଳି କ୍ୟାରେକ୍ଟର ସାର୍ଟିଫିକେଟ୍, ପଟ୍ଟା ଭେରିଫିକେଶନ୍, ଇଭେଣ୍ଟ୍ ପାଇଁ ଆବେଦନ, ଏମ୍ପ୍ଲଇ ଯାଞ୍ଚ୍ ଆଦି ଆବେଦନ କରିହେବ। ଏଥିସହ ପ୍ରଶେସନ୍, ବିକ୍ଷୋଭ ଓ ଧାରଣା ପାଇଁ ଆବେଦନ, ହଜିଯାଇଥିବା ଜିନିଷ ସଂକ୍ରାନ୍ତରେ ଅଭିଯୋଗ ପଞ୍ଜୀକରଣ, ନିଖୋଜ ଲୋକଙ୍କ ସମ୍ବନ୍ଧରେ ଏହି ଆପ୍ ଜରିଆରେ ରିପୋର୍ଟ ମଧ୍ୟ କରାଯିବାର ବ୍ୟବସ୍ଥା ରହିଛି। ହେଲେ ଆପ୍ ଚାଲୁ ନ ଥିବାରୁ ଗୁଗଲ୍ ପ୍ଲେ ଷ୍ଟୋର୍ରେ ଲୋକେ ନାନା ରିଭ୍ୟୁ/ମନ୍ତବ୍ୟ ଦେଇଛନ୍ତି। ଏହି ଆପ୍କୁ ଖୋଲିବା ପରେ ତାହାକୁ ଅପ୍ଡେଟ୍ କରିବାକୁ ଲେଖା ଆସୁଛି। ହେଲେ ଅପ୍ଡେଟ୍ କରିବା ପରେ ମଧ୍ୟ ସମାନ ସମସ୍ୟା ଦେଖାଉଛି। ଏନେଇ ଏସ୍ସିଆର୍ବି ନିର୍ଦ୍ଦେଶକ ବିନୟତୋଷ ମିଶ୍ର କହିଛନ୍ତି, ଏହା ଆଇଟି ସିଷ୍ଟମ୍ ହୋଇଥିବା ବେଳେ କେତେବେଳେ କେମିତି ଏଥିରେ ଅସୁବିଧା ହେଉଛି। ଏଥିପାଇଁ ହେଲ୍ପ ଡେସ୍କ ନମ୍ବର ରହିଛି ବୋଲି ସେ କହିଛନ୍ତି।
ସେହିଭଳି ରାଜ୍ୟର ଅଧିକାଂଶ ଥାନା ଅଧିକାରୀ ଓ ଏସ୍ଡିପିଓଙ୍କ ସିୟୁଜି (କ୍ଲୋଜ୍ଡ ୟୁଜର୍ ଗ୍ରୁପ୍) ନମ୍ବରକୁ ମଧ୍ୟ କଲ୍ ଯାଉନାହିଁ। ଅଧିକାରୀ ବଦଳିଲେ ମଧ୍ୟ ସମାନ ନମ୍ବରରେ ଲୋକେ ଯୋଗାଯୋଗ କରିବାର ବ୍ୟବସ୍ଥା ରହିଛି। ଏସବୁ ନମ୍ବର ଅକାମୀ ହୋଇଯାଇଥିବା ମଧ୍ୟ ଅଭିଯୋଗ ହୋଇଛି। ସିୟୁଜି ନମ୍ବରକୁ କଲ୍ କଲେ ସୁଇଚ୍ ଅଫ୍ ଥିବା କହୁଛି। ସେହିଭଳି ଥାନାଗୁଡ଼ିକର ଅଧିକାଂଶ ଲ୍ୟାଣ୍ଡ୍ଲାଇନ୍ ନମ୍ବରକୁ ମଧ୍ୟ କଲ୍ ଯାଉ ନ ଥିବା ଜଣାପଡିଛି। ଏନେଇ ବରିଷ୍ଠ ଆଇନଜୀବୀ ଚିତ୍ତରଞ୍ଜନ ଦାସ କହିଛନ୍ତି, ଯୋଜନା ଉପରେ ଯୋଜନା ଚାଲିଛି। ହେଲେ ଏସବୁ ଯୋଜନାର କିଛି ସୁଫଳ ମିଳିପାରୁନାହିଁ। କିଛି ସାଧାରଣ ଲୋକ ଏବଂ ମୁଁ ମଧ୍ୟ ସହାୟତା ଆପ୍ ଜରିଆରେ ସୁବିଧା ପାଇବାକୁ ଯାଇ ବିଫଳ ହୋଇଛୁ। ଯେଉଁ ଯୋଜନା ପୋଲିସ କରୁଛି ତାହା ଠିକ୍ ଭାବେ କାର୍ଯ୍ୟକାରୀ ହେଉ ବୋଲି ସେ କହିଛନ୍ତି।