ଜେଦ୍ଦାହ,୨୬।୪: ସୁଦାନରେ ଫସି ରହିଥିବା ଭାରତୀୟଙ୍କୁ ଉଦ୍ଧାର କରିବାକୁ ଅପରେଶନ କାଭେରୀ ଜାରି ରହିଛି। ଭାରତୀୟଙ୍କୁ ଆଇଏଏଫ-ସି-୧୩୦ଜେ ବିମାନରେ ପୋର୍ଟ ସୁଦାନରୁ ଜେଦ୍ଦା ନିଆଯାଇଛି। ସୁଦାନରୁ ଏବେ ପର୍ଯ୍ୟନ୍ତ ୫୩୦ ଭାରତୀୟଙ୍କୁ ଉଦ୍ଧାର କରାଯାଇଛି। ଭାରତୀୟ ବାୟୁସେନାର ଅଧିକାରୀ ଦେଶବାସୀଙ୍କୁ ସବୁ ପ୍ରକାର ସାହାଯ୍ୟ କରିବାକୁ ପ୍ରସ୍ତୁତ ଅଛନ୍ତି। ଏହି ସମୟ ଭିତରେ ଏକ ମାର୍ମିକ ଓ ହୃଦୟକୁ ଛୁଇଁ ଦେଇଗଲା ଭଳି ଏକ ଫଟୋ ସାମ୍ନାକୁ ଆସିଛି। ଏହି ଫଟୋଟି ଜଣେ ବାୟୁସେନା ଅଧିକାରୀଙ୍କର। ଯେ କି ଜଣେ ଶିଶୁକନ୍ୟାକୁ ଛାତିରେ ଜାବୁଡି ଧରି ବିମାନ ନିକଟକୁ ନେଇଯାଉଛନ୍ତି।
ଭାରତୀୟ ବାୟୁସେନା ଗରୁଡ ବିଶେଷ ବଳର ଅଧିକାରୀ ଶିଶୁଟିକୁ ଖୁବ ଆଦରରେ କୋଳରେ ଉଠାଇ ନେଇ ଯାଉଥିବା ଦେଖାଯାଇଛି। ଏହାର ଏକ ଭିଡିଓ ଏବେ ସାମ୍ନାକୁ ଆସିଛି। ଲୋକେ ବାୟୁସେନା ଅଧିକାରୀଙ୍କ ଏହି ଫଟୋ ଓ ଭିଡିଓକୁ ଦେଖିବା ପରେ ବାୟୁସେନାର ଖୁବ ପ୍ରଶଂସା କରିଛନ୍ତି।