ରାଞ୍ଚି,୩୧।୭ : କଂଗ୍ରେସ ଭାଜପା ବିରୋଧରେ ବଡ଼ ଅଭିଯୋଗ ଆଣିଛି। ଝାଡ଼ଖଣ୍ଡରେ ଭାଜପା ଅପରେଶନ ଲୋଟସ ଦ୍ୱାରା ସରକାରଙ୍କୁ ଭାଙ୍ଗିବାର ଉଦ୍ୟମ କରୁଛି ବୋଲି କଂଗ୍ରେସ କହିଛି। କଂଗ୍ରେସ କର୍ମୀମାନେ କହିଛନ୍ତି ଯେ ପଶ୍ଚିମବଙ୍ଗର ହାୱଡାରେ ଦଳର ୩ ଜଣ ବିଧାୟକଙ୍କଠାରୁ ବିପୁଳ ପରିମାଣର ନଗଦ ଟଙ୍କା ଜବତ ପରେ ଏହା ସ୍ପଷ୍ଟ ହୋଇଛି। ପୂର୍ବରୁ ମଧ୍ୟ ହେମନ୍ତ ସୋରେନଙ୍କ ନେତୃତ୍ୱରେ ଗଠିତ ମିଳିତ ସରକାରକୁ ହଟାଇବାକୁ ଭାଜପା ଚେଷ୍ଟା କରୁଥିବା କଂଗ୍ରେସ ଅଭିଯୋଗ କରିଥିଲା।
କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ ଟୁଇଟ କରି କହିଛନ୍ତି ଯେ ଝାଡଖଣ୍ଡରେ ଭାଜପାର ଅପରୋନ ଲୋଟସର ପର୍ଦ୍ଦାଫାଶ୍ ହାଓ୍ବଡ଼ାରେ ହୋଇଛି। ଦିଲ୍ଲୀରେ ହମ୍ ଦୋ ର ଗେମ୍ ପ୍ଲାନ୍ ବର୍ତ୍ତମାନ ଝାଡଖଣ୍ଡ ପାଇଁ କରାଯାଉଛି। ଭାଜପା ମହାରାଷ୍ଟ୍ରରେ ଇ-ଡି( ଏକନାଥ ଶିନ୍ଦେ-ଦେବେନ୍ଦ୍ର ଫଡ଼ନଭିସ) ଯୋଡି ଆଣଛି।
ଶନିବାର ରାତିରେ ପଶ୍ଚିମବଙ୍ଗର ହାଓ୍ବଡ଼ା ଜିଲାରେ ଝାଡଖଣ୍ଡର ତିନି ଜଣ ବିଧାୟକଙ୍କୁ ପୋଲିସ ଅଟକାଇଥିଲା। ତାଙ୍କ ଗାଡିରୁ ବିପୁଳ ପରିମାଣର ନଗଦ ଟଙ୍କା ଜବତ କରାଯାଇଛି। ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି ଯେ ଗୁପ୍ତଚର ଇନପୁଟ ଆଧାରରେ ବିଧାୟକ ଇରଫାନ ଅନସାରୀ, ରାଜେଶ କାଚ୍ଚାପ ଏବଂ ନମନ ବିକ୍ସାଲ କାଙ୍ଗେରି ଯେଉଁ ଗାଡିରେ ଯାତ୍ରା କରୁଥିଲେ ତାହାକୁ ପଞ୍ଚଲା ପୋଲିସ ଷ୍ଟେଶନ ଅନ୍ତର୍ଗତ ରାନହତି ଠାରେ ଜାତୀୟ ରାଜପଥ-୧୬ରେ ପୋଲିସ ଅଟକାଇଥିଲା।
ହାଓ୍ବଡ଼ା ପୋଲିସ ଅଧୀକ୍ଷକ ସ୍ବାତି ଭାଙ୍ଗଲିଆ କହିଛନ୍ତି, କଳା ରଙ୍ଗର କାରରେ ବିପୁଳ ପରିମାଣର ଟଙ୍କା ନିଆଯାଉଥିବାର ଆମେ ସୂଚନା ପାଇଥିଲୁ। ଆମେ ଗାଡିଗୁଡିକୁ ଅଟକାଇ ଯାଞ୍ଚ୍ ଆରମ୍ଭ କରିଥିଲୁ। ତିନି ଜଣ ବିଧାୟକଙ୍କୁ ନେଇ ଯାଉଥିବା ଏହି କାରକୁ ଅଟକାଇଥିଲୁ। କାରରୁ ବିପୁଳ ପରିମାଣର ନଗଦ ଟଙ୍କା ଜବତ କରାଯାଇଛି। ଟଙ୍କା ଗଣିବା ପାଇଁ ଏକ ମେସିନ ଅର୍ଡର କରାଯାଉଛି। ଏହି ଟଙ୍କା କେଉଁଠାରୁ ଆସିଛି ଏବଂ ଏହାକୁ କେଉଁଠିକୁ ନିଆଯାଉଛି ସେ ନେଇ ବିଧାୟକମାନଙ୍କୁ ପଚରାଉଚରା କରାଯାଉଥିବା ସେ କହିଛନ୍ତି।
ଝାଡଖଣ୍ଡ କଂଗ୍ରେସର କାର୍ଯ୍ୟକାରୀ ସଭାପତି ବନ୍ଧୁ ତିର୍କି କହିଛନ୍ତି ଯେ ଏହା ଭାଜପାର ଷଡଯନ୍ତ୍ର ବୋଲି ଜଣାପଡିଛି। ହେମନ୍ତ ସୋରେନ ସରକାର କ୍ଷମତାକୁ ଆସିବା ପରଠାରୁ ଭାଜପା ଏହାକୁ ଅସ୍ଥିର କରିବାକୁ ଚେଷ୍ଟା କରୁଛି।
ସେ କହିଛନ୍ତି ଯେ ଯଦି ଆମେ ମହାରାଷ୍ଟ୍ର ଏବଂ ଅନ୍ୟ କେତେକ ରାଜ୍ୟରେ କ’ଣ ଘଟିଛି ତାହା ଦେଖିବା, ଏହା ସ୍ପଷ୍ଟ ହୋଇଯିବ ଯେ ସରକାରଙ୍କୁ କ୍ଷମତାଚ୍ୟୁତ କରିବା ପାଇଁ ଭାଜପା ଟଙ୍କା ବ୍ୟବହାର କରୁଛି। ମୁଁ ୩ ବିଧାୟକଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପାର୍ଟି ହାଇକମାଣ୍ଡକୁ ଅନୁରୋଧ କରୁଛି, ଯାହା ଦ୍ୱାରା ଦଳର ଅନ୍ୟ ସଦସ୍ୟଙ୍କ ନିକଟକୁ ଏକ ଦୃଢ଼ ବାର୍ତ୍ତା ପଠାଯାଇପାରିବ।